ନୂଆଦିଲ୍ଲୀ,୨୨।୧୧: ଚଳିତ ସୟଦ ମୁସ୍ତାକ ଅଲି ଟି୨୦ ଟୁର୍ନାମେଣ୍ଟର ଟ୍ରଫି ହାତେଇଛି ତାମିଲନାଡୁ। ସୋମବାର ଅରୁଣ ଜେଟଲି ଷ୍ଟାଡିୟମରେ ଖେଳାଯାଇଥିବା ରୋମାଞ୍ଚକ ଫାଇନାଲରେ ତାମିଲନାଡୁ ୪ ଉଇକେଟରେ କର୍ନାଟକକୁ ହରାଇ ଦେଇଛି। ବିଜୟ ପାଇଁ ୧୫୨ ରନ୍ର ଟାର୍ଗେଟ ପିଛା କରୁଥିବା ତାମିଲନାଡୁ ଏକଦା ବିଜୟ ଆଶା ଛାଡ଼ି ସାରିଥିଲା। କିନ୍ତୁ ଶାହରୁଖ ଖାନ ଅନ୍ତିମ ବଲରେ ଛକା ଲଗାଇ କର୍ନାଟକ ହାତରୁ ମ୍ୟାଚ୍ ଛଡ଼ାଇ ଆଣିଥିଲେ।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା କର୍ନାଟକର ଟପ୍ ଅର୍ଡର ପୂରା ଫେଲ୍ ମାରିଥିଲା। କିନ୍ତୁ ମଧ୍ୟ କ୍ରମରେ ଅଭିନବ ମନୋହର (୪୬ ରନ୍, ୪ ଚୌକା ଓ ୨ ଛକା) ଓ ପ୍ରବୀଣ ଦୁବେ (୩୩ ରନ୍, ୩ ଚୌକା ୧ ଛକା)ଙ୍କ ଯୋଗୁ ଦଳ ୨୦ ଓଭରରେ ୭ ଉଇକେଟ ହରାଇ ୧୫୧ ରନ୍ କରିଥିଲା। ୧୫୨ ରନ୍ର ପିଛା କରୁଥିବା ତାମିଲନାଡୁ ପାଇଁ ବିଜୟ ପଥ ମୁସ୍କିଲ କରି ଦେଇଥିଲେ କର୍ନାଟକର ବୋଲର ଓ ଫିଲ୍ଡର। ଓପନର ହରି ନିଶାନ୍ଥ (୨୩ ରନ୍, ୧ ଚୌକା ଓ ୨ ଛକା) ଆଉଟ୍ ହେବା ପରେ ତାମିଲନାଡୁ ବ୍ୟାଟରଙ୍କ ପାଇଁ ଚୌକା, ଛକା ଲଗାଇବା କଷ୍ଟକର ହୋଇପଡ଼ିଥିଲା। କ୍ରିଜ୍ରେ ଦକ୍ଷ ଓପନର ଏନ୍ ଜଗଦୀସାନ (୪୧) ଓ ଅଧିନାୟକ ବିଜୟ ଶଙ୍କର (୨୨) ଥିବା ସତ୍ତ୍ୱେ ଦଳ ୪ରୁ ୧୨ ଓଭର ମଧ୍ୟରେ ଗୋଟିଏ ହେଲେ ଚୌକା କିମ୍ବା ଛକା ମାରିପାରି ନ ଥିଲେ। ୧୬ତମ ଓଭରରେ ଦୁହେଁ ଛକା ମାରିବା ଉଦ୍ୟମ କରି କେ ସି କରିଆପ୍ପାଙ୍କ ବଲରେ କ୍ୟାଚ୍ ଆଉଟ୍ ହୋଇଥିଲା। ଫଳରେ ସବୁ କିଛି ନିର୍ଭର କରୁଥିଲା ଶାହରୁଖଙ୍କ ଉପରେ। ସେ ଅନ୍ତିମ ବଲରେ ଛକା ଲଗାଇ ତାମିଲନାଡକୁ ଦେଇଥିଲେ ରେକର୍ଡ ତୃତୀୟ ସୟଦ ମୁସ୍ତାକ ଅଲି ଟି୨୦ ଟ୍ରଫି। ସେ ୧୫ ବଲରେ ୩୩ ରନ୍ କରି ଅପରାଜିତ ଥିଲେ। ତାଙ୍କ ଇନିଂସରେ ୧ ଚୌକା ଓ ୩ ଛକା ସାମିଲ ଥିଲା।