ଇସ୍ଲାମାବାଦ୍,୧୧।୪: ପାକିସ୍ତାନରେ ଲାଗିରହିଥିବା ରାଜନୈତିକ ସଙ୍କଟର ଅବସାନ ଘଟିଛି। ନ୍ୟାଶନାଲ ଆସେମ୍ଲିରେ ଅନାସ୍ଥା ଭୋଟରେ ହାରିବା ପରେ ପ୍ରଧାନମନ୍ତ୍ରୀ ଇମ୍ରାନ ଖାନ୍ ନିଜ ପଦରୁ ଇସ୍ତଫା ଦେବା ସହ ଗୃହତ୍ୟାଗ କରିଛନ୍ତି। ଇମ୍ରାନଙ୍କ ସମେତ ତାଙ୍କ ସାଥୀ ସଦସ୍ୟ ମଧ୍ୟ ସଂସଦରୁ ଇସ୍ତଫା ଦେବା ସହ ପ୍ରଧାନମନ୍ତ୍ରୀ ନିର୍ବାଚନକୁ ବହିଷ୍କାର କରିଛନ୍ତି। ଇତିମଧ୍ୟରେ ଦେଶର ନୂତନ ପ୍ରଧାନମନ୍ତ୍ରୀ ଚୟନ କରାଯାଇଛି। ପାକିସ୍ତାନରେ ବର୍ତ୍ତମାନଠାରୁ ଶେହଓ୍ବାଜ ସରକାରଙ୍କ ଯୁଗ ଆରମ୍ଭ ହେବାକୁ ଯାଉଛି। ସୋମବାର ରାତି ୮ଟାରେ ପୂର୍ବତନ ପ୍ରଧାନମନ୍ତ୍ରୀ ନଓ୍ବାଜ ଶରିଫ୍ଙ୍କ ସାନ ଭାଇ ତଥା ପିଏମ୍ଏଲ୍-ଏନ୍ ଅଧ୍ୟକ୍ଷ ୭୦ ବର୍ଷୀୟ ଶେହଓ୍ବାଜ ଶରିଫ ପ୍ରଧାନମନ୍ତ୍ରୀ ଭାବେ ଶପଥ ନେବେ। ଶେହଓ୍ବାଜ ହେଉଛନ୍ତି ପାକିସ୍ତାନର ୨୩ତମ ପ୍ରଧାନମନ୍ତ୍ରୀ। ଅନ୍ୟପଟେ ପ୍ରଧାନମନ୍ତ୍ରୀ ଭାବେ ନିର୍ବାଚିତ ହେବା ପରେ ଶେହଓ୍ବାଜ ଆସେମ୍ଲିକୁ ସମ୍ବୋଧିତ କରିଛନ୍ତି। ସେ କହିଛନ୍ତି, ପାକିସ୍ତାନରେ ପ୍ରଥମ ଥର ପାଇଁ ଅନାସ୍ଥା ଭୋଟ ଯୋଗୁ ସରକାର ଭାଙ୍ଗିଛି। ଯଦି ଆମେ ଅଗ୍ରଗତି କରିବାକୁ ଚାହୁଁ, ତେବେ ଡେଡ୍ଲକ୍ ପରିବର୍ତ୍ତେ ଡାଇଲଗ୍ ଉପରେ ଧ୍ୟାନ ଦେବା ଉଚିତ୍। ଏତଦ୍ବ୍ୟତୀତ ଯଦି ବିଦେଶୀ ଷଡ଼ଯନ୍ତ୍ର ମାମଲାରେ ତାଙ୍କର କୌଣସି ପ୍ରକାରର ଯୋଗଦାନ ଥିବା ପ୍ରମାଣ ମିଳେ ତେବେ ସେ ଆଲ୍ଲାଙ୍କୁ ସାକ୍ଷୀ ରଖି ଏହି ପଦରୁ ଇସ୍ତଫା ଦେବେ ବୋଲି ଶେହଓ୍ବାଜ କହିଛନ୍ତି।
