ଖୋର୍ଦ୍ଧା ଅଫିସ,୨୦ା୫: ଖୋର୍ଦ୍ଧା ପୌର ପରିଷଦରେ ପରିମଳ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଛି। ବର୍ଷା ନାହିଁ, କିନ୍ତୁ ନାଳନର୍ଦ୍ଦମା ପାଣି ରାସ୍ତା ଉପରେ ଭାସୁଛି। ଖୋର୍ଦ୍ଧା- ନୟାଗଡ ୫୭ ନମ୍ବର ଜାତୀୟ ରାଜପଥରେ ଏହି ଅବ୍ୟବସ୍ଥା ଦେଖିବାକୁ ମିଳିଛି। ଗତ ସପ୍ତାହ ହେଲାଣି ନର୍ଦ୍ଦମାପାଣି ରାସ୍ତାରେ ଭାସୁଛି। ରାସ୍ତାର ଉଭୟ ପାର୍ଶ୍ୱରେ ଦୋକାନ ଗୃହ ଥିବାବେଳେ ଦୈନିକ ଲୋକେ ନାଳ ଅପରିଷ୍କାର ପାଣି ଦେଇ ଯାତାୟାତ କରୁଛନ୍ତି। ଦୀର୍ଘଦିନ ଧରି ନାଳ ସଫା ହେଉ ନ ଥିବାରୁ ନିକଟରେ କାଳବୈଶାଖୀ ବର୍ଷାରେ ନାଳନର୍ଦ୍ଦମା ପାଣି ନିଷ୍କାସନ ହୋଇ ନ ପାରି ରାସ୍ତାରେ ଭାସୁଛି। ତେବେ ଏହା କେବଳ ଉକ୍ତ ରାସ୍ତା ନୁହଁ ବରଂ ସହରର ଏକାଧିକ ସାହି, ଗଳିରେ ସମାନ ଦୃଶ୍ୟ ରହିଛି।
ସହରରେ ଡ୍ରେନର ଆରମ୍ଭ ଏବଂ ଶେଷ କେଉଁଠି, ଏ ସମ୍ପର୍କରେ ପୌର ପ୍ରଶାସନ ନା ଡ୍ରେନେଜ ବିଭାଗ କାହା ପାଖରେ ମଧ୍ୟ ସୂଚନା ନାହିଁ। ସହରର ସମସ୍ତ ଡ୍ରେନ୍ ପ୍ରାୟ ପୋତି ହୋଇପଡିଲାଣି। ଅନେକ ଡ୍ରେନ ବର୍ଷ ବର୍ଷ ଧରି ସଫାକରାଯାଉ ନାହିଁ। ଫଳରେ ସହରରୁ ବାହାରୁଥିବା ଅଳିଆ ପଡି ପୋତି ହେଲାଣି। ଖ୍ରୀଷ୍ଟିଆନ ସାହି, ଚର୍ଚ୍ଚ, ମସଜିଦ୍, ପୂର୍ତ୍ତ ବଙ୍ଗଳା ସମ୍ମୁଖ ସମେତ ୨୨ଟି ଓ୍ବାର୍ଡର ଡ୍ରେନ ମୁକୁଳା ପଡିଛି। ସେହିପରି ଦୀପତଳ ଅନ୍ଧାର ଭଳି ପୌର ପ୍ରଶାସନର ଶହେ ମିଟର ପରିଧି ମଧ୍ୟରେ ରହିଥିବା କୌଣସି ଗୋଟିଏ ଡ୍ରେନରେ ସ୍ଲାବ୍ ପଡିନି। ଗୁରୁତ୍ୱପୂର୍ଣ୍ଣ ବିଷୟ ହେଉଛି ଅନେକ ସ୍ଥାନରେ ସ୍କୁଲ ନିକଟରେ ରହିଥିବା ଡ୍ରେନ ମଧ୍ୟ ମୁକୁଳା ପଡିଛି। ବର୍ଷ ବର୍ଷ ଧରି ଏହି ଡ୍ରେନ୍ଗୁଡିକ ମୁକୁଳା ପଡିଥିଲେ ମଧ୍ୟ ପୌର ପ୍ରଶାସନ ପକ୍ଷରୁ କୌଣସି ଗୁରୁତ୍ୱ ଦିଆଯାଉନାହିଁ। ବିଡିଏ କଲୋନୀର ସାମାଜିକ କର୍ମୀ ଶୋଭନ ଘୋଷ କୁହନ୍ତି, କଲୋନୀରେ ଅନେକ ଡ୍ରେନ ପୋତିହୋଇଗଲାଣି। ବର୍ଷା ହେଲେ ଅଳିଆ ପାଣି ରାସ୍ତାରେ ଭାସୁଛି। ମୁକୁଲା ଡ୍ରେନଗୁଡିକ ଭାଙ୍ଗିରୁଜି ଗଲାଣି। ଅନେକ ସ୍ଥାନରେ ଡ୍ରେନଗୁଡିକୁ ଜବରଦଖଲ କରାଯାଇ ଦୋକାନ ଘର ହେଉଛି। ଏଥିପ୍ରତି ପ୍ରଶାସନ ତୁରନ୍ତ ଦୃଷ୍ଟି ଦେଇ ତୁରନ୍ତ ସମାଧାନ କରିବା ଆବଶ୍ୟକ। ଏ ନେଇ ପୌର ପରିଷଦ ସାନିଟାଇଜ ଏକ୍ସପର୍ଟ ଦେବାଶିଷ ବରାଳ କୁହନ୍ତି, ଏକାଧିକ ନାଳ ଜବରଦଖଲରେ ରହିଛି। ଫଳରେ ନାଳ ସଫା କରିବାରେ ଅସୁବିଧା ହେଉଛି। ଅନ୍ୟପଟେ କଂଗ୍ରେସ ନେତା ଶିଶିର ପରିଡା କୁହନ୍ତି, ପରିମଳ ବ୍ୟବସ୍ଥା ଲାଗି କୋଟି କୋଟି ଟଙ୍କା ଅର୍ଥ ଆସୁଥିବା ବେଳେ କାମ ଠିକ୍ ଭାବେ ହେଉ ନାହିଁ। ନାଳ ସଫା ନ ହେବା ଯୋଗୁ ପୋତି ହୋଇଗଲାଣି। ସାମାନ୍ୟ ବର୍ଷା ହେଲେ ନର୍ଦ୍ଦମା ପାଣି ନିଷ୍କାସନ ହୋଇ ନ ପାରି ରାସ୍ତାରେ ଭାସୁଛି। ବର୍ଷାଦିନ ଆସିବା ପୂର୍ବରୁ ପ୍ରଶାସନ ଏଥିପ୍ରତି ଗୁରୁତ୍ୱ ଦେବା ଜରୁରୀ।