ମୁମ୍ବାଇ: ‘ତେରୀ ବାତୋ ମେଁ ଐସା ଉଲ୍ଝା ଜିଆ’ ପରେ ବଲିଉଡ୍ ଅଭିନେତା ଶାହିଦ୍ କପୁରଙ୍କୁ ଫିଲ୍ମ ‘ଦେବା’ରେ ଦେଖିବାକୁ ମିଳିବ। ‘ଜି ଷ୍ଟୁଡିଓଜ୍’ ଓ ‘ରଏ କପୁର ଫିଲ୍ମସ୍’ ପକ୍ଷରୁ ନିର୍ମିତ ହୋଇଥିବା ଏହି ଫିଲ୍ମରେ ରୋଶନ୍ ଆଣ୍ଡ୍ୟୁଜ୍ ନିର୍ଦ୍ଦେଶନା ଦେଉଥିବା ବେଳେ ସିଦ୍ଧାର୍ଥ ରଏ କପୁର ଏହି ଫିଲ୍ମର ପ୍ରଯୋଜକ ରହିଛନ୍ତି। ଫିଲ୍ମ ନିର୍ମାତାଙ୍କ ପକ୍ଷରୁ ଶୁକ୍ରବାର ‘ଦେବା’ର ରିଲିଜ୍ ତାରିଖ ସହ ଫିଲ୍ମରେ ଶାହିଦ କପୁରଙ୍କ ଲୁକ୍ ଉପରୁ ପରଦା ଉଠାଯାଇଛି।
ସୋସିଆଲ ମିଡିଆ ପ୍ଲାଟ୍ଫର୍ମ ଇନ୍ଷ୍ଟାଗ୍ରାମରେ ‘ଜି ଷ୍ଟୁଡିଓଜ୍’ ଓ ‘ରଏ କପୁର ଫିଲ୍ମସ୍’ ପକ୍ଷରୁ ‘ଦେବା’ରେ ଶାହିଦ୍ଙ୍କ ପ୍ରଥମ ଲୁକ୍କୁ ଶେୟାର କରାଯାଇଛି। ସେହିପରି ଆସନ୍ତା ବର୍ଷ ଫେବୃୟାରୀ ୧୪ରେ ଏହି ଫିଲ୍ମ ରିଲିଜ୍ ହେବାକୁ ଯାଉଥିବା ନେଇ ଉକ୍ତ ପୋଷ୍ଟରେ ସୂଚନା ଦିଆଯାଇଛି। ଫିଲ୍ମ ନିର୍ମାତାଙ୍କ ପକ୍ଷରୁ କରାଯାଇଥିବା ଏହି ପୋଷ୍ଟକୁ ଶାହିଦ୍ ରି-ପୋଷ୍ଟ କରିଛନ୍ତି। ଏହି ଫଟୋରେ ଶାହିଦ୍ ବନ୍ଧୁକ ଧରି ବୁଲେଟ୍ ପ୍ରୁଫ୍ ଜ୍ୟାକେଟ୍ ପିନ୍ଧିଥିବା ନଜର ଆସିଛନ୍ତି। ଫିଲ୍ମରେ ଜଣେ ପୋଲିସ ଅଧିକାରୀଙ୍କ ଭୂମିକାରେ ଶାହିଦ ଅଭିନୟ କରୁଥିବା ନେଇ ଏହି ଲୁକ୍ରୁ ସ୍ପଷ୍ଟ ଜଣାପଡ଼ୁଛି। ଶାହିଦଙ୍କ ଏହି ଲୁକ୍କୁ ତାଙ୍କ ପ୍ରଶଂସକମାନେ କମେଣ୍ଟ ମାଧ୍ୟମରେ ବେଶ୍ ପ୍ରଶଂସା କରିଛନ୍ତି।
ଏକ ଥ୍ରୀଲର, ଡ୍ରାମା ଏବଂ ଆକ୍ସନ୍ ଭିତ୍ତିକ ଚଳଚ୍ଚିତ୍ର ହୋଇଥିବାବେଳେ ଏଥିରେ ଶାହିଦ୍ଙ୍କ ବିପକ୍ଷରେ ଅଭିନେତ୍ରୀ ପୂଜା ହେଗ୍ଡେ ନଜର ଆସିବେ। ଫିଲ୍ମରେ ପୂଜା ଜଣେ ସାମ୍ବାଦିକାଙ୍କ ଚରିତ୍ରରେ ଅଭିନୟ କରୁଛନ୍ତି।