ନିଶ୍ଚିନ୍ତକୋଇଲି ,୧୫।୧୦(ଅଶୋକ କୁମାର ମହାପାତ୍ର)ଆଜିର ସମାଜରେ ଉଚ୍ଚ ଶିକ୍ଷତ ଯୁବତୀଯୁବକମାନେ ଚାକିରି ପଛରେ ଗୋଡ଼ାଇଛନ୍ତି। ଚାକିରି ନପାଇ ବେକାର ହୋଇ ଘରେ ହାତବାନ୍ଧି ବସୁଛନ୍ତି। ଏପରିସ୍ଥଳେ ନିଶ୍ଚିନ୍ତକୋଇଲି ବ୍ଲକରେ ଜଣେ ମାଛ ଚାଷୀ ବେକାର ଯୁବତୀ, ଯୁବକ ପାଇଁ ପ୍ରେରଣାର ଉତ୍ସ ପାଲଟିଛନ୍ତି। ସେ ଏବେ ବାର୍ଷିକ ଲକ୍ଷାଧିକ ଟଙ୍କା ରୋଜଗାର କରୁଛନ୍ତି। ସେ ହେଲେ ଏହି ବ୍ଲକ ଅନ୍ତର୍ଗତ କଟିକଟା ମିରା ସାହିର ଶ୍ୟାମସୁନ୍ଦର ନାୟକ(୪୫) । ସେ ଜଣେ ସ୍ବଳ୍ପ ଶିକ୍ଷିତ ବ୍ୟକ୍ତି । ପୂର୍ବରୁ ତାଙ୍କ ଆର୍ଥତ୍କ ଅବସ୍ଥା ସେତେ ସ୍ବଚ୍ଛଳ ନ ଥିଲା। ସ୍ତ୍ରୀ, ଗୋଟିଏ ପୁଅ,ଝିଅକୁ ନେଇ ତାଙ୍କ ତେଲ ଲୁଣର ସଂସାର। ସ୍ଥାନୀୟ ଅସୁରେଶ୍ୱର ପଞ୍ଚାୟତ ଅନ୍ତର୍ଗତ ଦୀକ୍ଷିତପଡାର ଉପେନ୍ଦ୍ର ସିଂଙ୍କ ପ୍ରେରଣାରେ ପ୍ରାୟ ୧୦ ବର୍ଷତଳେ ସେ ମାଛ ଚାଷ ଆରମ୍ଭ କରିଥିଲେ। ଏଥିପାଇଁ ସେ ସ୍ତ୍ରୀଙ୍କ ଗହଣାକୁ ବିକ୍ରି କରି ୧ ଲକ୍ଷ ଟଙ୍କା ପୁଞ୍ଜି ବିନିଯୋଗ କରିଥିଲେ। ମାଛ ଚାଷ କରିବା ପାଇଁ ତାଙ୍କର କୌଣସି ନିଜସ୍ବ ପୋଖରୀ ନ ଥିବାରୁ ସେ ସ୍ଥାନୀୟ ବନମାଳିପୁର, ସୁକରପଡା, ନଟରା, ଜିଗ୍ନିପୁର, ମାତକତପୁର ଆଦି ଗ୍ରାମରେ ସରକାରୀ ଓ ବେସରକାରୀ ପୋଖରୀକୁ ନିଲାମସୂତ୍ରରେ ନେଇ ଉନ୍ନତ ବୈଜ୍ଞାନିକ ପ୍ରଣାଳୀରେ ମାଛ ଓ ଯାଆଁଳ ଚାଷ କରିଥିଲେ। ଏଥିରେ ହେଉଥିବା ଆୟରେ ଶ୍ୟାମସୁନ୍ଦର ଦୈନନ୍ଦିନ ୧୫ଟି ପରିବାରକୁ ଅନ୍ନ ଯୋଗାଉଥିଲାବେଳେ ନିଜ ପରିବାରକୁ ସରସ ସୁନ୍ଦର କରିବା ସହ ଆର୍ଥତ୍କ ମେରୁଦଣ୍ଡକୁ ସୁଦୃଢ଼ କରିପାରିଛନ୍ତି। ଏପରିକି ତାଙ୍କ ଉଚ୍ଚ ଶିକ୍ଷିତ ପୁଅ ମଧ୍ୟ ଏଦିଗରେ ପୂର୍ଣ୍ଣ ସହଯୋଗର ହାତ ବଢ଼ାଉଥିବା ଶ୍ୟାମସୁନ୍ଦର କହିଛନ୍ତି। ଶ୍ୟାମସୁନ୍ଦର ନିଶ୍ଚିନ୍ତକୋଇଲି ବ୍ଲକ ଅଞ୍ଚଳର ବିଭିନ୍ନ ସ୍ଥାନରେ ମାଛ ଓ ଯାଆଁଳ ଚାଷକରି ଭଲ ରୋଜଗାର କରୁଥିବା କହିଛନ୍ତି। ସରକାରଙ୍କ ତରଫରୁ ଏଦିଗରେ ତାଙ୍କୁ ସରକାରୀ ପ୍ରୋତ୍ସାହନ ଯୋଗାଇ ଦିଆଗଲେ ସେ ଅଧିକରୁ ଅଧିକ ମାଛ ଚାଷ କରିପାରନ୍ତେ ବୋଲି ମତବ୍ୟକ୍ତ କରିଛନ୍ତି।