ଇସଲାମାବାଦ,୮।୨ : ଭୟଙ୍କର ଭୂକମ୍ପ ଯୋଗୁଁ ଘଟିଥିବା ବିନାଶର ମୁକାବିଲା କରୁଥିବାରୁ ତୁର୍କୀ ସରକାର ପାକିସ୍ତାନୀ ପ୍ରଧାନମନ୍ତ୍ରୀଙ୍କ ତୁର୍କୀ ଗସ୍ତକୁ ବାତିଲ କରିଦେଇଛନ୍ତି। ପାକିସ୍ତାନର ପ୍ରଧାନମନ୍ତ୍ରୀ ଶାହବାଜ ସରିଫ ବୁଧବାର ତୁର୍କୀ ଗସ୍ତ କରିବାର କାର୍ଯ୍ୟକ୍ରମ ଥିଲା। କିନ୍ତୁ ତୁର୍କୀ ସରକାର ଭୂକମ୍ପ ଉଦ୍ଧାର କାର୍ଯ୍ୟରେ ବ୍ୟସ୍ତ ଥିବା ଦର୍ଶାଇ ପାକିସ୍ତାନୀ ପ୍ରଧାନମନ୍ତ୍ରୀଙ୍କ ଗସ୍ତକୁ ବାତିଲ କରିଛନ୍ତି। ପାକିସ୍ତାନର ବୈଦେଶିକ ମନ୍ତ୍ରଣାଳୟ ମଧ୍ୟ ଏହା ନିଶ୍ଚିତ କରିଛନ୍ତି।
ପାକିସ୍ତାନର ପ୍ରଧାନମନ୍ତ୍ରୀ ଶାହବାଜ ସରିଫ ଏବଂ ବୈଦେଶିକ ମନ୍ତ୍ରୀ ବିଲାୱାଲ ଭୁଟ୍ଟୋ ତୁର୍କୀ ସହ ସହାନୁଭୂତି ଦେଖାଇବାକୁ ଯାଉଥିଲେ। ପାକିସ୍ତାନର ସୂଚନା ମନ୍ତ୍ରୀ ମରିୟମ ଔରଙ୍ଗଜେବ କହିଥିଲେ ଯେ ପ୍ରଧାନମନ୍ତ୍ରୀ ବୁଧବାର ତୁର୍କୀ ଗସ୍ତ କରିବେ। ଏହି କାରଣରୁ ଗୁରୁବାର ପାକିସ୍ତାନରେ ଆୟୋଜିତ ହେବାକୁ ଥିବା ସମସ୍ତ ଦଳର ସର୍ବଦଳୀୟ ବୈଠକ ମଧ୍ୟ ବାତିଲ କରାଯାଇଥିଲା। ସମସ୍ତ ପକ୍ଷଙ୍କ ସହ ଆଲୋଚନା ପରେ ବୈ ଠକର ନୂତନ ତାରିଖ ଘୋଷଣା କରାଯିବ ବୋଲି କୁହାଯାଇଥିଲା।
ତେବେ, ଯେଉଁ ସମୟରେ ପାକିସ୍ତାନ ଏକ ଗୁରୁତର ଅଥନୈତିକ ସଙ୍କଟ ଦେଇ ଗତି କରୁଛି, ସେତେବେଳେ ପାକିସ୍ତାନୀ ପ୍ରଧାନମନ୍ତ୍ରୀଙ୍କ ବିଦେଶ ଗସ୍ତକୁ ନେଇ ସମାଲୋଚନା କରାଯାଇଥିଲା। ପାକିସ୍ତାନ ସେନାର ମିଡିଆ ୱିଙ୍ଗ କହିଥିଲା ଯେ ପାକିସ୍ତାନ ସରକାର ତୁର୍କୀକୁ ଚିକିତ୍ସା ସାମଗ୍ରୀ, ମେଡିକାଲ ସ୍କ୍ବାଡ, ସର୍ଚ୍ଚ ଏବଂ ଉଦ୍ଧାରକାରୀ ଦଳ ପଠାଇଛନ୍ତି। ଏହା ବ୍ୟତୀତ ତୁର୍କୀକୁ ଏକ ଯାତ୍ରୀବାହୀ ବିମାନ ମଧ୍ୟ ପଠାଯାଇଛି ଯାହାଫଳରେ ଭୂକମ୍ପରେ ପୀଡିତଙ୍କୁ ତୁରନ୍ତ ଡାକ୍ତରଖାନା ନିଆଯାଇପାରିବ।
