ମୁମ୍ବାଇ: ବଡ଼ ପରଦାରେ ପାଦ ଦେବେ ଆଉ ଜଣେ ନବାଗତା। ସେ ହେଉଛନ୍ତି ବଲିଉଡ୍ ଅଭିନେତା ସଞ୍ଜୟ କପୁରଙ୍କ ଝିଅ ଶନୟା କପୁର। ଶନୟା ସୋସିଆଲ ମିଡିଆରେ ବେଶ୍ ପପୁଲାର ଷ୍ଟାର କିଡ୍ ଭାବେ ଚର୍ଚ୍ଚାରେ ରହି ଆସୁଛନ୍ତି। ବିଗତ ଦିନରେ ଶନୟା ବଲିଉଡ୍ରେ ଡେବ୍ୟୁ କରିବାକୁ ଯାଉଛନ୍ତି ବୋଲି ଚର୍ଚ୍ଚା ଜୋର୍ ଧରିଥିଲା। ତେବେ ଝିଅ ଫିଲ୍ମରେ ଡେବ୍ୟୁ ନେଇ ହେଉଥିବା ଚର୍ଚ୍ଚା ଉପରେ ବାପା ସଞ୍ଜୟ କପୁର ପୂର୍ଣ୍ଣଚ୍ଛେଦ ପକାଇଛନ୍ତି। ସେ ସ୍ପଷ୍ଟ କରିଛନ୍ତି ଯେ, ତାଙ୍କ ଝିଅ ଅତିଶୀଘ୍ର ବଲିଉଡ୍ରେ ଡେବ୍ୟୁ କରିବେ। ଏକ ଇଣ୍ଟରଭ୍ୟୁରେ ସଞ୍ଜୟ କହିଛନ୍ତି, କରୋନା ମହାମାରୀ ପାଇଁ ଶନୟା ଡେବ୍ୟୁ କରିବାରେ ବିଳମ୍ବ ହେଉଛି। କିନ୍ତୁ ଆମେ ଆଶା ରଖୁଛୁ ଯେ, ସବୁକିଛି ଜଲ୍ଦି ଠିକ୍ ହୋଇଯିବ। ବଲିଉଡ୍ରେ ଶନୟାଙ୍କର ଡେବ୍ୟୁ କରିବା ତାଙ୍କ ଫ୍ୟାନ୍ମାନଙ୍କ ପାଇଁ ଏକ ବଡ଼ ଖବର। କେବେଠାରୁ ସେମାନେ ତାଙ୍କୁ ବଡ଼ ପରଦାରେ ଦେଖିବା ପାଇଁ ଅପେକ୍ଷା କରି ରହିଛନ୍ତି। ଫିଲ୍ମ ପରଦାକୁ ଆସି ନ ଥିଲେ ମଧ୍ୟ ବଡ଼ବାପାଙ୍କ ଝିଅ ତଥା ବଡ଼ ଭଉଣୀ ଜାହ୍ନବୀ କପୁରଙ୍କ ଅଭିନୀତ ଫିଲ୍ମ ‘ଗୁଞ୍ଜନ ସକ୍ସେନା’: ଦ କାର୍ଗିଲ ଗାର୍ଲ’ରେ ସେ ଆସିଷ୍ଟାଣ୍ଟ ଡାଇରେକ୍ଟର ଭାବରେ କାର୍ଯ୍ୟ କରିଥିଲେ। ଏବେ କେବଳ ଦେଖିବାକୁ ବାକି ରହିଲା ସୋସିଆଲ ମିଡିଆରେ ନିଜ ଷ୍ଟାଇଲ ଓ ଲୁକ୍ ପାଇଁ ଲୋକପ୍ରିୟ ଥିବା ଶନୟାଙ୍କୁ ସିଲଭର୍ ସ୍କ୍ରିନରେ ଫ୍ୟାନ୍ମାନେ କିପରି ଗ୍ରହଣ କରୁଛନ୍ତି।