କଟକ,୨।୮: ଚଳିତ ବର୍ଷ ଜୁଲାଇ ମାସରେ ଓଡ଼ିଶାରେ ଜିଏସ୍ଟି ସଂଗ୍ରହରେ ଉନ୍ନତି ପରିଲକ୍ଷିତ ହୋଇଛି। ଏହି ସମୟରେ ୭୯୪.୦୨ କୋଟି ଟଙ୍କାର ଜିଏସ୍ଟି ଆଦାୟ କରାଯାଇଛି। ଗତ ବର୍ଷ ଏହି ସମୟରେ ୭୦୨.୪୪ କୋଟି ଟଙ୍କାର ଜିଏସ୍ଟି ଆଦାୟ ହୋଇଥିଲା। ଚଳିତ ବର୍ଷ ଜୁଲାଇରେ ଜିଏସ୍ଟି ଆଦାୟର ଅଭିବୃଦ୍ଧି ହାର୧୩.୦୪% ରହିଛି। ଏପ୍ରିଲ,ମେ ଏବଂ ଜୁନ୍ ମାସରେ ଟିକସ ସଂଗ୍ରହ କମ୍ ରହିଥିଲା। ଏହି ତିନି ମାସରେ ଟିକସ ସଂଗ୍ରହ ଅଭିବୃଦ୍ଧି ଯଥାକ୍ରମେ (-) ୬୧.୧୫%, (-) ୨୫.୨୨% ଏବଂ ୫୦.୮୩% ରହିଥିଲା। କୋଭିଡ୍ କଟକଣା ଧୀରେ ଧୀରେ ହ୍ରାସ ଏବଂ ବଜାରରେ ସାମାନ୍ୟ ପରିବର୍ତ୍ତନ ଦେଖାଯାଇଥିବାରୁ ଟିକସ ସଂଗ୍ରହରେ ବର୍ତ୍ତମାନ ଉନ୍ନତି ଆସିଥିବା ରାଜ୍ୟ ବାଣିଜ୍ୟ କର ଏବଂ ଜିଏସ୍ଟି ଆୟୁକ୍ତଙ୍କ କାର୍ଯ୍ୟାଳୟ ପକ୍ଷରୁ ସୂଚନା ରହିଛି। ଏହି ସମୟ ମଧ୍ୟରେ ଖଣି କ୍ଷେତ୍ରରେ ମଧ୍ୟ ଉନ୍ନତି ଆସିଥିବା କୁହାଯାଇଛି। ରାଜ୍ୟର ପରୋକ୍ଷ ଟିକସଦାତାମାନେ ଧାର୍ଯ୍ୟ ସମୟ ମଧ୍ୟରେ ଟିକସ ପଇଠ କରିବାକୁ ପରାମର୍ଶ ଦିଆଯାଇଛି। ଉପଲବ୍ଧ ତଥ୍ୟ ଅନୁସାରେ ପ୍ରାକ୍ ଲକ୍ଡାଉନ ସମୟରେ ଇଓ୍ବେବିଲ୍ ବ୍ୟବହାର ତୁଳନାରେ ଜୁନ୍ ଶେଷ ସପ୍ତାହ ସୁଦ୍ଧା ଏଥିରେ ଉନ୍ନତି ପରିଲକ୍ଷିତ ହୋଇ ୮୧ରୁ ୮୩%ରହିଛି। ପେଟ୍ରୋଲିୟମ ସାମଗ୍ରୀରୁ ଜୁଲାଇ ମାସରେ ୫୨୧.୪୭ ଲକ୍ଷ କୋଟି ଟଙ୍କା ସଂଗ୍ରହ କରାଯାଇଛି। ଗତ ବର୍ଷ ତୁଳନାରେ ଏଥିରେ ୨.୫% ବୃଦ୍ଧି ଘଟିଛି। କୋଭିଡ୍ ଯୋଗୁ ଆସିଥିବା ଚ୍ୟାଲେଞ୍ଜ ଯୋଗୁ ଚଳିତ ଆର୍ଥତ୍କ ବର୍ଷର ପ୍ରଥମ ତ୍ରୈମାସରେ ମୋଟ ଟିକସ ସଂଗ୍ରହ ୭,୫୪୦ କୋଟି ଟଙ୍କା ରହିଛି। ଏଥିରେ ୨୮% ବିଯୁକ୍ତାତ୍ମକ ଦେଖାଯାଇଛି। ୨୦୨୦ ଜୁଲାଇ ପର୍ଯ୍ୟନ୍ତ ପୌନଃପୁନିକ ରାଜ୍ୟ ଜିଏସ୍ଟି ସଂଗ୍ରହ ୨୩୪୫ କୋଟି ଟଙ୍କା ରହିଛି। ଏଥିରେ ୨୨% ଅଭିବୃଦ୍ଧି ପରିଲକ୍ଷିତ ହୋଇଛି। ରାଜ୍ୟ ବାଣିଜ୍ୟକର ଏବଂ ସାମଗ୍ରୀ ଓ ସେବା ଟିକସ ଆୟୁକ୍ତ ସୁଶୀଲ କୁମାର ଲୋହାନୀ ଟିକସ ସଂଗ୍ରହ ଧାରାକୁ ଉନ୍ନତ କରିବା ଲାଗି ବିଭାଗୀୟ ଅଧିକାରୀଙ୍କୁ ପରାମର୍ଶ ଦେଇଛନ୍ତି।