ଦୁବାଇ, ୧।୧୦: ଚଳିତ ଆଇପିଏଲ୍ର ଦ୍ୱାଦଶ ମୁକାବିଲାରେ ବୁଧବାର କୋଲକାତା ନାଇଟ୍ ରାଇଡର୍ସ (କେକେଆର୍) ୩୭ ରନରେ ରାଜସ୍ଥାନ ରୟାଲ୍ସକୁ ପରାସ୍ତ କରିଛି। ସ୍ଥାନୀୟ ଦୁବାଇ ଇଣ୍ଟରନ୍ୟାଶନାଲ କ୍ରିକେଟ୍ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍ରେ ଟସ୍ ହାରି ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା କେକେଆର୍ ୬ ଉଇକେଟ୍ରେ ୧୭୪ ରନ କରିଥିଲା। ଜବାବରେ ରାଜସ୍ଥାନ ୧୩୭/୯ ସ୍କୋରରେ ଅଟକି ଯାଇଥିଲା। ଏହି ମ୍ୟାଚ୍ ଅବସରରେ କେକେଆର୍ ମାଲିକ ତଥା ବଲିଉଡ୍ ବାଦ୍ଶାହ ଶାହରୁଖ ଖାନଙ୍କୁ ଷ୍ଟାଡିୟମରେ ଉପସ୍ଥିତ ଥିବାର ଦେଖିବାକୁ ମିଳିଥିଲା। ଖେଳାଳିଙ୍କୁ ଉତ୍ସାହିତ କରିବା ଲାଗି ଶାହରୁଖ ପରିବାର ସହ ଷ୍ଟାଡିୟମରେ ଉପସ୍ଥିତ ରହିଥିଲେ। ଫଳରେ ବହୁତ ଦିନ ପରେ କେକେଆର୍ ପ୍ରଶଂସକ ଟିଭିରେ ଶାହରୁଖଙ୍କୁ ଦେଖିବାର ସୁଯୋଗ ପାଇଥିଲେ। ଶାହରୁଖଙ୍କ ସହ ସ୍ତ୍ରୀ ଗୌରୀ ଖାନ ଓ ପୁଅ ଆର୍ଯ୍ୟନ ମଧ୍ୟ ଷ୍ଟାଡିୟମରେ ଉପସ୍ଥିତ ଥିଲେ। କୋଲକାତା ନାଇଟ୍ ରାଇଡର୍ସ ଲୋଗୋ ଥିବା ଏକ ମାସ୍କ ଶାହରୁଖ ପିନ୍ଧିଥିବାର ଦେଖିବାକୁ ମିଳିଥିଲା। ବିଜୟ ପରେ ଦଳର ଯୁବ ଖେଳାଳିଙ୍କ ପ୍ରଦର୍ଶନକୁ ନେଇ ଶାହରୁଖ ବେଶ୍ ପ୍ରଶଂସା କରିଥିଲେ।
