କରାଚୀ,୧।୩ : ଜନ୍ମଦିନ ଅବସରରେ ଶୁଭେଚ୍ଛା ଜଣାଇଥିବା ଫ୍ୟାନ ଓ ସାଥି ଖେଳାଳିଙ୍କୁ ଧନ୍ୟବାଦ୍ ଦେବାକୁ ଯାଇ ବିବାଦରେ ଘେରି ହୋଇଯାଇଛନ୍ତି ପୂର୍ବତନ ପାକିସ୍ତାନ କ୍ରିକେଟର ଶାହିଦ ଆଫ୍ରିଦୀ। ”ଜନ୍ମଦିନରେ ଦେଇଥିବା ଭଲପାଇବା ପାଇଁ ଧନ୍ୟବାଦ୍। ଆଜି ମୁଁ ୪୪ ବର୍ଷରେ ପାଦ ଦେଇଛି। ମୋ ପରିବାର ଓ ପ୍ରଶଂସକମାନେ ମୋର ସବୁଠୁ ମୂଲ୍ୟବାନ ସମ୍ପତ୍ତି “ ବୋଲି ଟୁଇଟ୍ କରିଥିଲେ ଆଫ୍ରିଦୀ।
ଏହି କ୍ରିକେଟରଙ୍କ ବୟସକୁ ନେଇ କ୍ରିକେଟ ମହଲରେ ପୂର୍ବରୁ ଖୁବ୍ ଆଲୋଚନା ହୋଇଛି। ସେ ସୋମବାର ସ୍ପଷ୍ଟ କରିଛନ୍ତି ଯେ, ତାଙ୍କୁ ଏବେ ୪୪। କିନ୍ତୁ ଅଫ୍ରିଦୀଙ୍କୁ ବର୍ତ୍ତମାନ ୪୧ ବର୍ଷ ହୋଇଥିବା ଆଇସିସି ରେକଡର୍ସରେ ଦର୍ଶାଯାଇଛି। ଆଫ୍ରିଦୀଙ୍କ ଟୁଇଟ୍କୁ ନେଇ ପ୍ରଶ୍ନ ଉଠାଇଛନ୍ତି ପାକିସ୍ତାନ ଜର୍ନାଲିଷ୍ଟ ଡାନିଏଲ ରସୁଲ। ଇଏସ୍ପିଏନ୍ କ୍ରିକ୍ଇନ୍ଫୋରେ ଆଫ୍ରିଦୀଙ୍କ ବୟସ ୪୧ ଦେଖାଉଥିବାବେଳେ ତାଙ୍କ ଆତ୍ମଜୀବନିରେ ୪୬ ବୋଲି ଉଲ୍ଲେଖ ରହିଛି। ଆଉ ତାଙ୍କୁ ଏବେ ୪୪ ବର୍ଷ ବୋଲି ନିଜେ ଟୁଇଟ୍ କରିଛନ୍ତି। ଏହାର ଅର୍ଥ ଶ୍ରୀଲଙ୍କା ବିପକ୍ଷରେ ୩୭ ବଲରେ ଶତକ ହାସଲ କରିବା ସମୟରେ ତାଙ୍କୁ ୧୬ ନୁହେଁ ୨୦ ବର୍ଷ ହୋଇଥିଲା। ଉଲ୍ଲେଖଥାଉ କି, ସର୍ବକନିଷ୍ଠ ଖେଳାଳି ଭାବେ ଅନ୍ତର୍ଜାତୀୟ କ୍ରିକେଟରେ ଶତକ ହାସଲ କରିବାର ରେକର୍ଡ ଆଫ୍ରିଦୀଙ୍କ ନାମରେ ରହିଛି।