ଥିରୁଭାନନ୍ତପୁରମ୍,୨୬ା୮: ମଲିଉଡ୍ ନାମରେ ପରିଚିତ ମାଲାୟାଲମ୍ ଫିଲ୍ମ ଇଣ୍ଡଷ୍ଟ୍ରିରେ ଅଭିନେତ୍ରୀମାନଙ୍କୁ ଯୌନ ଶୋଷଣ କରାଯାଉଛି। ଅନେକ ବର୍ଷ ତଳୁ ଉଠିଥିବା ଏହି ପ୍ରସଙ୍ଗ ସମ୍ପ୍ରତି ହେମା କମିଟି ରିପୋର୍ଟ ପ୍ରକାଶ ପାଇବା ପରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। କେରଳ ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ୍ କେ. ହେମାଙ୍କ ଅଧ୍ୟକ୍ଷତାରେ ଗଠିତ କମିଟି ପ୍ରଘଟ କରିଛି ଯେ, ମହିଳା କଳାକାରମାନଙ୍କୁ ଇଣ୍ଡଷ୍ଟ୍ରିରେ ଲଗାତର ଭାବେ ଯୌନ ଶୋଷଣ କରିବା ପାଇଁ ଆପରାଧିକ ନେଟ୍ଓ୍ବର୍କ ଚାଲିଛି।
ଅଗଷ୍ଟ ୧୯ରେ ହେମା କମିଟି ରିପୋର୍ଟକୁ ସାର୍ବଜନୀନ କରାଯିବା ପରେ ୨ ଜଣ ହାଇପ୍ରୋଫାଇଲ ସିନେ ହେଭିଓ୍ବେଟ୍ ବିବାଦୀୟ ହୋଇ ନିଜ ପଦରୁ ଇସ୍ତଫା ଦେଇଛନ୍ତି। ବଙ୍ଗଳା ଅଭିନେତ୍ରୀ ଶ୍ରୀଲେଖା ମିତ୍ରଙ୍କ ଅଭିଯୋଗକୁ ନେଇ ଜଣାଶୁଣା ନିର୍ଦ୍ଦେଶକ ତଥା ପ୍ରଯୋଜକ ରଞ୍ଜିତ ବାଲାକ୍ରିଷ୍ଣନ୍ କେରଳ ରାଜ୍ୟ ଚଳଚ୍ଚିତ୍ର ଏକାଡେମୀ ଅଧ୍ୟକ୍ଷ ପଦରୁ ଇସ୍ତଫା ଦେଇଥିବାବେଳେ ସାଉଥ୍ ଆକ୍ଟ୍ରେସ୍ ରେବତୀ ସମ୍ପତଙ୍କ ଅଭିଯୋଗ କ୍ରମେ ବର୍ଷିଆନ ଅଭିନେତା ସିଦ୍ଦିକି ଆସୋସିଏଶନ୍ ଅଫ୍ ମାଲାୟାଲମ୍ ମୁଭି ଆର୍ଟିଷ୍ଟସ (ଏଏମ୍ଏମ୍ଏ) ସାଧାରଣ ସମ୍ପାଦକ ପଦ ଛାଡ଼ିଛନ୍ତି।
ଶ୍ରୀଲେଖାଙ୍କ ଅଭିଯୋଗ ହେଲା ୨୦୦୯ରେ ‘ପଲେରି ମାଣିକ୍ୟମ୍’ ଫିଲ୍ମରେ ଅଭିନୟ ପାଇଁ ସେ କେରଳକୁ ଯାଇ ଅଡିଶନ୍ ଦେଇଥିଲେ। ସେତେବେଳେ ଉକ୍ତ ସିନେମାର ନିର୍ଦ୍ଦେଶକ ରଞ୍ଜିତ ତାଙ୍କୁ ଯୌନ ଶୋଷଣ କରିଥିଲେ। ତେବେ ରଞ୍ଜିତ ଏହି ଅଭିଯୋଗକୁ ଖଣ୍ଡନ କରିଛନ୍ତି। ଗଣମାଧ୍ୟମକୁ ଏକ ଭଏସ୍ କ୍ଲିପ୍ ଜାରି କରି ରଞ୍ଜିତ କହିଛନ୍ତି, ସେ ଚଳଚ୍ଚିତ୍ର ଏକାଡେମୀ ଅଧ୍ୟକ୍ଷ ପଦରେ ରହିବା ଦିନଠାରୁ ତାଙ୍କୁ ହଟାଇବା ପାଇଁ ଷଡ଼ଯନ୍ତ୍ର ଚାଲିଥିଲା। ଶ୍ରୀଲେଖା ଆଣିଥିବା ଅଭିଯୋଗ ଏକ ନିର୍ଦ୍ଦିଷ୍ଟ ଗୋଷ୍ଠୀ ପକ୍ଷରୁ ଚାଲିଥିବା ଚକ୍ରାନ୍ତର ଏକ ଅଂଶବିଶେଷ। ତେବେ ସେ ନିଜକୁ ନିର୍ଦ୍ଦୋଷ ପ୍ରମାଣିତ କରିବେ। ଏଥିପାଇଁ ସଂସ୍କୃତି ମନ୍ତ୍ରୀ ସାଜି ଚେରିଆନ୍ଙ୍କ ନିକଟକୁ ନିଜ ଇସ୍ତଫାପତ୍ର ପଠାଇ ଦେଇଛନ୍ତି।
ପୂର୍ବରୁ ସିଦ୍ଦିକି ଏଏମ୍ଏମ୍ଏ ଅଧ୍ୟକ୍ଷ ମୋହନଲାଲଙ୍କ ନିକଟକୁ ନିଜ ଇସ୍ତଫାପତ୍ର ପଠାଇଥିଲେ। ସିଦ୍ଦିକି କହିଛନ୍ତି, ତାଙ୍କ ବିରୋଧରେ ଆଗତ ଅଭିଯୋଗ ଯୋଗୁ ସେ ପଦ ଛାଡ଼ିଛନ୍ତି। ଏହାର ଦିନକ ପୂର୍ବରୁ ରେବତୀ ଅଭିଯୋଗ ଆଣିଥିଲେ ଯେ, ୨୦୧୯ରେ ସିଦ୍ଦିକି ତାଙ୍କୁ ଯୌନ ଶୋଷଣ କରିଥିଲେ। ୨୦୧୬ରେ ରେବତୀଙ୍କୁ ୨୧ ବର୍ଷ ହୋଇଥିବାବେଳେ ସିଦ୍ଦିକି ଏକ ଫେକ୍ ସୋସିଆଲ ମିଡିଆ ଆକାଉଣ୍ଟ ଖୋଲି ଫିଲ୍ମ ଉପରେ ଆଲୋଚନା କରିବା ଆଳରେ ଯୋଗାଯୋଗ କରିଥିଲେ। ହୋଟେଲ ମାସ୍କଟକୁ ଡାକି ଘଣ୍ଟାଏ ଧରି ଯୌନ ଉତ୍ପୀଡ଼ନ କରିଥିଲେ। ସାଲିସ ନ କଲେ ଫିଲ୍ମରେ ସୁଯୋଗ ମିଳିବ ନାହିଁ ବୋଲି ସିଦ୍ଦିକି କହିଥିଲେ।
ଏଏମ୍ଏମ୍ଏ ସାଧାରଣ ସମ୍ପାଦକ ଥିବା ଏଡାଭେଲା ବାବୁଙ୍କ ବିରୋଧରେ ମଧ୍ୟ ଜଣେ ଜୁନିୟର ଆର୍ଟିଷ୍ଟ ଅନୁରୂପ ଅଭିଯୋଗ ଆଣିଥିଲେ। ୨ ମାସ ତଳେ ଏଡାଭେଲା ଇସ୍ତଫା ପରେ ସିଦ୍ଦିକିଙ୍କୁ ଏହି ପଦରେ ଅବସ୍ଥାପିତ କରାଯାଇଥିଲା। ତେବେ ହେମା କମିଟି ରିପୋର୍ଟ ପ୍ରକାଶ ପାଇବା ପରଠୁ ମାଲାୟାଲମ୍ ଫିଲ୍ମ ଇଣ୍ଡଷ୍ଟ୍ରିରେ ଯୌନ ଶୋଷଣର ଶିକାର ହୋଇଥିବା ଅନେକ ମହିଳା ଖୋଲାଖୋଲି ଅଭିଯୋଗ କରିବାରେ ଲାଗିଛନ୍ତି।