ଇସଲାମାବାଦ,୧୧।୪: ପାକିସ୍ତାନ ନ୍ୟାଶନାଲ ଆସେମ୍ବ୍ଲିରେ ଶେହଓ୍ବାଜ ଶରିଫ୍ଙ୍କୁ ପ୍ରଧାନମନ୍ତ୍ରୀ ନିର୍ବାଚିତ ହେବା ପରେ ବାଚସ୍ପତି ଆୟାଜ୍ ସାଦିକ୍ ଭୁଲ୍ରେ ପୂର୍ବତନ ପ୍ରଧାନମନ୍ତ୍ରୀ ନଓ୍ବାଜ ଶରିଫ୍ଙ୍କ ନାଁ ନେଇଥିଲେ। ପରେ ବାଚସ୍ପତି ଏଥିପାଇଁ ଭୁଲ୍ ମାଗିବା ସହ ପିଏମ୍ଏଲ୍-ଏନ୍ ସୁପ୍ରିମୋଙ୍କ ନାଁ ସର୍ବଦା ତାଙ୍କ ମନ ଏବଂ ହୃଦୟରେ ଅଛି ବୋଲି କହିଥିଲେ। ପିଏମ୍ଏଲ୍-ଏନ୍ ସଦସ୍ୟ ଏବଂ ଦଳ ଉପାଧ୍ୟକ୍ଷା ମରିୟମ୍ ନଓ୍ବାଜ୍ ପାର୍ଲାମେଣ୍ଟରେ ନଓ୍ବାଜ୍ ଶରିଫ୍ଙ୍କ ଛବି ଦେଖାଇ ଶେହବାଜ୍ଙ୍କୁ ସମର୍ଥନ କରିଥିଲେ। ସୂଚନାଯୋଗ୍ୟ, ସୋମବାର ପାକିସ୍ତାନ ନ୍ୟାଶନାଲ ଆସେମ୍ବ୍ଲିରେ ଭୋଟିଂ ପ୍ରକ୍ରିୟା ଆରମ୍ଭ ହେବା ସମୟରେ ଇମ୍ରାନ ଖାନଙ୍କ ଦଳର ସମସ୍ତ ସଦସ୍ୟ ଗୃହକୁ ବହିଷ୍କାର କରିବା ସହ ସଦସ୍ୟ ପଦରୁ ଇସ୍ତଫା ଦେଇଥିଲେ। ଏଥିସହ ଉପବାଚସ୍ପତି ମଧ୍ୟ ଇସ୍ତଫା ଘୋଷଣା କରି ଗୃହରୁ ବାହାରକୁ ପଳାଇଯାଇଥିଲେ। ଏହି ସମୟରେ ପିଏମ୍ଏଲ୍-ଏନ୍ର ବରିଷ୍ଠ ଏମ୍ପି ଅୟାଜ ସାଦିକ ଉକ୍ତ ପଦ ସମ୍ଭାଳିଥିଲେ। ଏହାପରେ ସେ ନୂତନ ପ୍ରଧାନମନ୍ତ୍ରୀ ନିଯୁକ୍ତି ପାଇଁ ଶେହଓ୍ବାଜଙ୍କ ନାମ ଘୋଷଣା କରିବା ପରିବର୍ତ୍ତେ ନଓ୍ବାଜ ଶରିଫଙ୍କ ନାଁ ଘୋଷଣା କରିପକାଇଥିଲେ। ଯାହାକୁ ଶୁଣି ସଂସଦରେ ଉପସ୍ଥିତ ଥିବା ସମସ୍ତ ସଦସ୍ୟ ହସିବାକୁ ଲାଗିଥିଲେ। ଏହାପରେ ଆୟାଜ୍ ସାଦିକ୍ ନିଜ ଭୁଲ୍ ବୁଝିପାରି କ୍ଷମାପ୍ରାର୍ଥନା କରିଥିଲେ।