ବ୍ରହ୍ମପୁର ଅଫିସ,୨୦।୧: ବ୍ରହ୍ମପୁର ଟିପିଏସ୍ଓଡିଏଲ୍ ମୁଖ୍ୟ କାର୍ଯ୍ୟାଳୟରେ କାର୍ଯ୍ୟ କରୁଥିବା ଜଣେ ଆଉଟସୋର୍ସିଂ ମହିଳା କର୍ମଚାରୀଙ୍କୁ ଟାଟାପାୱାରର ଜଣେ ଅଧିକାରୀ ଅସଦାଚରଣ ସହ ଯୌନ ନିର୍ଯାତନା ଦେଉଥିବା ନେଇ ସଙ୍ଗିନ ଅଭିଯୋଗ ହୋଇଛି। ପୋଲିସ ଏହି ସଂକ୍ରାନ୍ତରେ ଏକ ମାମଲା ରୁଜୁ କରି ସମ୍ପୃକ୍ତ ଅଧିକାରୀଙ୍କୁ ଥାନାରେ ହାଜର ପାଇଁ ନୋଟିସ ଜାରି କରିଛି। ଏପରିକି ଧାରା ୧୬୧ରେ ପୂର୍ବରୁ ଥାନାରେ ପୀଡିତାଙ୍କ ବୟାନ ରେକର୍ଡ କରାଯାଇଛି। ସେହିପରି କୋର୍ଟରେ ମଧ୍ୟ ଧାରା ୧୬୪ ଅନୁସାରେ ପୀଡ଼ିତାଙ୍କ ବୟାନ ରେକର୍ଡ କରାଯାଇଛି। ତେବେ ମହିଳା ଜଣକ ଯେଉଁ ଆଉଟସୋର୍ସିଂ କମ୍ପାନୀ ମାଧ୍ୟମରେ ଟାଟା ପାୱାରରେ କାର୍ଯ୍ୟ କରୁଥିଲେ ଉକ୍ତ କମ୍ପାନୀ ମହିଳାଙ୍କୁ ଚାକିରିରୁ ନିଲମ୍ବିତ କରିଥିବା ଜଣାପଡିଛି।
ଅନ୍ୟପକ୍ଷେ ପୀଡିତାଙ୍କ ସହ ଟାଟା ପାୱାର(ଟିପିଏସ୍ଓଡିଏଲ୍)ର ଆଭ୍ୟନ୍ତରୀଣ କମିଟିର କିଛି ଅଧିକାରୀ ବସି ଆପୋସ ବୁଝାମଣା ପାଇଁ ଆଲୋଚନା କରିଛନ୍ତି। ଉକ୍ତ କମ୍ପାନୀ ମହିଳାଙ୍କୁ ଚାକିରିରୁ ବାହାର କରିବା ପରେ ତାଙ୍କୁ ବ୍ରହ୍ମପୁର ସହର ମଧ୍ୟରେ କେଉଁଠାରେ ଏକ ଚାକିରି ବ୍ୟବସ୍ଥା କରାଯିବ ବୋଲି ଟିପିଏସ୍ଓଡିଏଲ କର୍ତ୍ତୃପକ୍ଷ ପ୍ରସ୍ତାବ ଦେଇଥିବା ନେଇ ମହିଳା ଜଣକ ସୂଚନା ଦେଇଛନ୍ତି। ଟାଟା ପାୱାର ପକ୍ଷରୁ ଏକ ଟିମ୍ ଘଟଣାର ତଦନ୍ତ କରୁଥିବା ବେଳେ ପୀଡିତାଙ୍କ ଅଭିଯୋଗକୁ ଭିତ୍ତିକରି ପୋଲିସ ମଧ୍ୟ ତଦନ୍ତ ଜାରି ରଖିଛି। ଟିପିଏସ୍ଓଡିଏଲ୍ ପକ୍ଷରୁ କୁହାଯାଇଛି ଯେ, ମାମଲାକୁ ନେଇ ଆଭ୍ୟନ୍ତରୀଣ କମିଟି ଦ୍ୱାରା ତଦନ୍ତ ନିର୍ଦ୍ଦେଶ ଦିଆଯାଇଛି। ଟାଟାପାୱାରରେ ଏଭଳି କୌଣସି ଅସଦାଚରଣ ବା ଦୁର୍ବ୍ୟବହାରକୁ ବରଦାସ୍ତ କରାଯିବ ନାହିଁ ବୋଲି ରୋକଠୋକ୍ କୁହାଯାଇଛି। ପୋଲିସର ତଦନ୍ତରେ ଟାଟା ପାୱାର ପକ୍ଷରୁ ପୂର୍ଣ୍ଣ ସହଯୋଗ କରାଯିବ ବୋଲି ଟିପିଏସ୍ଓଡିଏଲ୍ କର୍ତ୍ତୃପକ୍ଷ ସ୍ପଷ୍ଟ କରିଛନ୍ତି।