ବମ୍ବେ: ହୃଦୟ ଜିତିଲେ ଧକ୍ ଧକ୍ ଗର୍ଲ। ଅଭିନେତ୍ରୀ ଶଗୁଫ୍ତା ଅଲୀଙ୍କ ଅସମୟ ସମୟରେ ସହାୟତାର ହାତ ବଢ଼ାଇଛନ୍ତି ମାଧୁରୀ ଦିକ୍ଷୀତ। ଟେଲିଭିଜନର ଲୋକପ୍ରିୟ ରିଆଲିଟି ଶୋ’ ଡ୍ୟାନ୍ସ ଦିଓ୍ବାନେର ସେଟ୍ରେ ପହଞ୍ଚିଥିଲେ ଶଗୁଫ୍ତା। ଏଠାରେ ତାଙ୍କୁ ପୁରା ଟିମ୍ ତରଫରୁ ମାଧୁରୀ ପାଞ୍ଚ ଲକ୍ଷ ଟଙ୍କାର ଚେକ୍ ପ୍ରଦାନ କରିଥିଲେ। ଏହି ମୁହୁର୍ତ୍ତଟି ଅନେକଙ୍କୁ ଭାବବିହ୍ବଳ କରିଥିବା ଦେଖାଯାଇଛି।
ଡ୍ୟାନ୍ସ ଦିଓ୍ବାନେର ଆଗାମୀ ଏପିସୋଡ୍ରେ ଅଭିନେତ୍ରୀ ଶଗୁଫ୍ତା ପହଞ୍ଚିଛନ୍ତି। ସେଠାରେ ସେ ଦୀର୍ଘ ଚାରି ବର୍ଷ ଧରି କରି ଆସୁଥିବା ସଂଘର୍ଷ ବିଷୟରେ କହିଛନ୍ତି। ଅଭିନୟର ସୁଯୋଗ କମ୍ ହୋଇଯିବା କାରଣରୁ ଆୟ କମିଥିଲା। ଫଳରେ ସେ ନିଜର ଜମା ପୁଞ୍ଚି ଖର୍ଚ୍ଚ କରିବାକୁ ବାଧ୍ୟ ହୋଇଥିଲା। ପରବର୍ତ୍ତୀ ସମୟରେ ସେ ସବୁକିଛି ଠିକ୍ ହୋଇଯିବ ବୋଲି ଭାବିଥିଲେ। ହେଲେ ଓଲଟା ହୋଇଥିଲା। ଲକ୍ଡାଉନ ଯୋଗୁ ପରିସ୍ଥିତି ଅଧିକ ବିଗିଡ଼ିଥିଲା। ଏବେ ସେ ସ୍ବାସ୍ଥ୍ୟଗତ ସମସ୍ୟାରେ ପୀଡ଼ିତ ଥିବା ବେଳେ ବଞ୍ଚିବା ପାଇଁ ସଂଘର୍ଷ କରୁଥିବା ସଗୁଫ୍ତା କହିଥିଲେ।
ଶଗୁଫ୍ତାଙ୍କ କଥା ଶୁଣି ଶୋ’ର ପ୍ରତିଯୋଗୀ, ଜଜ୍ମାନେ ଭାବବିହ୍ବଳ ହୋଇଯାଇଥିଲେ। ମାଧୁରୀ ଷ୍ଟେଜ୍ ଉପରକୁ ଆସି ଅଭିନେତ୍ରୀଙ୍କୁ ସାନ୍ତ୍ୱନା ଦେଇଥିଲେ। ଏହାପରେ ସହାୟତା ରାଶି ପ୍ରଦାନ କରିଥିଲେ। ଶେଷରେ ଶଗୁଫ୍ତା ସମସ୍ତଙ୍କୁ ଧନ୍ୟବାଦ ଜଣାଇଥିଲେ।
