ଜମ୍ମୁ,୨୫।୧୦: ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ୩ ଦିନିଆ ଜମ୍ମୁ କଶ୍ମୀର ଗସ୍ତରେ ଅଛନ୍ତି। ଏହି ସମୟରେ ତାଙ୍କୁ ସ୍ଥାନୀୟ ଲୋକଙ୍କ ନିକଟତର ହେଉଥିବା ଦେଖିବାକୁ ମିଳିଥିଲା। ଶାହା ତାଙ୍କର ତିନି ଦିନିଆ ଗସ୍ତର ଦ୍ୱିତୀୟ ଦିନରେ ସେ ଆରଏସପୁରା ସେକ୍ଟରରେ ଭାରତ-ପାକିସ୍ତାନ ସୀମାକୁ ମଧ୍ୟ ଯାଇଥିଲେ। ଜମ୍ମୁ ନିକଟସ୍ଥ ମକୱାଲରେ ସେ ବିଏସଏଫ ପୋଷ୍ଟକୁ ଯାଇ ସୈନିକମାନଙ୍କ ସହ କଥାବାର୍ତ୍ତା କରିଥିଲେ ଏବଂ ଏଠାରେ ସ୍ଥାନୀୟ ଲୋକଙ୍କ ସହ ମଧ୍ୟ ସମୟ ବିତାଇଥିଲେ।
ମକୱାଲରେ ସ୍ବରାଷ୍ଟ୍ର ମନ୍ତ୍ରୀ ସ୍ଥାନୀୟ ନାଗରିକଙ୍କ ଫୋନ ନମ୍ବରକୁ ମୋବାଇଲରେ ସେଭ କରିଥିଲେ। କେବଳ ଏତିକି ନୁହେଁ, ଗୃହମନ୍ତ୍ରୀ ମଧ୍ୟ ତାଙ୍କୁ ତାଙ୍କ ନମ୍ବର ଦେଇଛନ୍ତି ଏବଂ ଯେତେବେଳେ ସେ ଆବଶ୍ୟକ ଅନୁଭବ କରିବେ ସେ କଲ କରିପାରିବେ ବୋଲି କହିଥିଲେ। ଅମିତ ଶାହା ମଧ୍ୟ ଏହି ଲୋକମାନଙ୍କ ସହିତ ଚା’ ପିଇଥିଲେ ଏବଂ ଦୀର୍ଘ ସମୟ ଧରି ଖଟ ଉପରେ ବସିଥିବା ସମୟରେ ଲୋକଙ୍କ ସହ ଅତି ସାଧାରଣ ଭାବେ କଥାବାର୍ତ୍ତା କରୁଥିଲେ।
ଏହାପୂର୍ବରୁ ଜମ୍ମୁର ଭଗବତୀ ନାଗରରେ ଏକ ସାଧାରଣ ସଭାରେ ସମ୍ବୋଧିତ କରି ଶାହା କହିଛନ୍ତି, ଜମ୍ମୁ କଶ୍ମୀରରୁ ଆତଙ୍କବାଦକୁ ହଟାଇବା ଏବଂ ସାଧାରଣ ନାଗରିକଙ୍କ ହତ୍ୟା ବନ୍ଦ କରିବାକୁ ସରକାର ଲକ୍ଷ୍ୟ ରଖିଛନ୍ତି। ଜମ୍ମୁ କଶ୍ମୀରରେ ୧୨,୦୦୦ କୋଟି ଟଙ୍କା ବିନିଯୋଗ ହୋଇସାରିଛି ଏବଂ ୨୦୨୨ ଶେଷ ସୁଦ୍ଧା ମୋଟ ପୁଞ୍ଜି ବିନିଯୋଗକୁ ୫୧,୦୦୦ କୋଟିରେ ପହଞ୍ଚାଇବାକୁ ସରକାର ଲକ୍ଷ୍ୟ ରଖିଥିବା ସେ କହିଛନ୍ତି।