ମଧୁବନୀ, ୨୨।୭: ବିହାରର ମଧୁବନ ଜିଲାରୁ ଚକିତ କଲା ଭଳି ଏକ ଖବର ସାମ୍ନାକୁ ଆସିଛି। ଏଠାରେ ଜଣେ ବ୍ୟକ୍ତିଙ୍କ ଘର ମଧ୍ୟରୁ ୧୭ଟି ନାଗ ସାପ ଛୁଆ ଉଦ୍ଧାର କରାଯାଇଛି। ଏହି ସମୟରେ ସାପର ଅନେକ ଅଣ୍ଡା ମଧ୍ୟ ଉଦ୍ଧାର କରାଯାଇଛି। ଘଟଣାଟି ମଧୁବନୀ ଜିଲାର ଝାଞ୍ଜାରପୁର ବ୍ଲକର ହେଠିବାଲି ଗ୍ରାମରେ ଦେଖିବାକୁ ମିଳିଛି। ଏହି ଗ୍ରାମର ରାଜେନ୍ଦ୍ର ଯାଦବ ଘରେ ଗତ କିଛିଦିନ ହେବ ନିୟମିତ ଭାବେ ସାପ ବୁଲୁଥିବାର ଦେଖିବାକୁ ପାଇଥିଲେ। ଏହାପରେ ସେ ସାପର ବାସସ୍ଥାନ ସନ୍ଧାନରେ ଘର ଭିତରେ ଗୋଟିଏ ସ୍ଥାନରେ ଖୋଳିବା ଆରମ୍ଭ କରିଥିଲେ। ଶ୍ରମିକଙ୍କ ଦ୍ୱାରା ରାଜେନ୍ଦ୍ର ଘର ଖୋଳାଉଥିବା ସମୟରେ ୧୭ଟି ନାଗ ସାପ ଛୁଆ ଗୋଟିଏ ସ୍ଥାନରେ ଥିବାର ଦେଖିବାକୁ ପାଇଥିଲେ। ସେହିଭଳି କିଛି ଅଣ୍ଡାକୁ ମଧ୍ୟ ଉଦ୍ଧାର କରିଥିଲେ। ଏହି ଘଟଣା ପ୍ରଚାର ହୋଇଯିବା ପରେ ରାଜେନ୍ଦ୍ରଙ୍କ ଘରେ ସ୍ଥାନୀୟ ଅଞ୍ଚଳର ଲୋକଙ୍କ ପ୍ରବଳ ଭିଡ ଲାଗିଥିଲା। ଏହାରି ମଧ୍ୟରେ ଗ୍ରାମବାସୀମାନେ ସାପ ଛୁଆଗୁଡ଼ିକୁ ମାରି ଦେଇଥିବା ଜଣାପଡ଼ିଛି। ବିଶେଷଜ୍ଞଙ୍କ କହିବା ଅନୁଯାୟୀ, ଏହା ସାପମାନଙ୍କ ପ୍ରଜନନ ସମୟ। ବର୍ଷା ଯୋଗୁ ବିଲବାଡ଼ି ଜଳମଗ୍ନ ହୋଇଯିବା ଫଳରେ ସାପମାନେ ବାଧ୍ୟ ହୋଇ ଜନବସତି ମୁହଁା ହୋଇ ଘରେ ପ୍ରବେଶ କରୁଛନ୍ତି।