ମୁମ୍ବାଇ: କିଙ୍ଗ୍ ଖାନ୍ ଶାହାରୁଖ ଏବଂ ଅଭିନେତ୍ରୀ କାଜଲଙ୍କ ଯୋଡ଼ି ଫିଲ୍ମ ପରଦାରେ ସୁପରହିଟ୍ ହୋଇଥାଏ। କିନ୍ତୁ ବାସ୍ତବ ଜୀବନରେ କିଙ୍ଗ୍ ଖାନ୍ଙ୍କ ସ୍ତ୍ରୀ ଗୌରୀଙ୍କ ପ୍ରେମ କାହାଣୀ ଫିଲ୍ମଠାରୁ ବି ଅଧିକ। ଉଭୟଙ୍କ ବିବାହକୁ ୩୨ ବର୍ଷ ହୋଇଥିଲେ ମଧ୍ୟ ଦୁହିଁଙ୍କ ମଧ୍ୟରେ ଆଜି ବି ରୋମାନ୍ସ ଫିକା ପଡ଼ିନି। ନିକଟରେ ଗୌରୀ କରଣ ଜୋହରଙ୍କ ଶୋ’ ‘କଫି ଓ୍ବିଥ୍ କରଣ-୭’ରେ ସ୍ବତନ୍ତ୍ର ଅତିଥି ଭାବରେ ପହଞ୍ଚିଥିଲେ। ଯେଉଁଠାରେ ସେ ତାଙ୍କ ବ୍ୟକ୍ତିଗତ ଜୀବନ ଏବଂ ତାଙ୍କ ପ୍ରେମକାହାଣୀ ବିଷୟରେ କହିଥିଲେ।
କରଣ ଜୋହର ନିକଟରେ ତାଙ୍କ ଇନ୍ଷ୍ଟାଗ୍ରାମରେ ତାଙ୍କର ଆଗାମୀ ଏପିସୋଡ୍ର ଏକ ପ୍ରୋମୋ ଶେୟାର କରିଛନ୍ତି। ରାପିଡ୍ ରାଉଣ୍ଡରେ କରଣ ଗୌରୀଙ୍କୁ ତାଙ୍କ ପ୍ରେମ କାହାଣୀକୁ କେଉଁ ଫିଲ୍ମ ସହ ତୁଳନା କରିବେ ବୋଲି ପଚାରିଥିଲେ। କରଣଙ୍କ ଏହି ପ୍ରଶ୍ନ ଶୁଣିବା ପରେ ଗୌରୀ କାଳବିଳମ୍ବ ନକରି ଉତ୍ତର ଦେଇ କହିଥିଲେ ଯେ, ମୁଁ ଭାବୁଛି ‘ଦିଲ୍ ଓ୍ବାଲେ ଦୁଲ୍ହାନିଆ ଲେ ଯାୟେଙ୍ଗେ’। ଏହା ସହିତ ଗୌରୀ ଏହା ମଧ୍ୟ କହିଛନ୍ତି ଯେ, ଏହି ଫିଲ୍ମଟି ତାଙ୍କର ବହୁତ ପ୍ରିୟ।
ଶାହାରୁଖ ଏବଂ ଗୌରୀ ପରସ୍ପରକୁ ୬ ବର୍ଷ ଧରି ଡେଟ୍ କରିଥିଲେ। ଦୁହେଁ ଦିଲ୍ଲୀର ବାସିନ୍ଦା। ଉଭୟଙ୍କ ବିବାହ ଅକ୍ଟୋବର ୧୯୯୧ରେ ହୋଇଥିଲା। ଉଭୟଙ୍କର ତିନୋଟି ସନ୍ତାନ ଅଛନ୍ତି। ଜ୍ୟେଷ୍ଠପୁତ୍ର ଆର୍ୟନ, ଝିଅ ସୁହାନା ଏବଂ ତୃତୀୟ ପୁତ୍ର ସନ୍ତାନକୁ ସେ ସରୋଗେସି ମାଧ୍ୟମରେ ଆଣିଥିଲେ।