![](https://www.dharitri.com/wp-content/uploads/2023/03/Jakarta.jpg)
ଜାକର୍ତ୍ତା,୪ ।୩: ଇଣ୍ଡୋନେସିଆର ରାଜଧାନୀ ଜାକର୍ତ୍ତାର ଏକ ତେଲ ଭଣ୍ଡାର କେନ୍ଦ୍ରରେ ଭିଷଣ ଅଗ୍ନିକାଣ୍ଡ ହେବାରୁ ଅତିକମରେ ୧୬ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଏଥିରେ ଅନେକେ ଆହତ ହୋଇଛନ୍ତି । ମିଡିଆ ରିପୋର୍ଟ ଅନୁଯାୟୀ, ନିଆଁକୁ ଆୟତ୍ତ କରାଯାଇଛି । ଫୁଏଲ ଷ୍ଟୋରେଜ ଡିପୋ ସରକାରଙ୍କ କମ୍ପାନୀ ।
ରିପୋର୍ଟ ଅନୁଯାୟୀ, ଉତ୍ତର ଜାକର୍ତ୍ତାରେ ସରକାରୀ ଶକ୍ତି କମ୍ପାନୀ ପେର୍ତାମିନାର ତେଲ ଡିପୋରେ ଭୟଙ୍କର ଅଗ୍ନିକାଣ୍ଡ ଘଟିବା ପରେ ନିକଟରେ ଥିବା ଲୋକେ ଭୟଭୀତ ହୋଇ ଜୀବନ ବଞ୍ଚାଇବାକୁ ସେଠାରୁ ଚାଲିଯାଇଥିଲେ । ପ୍ରଶାସନ ପକ୍ଷରୁ ନିକଟରେ ଥିବା ଲୋକଙ୍କୁ ଖାଲି କରି ଦିଆଯାଇଥିଲା । ଉତ୍ତର ଜାକର୍ତ୍ତାର ଅଗ୍ନୀଶମ ବିଭାଗ କହିଛି, ଏହି ଅଗ୍ନିକାଣ୍ଡରେ ୨ ଶିଶୁଙ୍କ ସମେତ ୧୬ ଜଣଙ୍କ ମୃତ୍ୟୁ ହୋଇଛି । ଅତିକମରେ ୫ରୁ ଅଧିକ ଆହତ ହୋଇଛନ୍ତି । ଅଗ୍ନିଶମ ବିଭାଗର ମୁଖ୍ୟ ମିଡିଆକୁ କହିଛନ୍ତି, ନିଆଁ କବଳକୁ ଆସି କେତେଜଣ ଗୁରୁତର ଆହତ ହୋଇପଡିଛନ୍ତି । ସେମାନଙ୍କ ଶରୀରର କିଛି ଅଂଶ ପୋଡିଯାଇଛି । ସ୍ଥାନୀୟ ସମୟ ଅନୁସାରେ ରାତି ପ୍ରାୟ ୮ଟାରେ ଏହି ଅଗ୍ନିକାଣ୍ଡ ହୋଇଥିବା ବେଳେ ଏହାର କାରଣ ଏବେ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।