ନୂଆଦିଲ୍ଲୀ,୧୩।୨: ଦେଶର ପ୍ରମୁଖ ବାଣିଜି୍ୟକ ସଂସ୍ଥା ତଥା ଟାଟା ଗ୍ରୁପର ପ୍ରମୁଖ କମ୍ପାନୀ ଟାଟା ଷ୍ଟିଲ ସହ ଗ୍ରୁପର ଆଉ ୭ ସହାୟକ କମ୍ପାନୀର ମିଶ୍ରଣ ସମ୍ପର୍କରେ ଘୋଷଣା କରାଯାଇଛି। ଏପରି କି ୨୦୨୩-୨୪ ଆର୍ଥିକ ବର୍ଷ ମଧ୍ୟରେ ଟାଟା ଷ୍ଟିଲ ସହ ଗ୍ରୁପର ଅନ୍ୟ ୭ ସହାୟକ କମ୍ପାନୀ ମିଶ୍ରଣ ହେବା ନେଇ ଆକଳନ କରାଯାଉଛି। ବିଶେଷ କରି ଟାଟା ଗ୍ରୁପର ଅନୁଗୋଳ ଏନର୍ଜୀ ବ୍ୟତୀତ ଟାଟା ଷ୍ଟିଲରେ ମିଶ୍ରଣ ହେଉଥିବା ବଳକା ୬ ସହାୟକ କମ୍ପାନୀ ଯଥା- ଟାଟା ଷ୍ଟିଲ୍ ଲଙ୍ଗ୍ ପ୍ରଡକ୍ଟସ (ଟିଏସ୍ପିଏଲ), ଦ ଟିନପ୍ଲେଟ୍ କମ୍ପାନୀ ଅଫ୍ ଇଣ୍ଡିଆ, ଟାଟା ମେଟାଲିକ୍ସ, ଟିଆରଏଫ୍, ଇଣ୍ଡିଆନ୍ ଷ୍ଟିଲ୍ ଆଣ୍ଡ୍ ଓ୍ବୟାର ପ୍ରଡକ୍ଟସ ଏବଂ ଟାଟା ଷ୍ଟିଲ୍ ମାଇନିଙ୍ଗ୍, ଏସ୍ ଆଣ୍ଡ୍ ଟି ମାଇନିଙ୍ଗ୍ କମ୍ପାନୀ ଇତ୍ୟାଦି ଅନ୍ତର୍ଭୁକ୍ତ ରହିଛି।
ଏ ସମ୍ପର୍କରେ ଟାଟା ଷ୍ଟିଲ୍ର ପରିଚାଳନା ନିର୍ଦ୍ଦେଶକ ତଥା କାର୍ଯ୍ୟନିର୍ବାହୀ ଅଧିକାରୀ ଟି.ଭି. ନରେନ୍ଦ୍ରନ କହିଛନ୍ତି, ୨୦୨୨ ସେପ୍ଟେମ୍ବରରେ ଟାଟା ଷ୍ଟିଲ୍ ବୋର୍ଡ ତା’ର ୬ ସହାୟକଙ୍କ କମ୍ପାନୀଙ୍କୁ ଟାଟା ଷ୍ଟିଲ ସହ ମିଶ୍ରଣ କରିବାକୁ ନିଷ୍ପତ୍ତି ନେଇଥିଲା। କାରଣ ଏ ସମ୍ପର୍କିତ ଏକ ପ୍ରସ୍ତାବକୁ ସେ ସମୟରେ ମଞ୍ଜୁରୀ ଦେଇଥିଲେ। ଏହାଦ୍ବାରା ସମସ୍ତ କମ୍ପାନୀଙ୍କ ମଧ୍ୟରେ ଉତ୍ତମ ତାଳମେଳ, କାର୍ଯ୍ୟଦକ୍ଷତା ଏବଂ ଖର୍ଚ୍ଚ କମ୍ ହେବ ବୋଲି ବୋର୍ଡ ପକ୍ଷରୁ କୁହାଯାଇଥିଲା। ସେହିଭଳି ଉପରୋକ୍ତ କମ୍ପାନୀଙ୍କ ମିଶ୍ରଣ ନେଇ ଏକ ପ୍ରଶ୍ନର ଉତ୍ତରରେ ଟି.ଭି.ନରେନ୍ଦ୍ରନ କହିଛନ୍ତି, ଆମେ ୬ କମ୍ପାନୀଙ୍କ ମିଶ୍ରଣ ନେଇ ଘୋଷଣା କରିସାରିଛୁ। ବିଶେଷ କରି ଟାଟା ଷ୍ଟିଲରେ ଅନୁଗୋଳ ଏନର୍ଜୀର ମିଶ୍ରଣ ନେଇ ନିକଟରେ ଘୋଷଣା କରାଯାଇଛି। ତେବେ ଉପରୋକ୍ତ ସମସ୍ତ କମ୍ପାନୀର ମିଶ୍ରଣ ନିୟାମକ ପ୍ରକ୍ରିୟା ଉପରେ ନିର୍ଭର କରୁଛି, ଯେଉଁଥିରେ ଏନ୍ସିଏଲ୍ଟିର ମଞ୍ଜୁରୀ ମଧ୍ୟ ସାମିଲ୍ ରହିଛି। ତେଣୁ ଉପରୋକ୍ତ କମ୍ପାନୀଗୁଡିକର ମିଶ୍ରଣ ଆସନ୍ତା ଆର୍ଥିକ ବର୍ଷରେ ସମାପ୍ତ ହେବା ନେଇ ଆକଳନ କରାଯାଉଛି ବୋଲି ନରେନ୍ଦ୍ରନ ମତପ୍ରକାଶ କରିଛନ୍ତି।