ଅହମଦାବାଦ,୨।୭ : କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ରବିବାର କହିଛନ୍ତି ସାବରମତି ‘ରିଭର ଫ୍ରଣ୍ଟ’ ଅହମଦାବାଦରେ ସାମାଜିକ ତଥା ସାଂସ୍କୃତିକ କାର୍ଯ୍ୟକଳାପର କେନ୍ଦ୍ର ପାଲଟିଛି। ଏହି ଅବସରରେ ଶାହା ନଦୀରେ ‘ଅକ୍ଷର ରିଭର କ୍ରୁଜ’କୁ ଡିଜିଟାଲ ଭାବେ ଉଦଘାଟନ କରିଥିଲେ।
ଭିଡିଓ କନଫରେନ୍ସ ଜରିଆରେ ଶାହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପ୍ରଶଂସା କରିଥିଲେ। ସେ କହିଥିଲେ ଯେତେବେଳେ ମୋଦି ଗୁଜୁରାଟର ମୁଖ୍ୟମନ୍ତ୍ରୀ ଥିଲେ ସେତେବେଳେ ସେ ଏଭଳି ଅନେକ ପଦକ୍ଷେପ ନେଇଥିଲେ ଯାହା ରାଜ୍ୟରେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି କରିବାରେ ସହାୟକ ହୋଇଥିଲା।
ଶାହା କହିଛନ୍ତି ଯେତେବେଳେ ସେ ୧୯୭୮ ରେ ଅହମଦାବାଦରେ ବସବାସ କରିଥିଲେ, ସେତେବେଳେ ସେ ସାବରମତି ନଦୀ ଦେଖିବାକୁ କେବେ ଯାଉ ନ ଥିଲେ। କାରଣ ସେତେବେଳେ ନଦୀରେ କେବଳ ମଇଳା ପାଣି ଥିଲା। କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ କହିଛନ୍ତି ତତ୍କାଳୀନ ମୁଖ୍ୟମନ୍ତ୍ରୀ ମୋଦି ପ୍ରଥମ ଥର ପାଇଁ ‘ରିଭର ଫ୍ରଣ୍ଟ’କୁ ଭିଜୁଆଲ କରିଥିଲେ। ଏଥିପାଇଁ ଏକ ଯୋଜନା ପ୍ରସ୍ତୁତ କରାଯାଇଥିଲା ଏବଂ ଯେତେବେଳେ ସେ ମୁଖ୍ୟମନ୍ତ୍ରୀ ଥିଲେ ସେତେବେଳେ ଏହାର ନିର୍ମାଣ ମଧ୍ୟ କରାଯାଇଥିଲା। ‘ରିଭର ଫ୍ରଣ୍ଟ’ କେବଳ ଅହମଦାବାଦରେ ନୁହେଁ ଭାରତ ତଥା ବିଦେଶରେ ମଧ୍ୟ ଜଣାଶୁଣା ଏବଂ ପର୍ଯ୍ୟଟନର କେନ୍ଦ୍ର ପାଲଟିଛି।
ଏହା ବିଭିନ୍ନ କାର୍ଯ୍ୟକଳାପର କେନ୍ଦ୍ର ପାଲଟିଛି ବୋଲି ସେ କହିଛନ୍ତି। ଲୋକମାନେ ସକାଳ ଏବଂ ସନ୍ଧ୍ୟାରେ ଏଥିରେ ବୁଲନ୍ତି, ପିଲା ଏବଂ ଯୁବକମାନେ ଖେଳନ୍ତି। ଆଜି ସାବରମତି ରିଭର ଫ୍ରଣ୍ଟ ଅହମଦାବାଦର ସାମାଜିକ ତଥା ସାଂସ୍କୃତିକ କାର୍ଯ୍ୟକଳାପର କେନ୍ଦ୍ର ପାଲଟିଛି। ଶାହା କହିଛନ୍ତି ଅକ୍ଷର ନଦୀ କ୍ରୁଜ ସହର ପାଇଁ ଏକ ନୂତନ ଆକର୍ଷଣ ହେବ।
ଦୁଇଟି ଇଞ୍ଜିନ ସହିତ ୩୦ ମିଟର ଲମ୍ବା ‘ବିଳାସପୂର୍ଣ୍ଣ କ୍ରୁଜ’ ଦୁଇ ଘଣ୍ଟା ଯାତ୍ରା ସହିତ ପର୍ଯ୍ୟଟନକୁ ପ୍ରୋତ୍ସାହିତ କରିବାରେ ସହାୟକ ହେବ ବୋଲି ସେ କହିଛନ୍ତି। ଏଥିରେ ସଙ୍ଗୀତ କାର୍ଯ୍ୟକ୍ରମ, ଖାଦ୍ୟ ଇତ୍ୟାଦି ପାଇଁ ମଧ୍ୟ ସୁବିଧା ରହିବ। ଲୋକଙ୍କ ସୁରକ୍ଷାକୁ ଦୃଷ୍ଟିରେ ରଖି ଏହି କ୍ରୁଜରେ ୧୮୦ ଲାଇଫ ଜ୍ୟାକେଟ, ଅଗ୍ନି ନିର୍ବାପକ ବ୍ୟବସ୍ଥା ଏବଂ ଜରୁରୀକାଳୀନ ଉଦ୍ଧାର ଡଙ୍ଗା ରହିଛି।