ନୂଆଦିଲ୍ଲୀ,୨୪।୧୨: ଭାରତ ବିପକ୍ଷ ଚାରି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମୁକାବିଲାକୁ ୮ ଉଇକେଟରେ ଜିତି ନେଇଛି ଅଷ୍ଟ୍ରେଲିଆ। ଦୁଇ ଟିମ୍ ମଧ୍ୟରେ ଦ୍ୱିତୀୟ ମ୍ୟାଚ୍ ଡିସେମ୍ବର ୨୬ରେ ଖେଳାଯିବ। ମ୍ୟାଚ୍ ପୂର୍ବରୁ ବାକ୍ବିତଣ୍ଡା ଜାରି ରହିଛି। ଏହି କ୍ରମରେ ଅଷ୍ଟ୍ରେଲିଆର ମହାନ ସ୍ପିନର ଶେନ୍ ଓ୍ବାର୍ନ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଆଡିଲେଡ୍ରେ ଲଜ୍ଜାଜନକ ପରାଜୟ ପରେ ଭାରତୀୟ ଟିମ୍ ଏବେ ବି ଚାପରେ ରହିଛି। ଏଣୁ ଅଷ୍ଟ୍ରେଲିଆ ଦଳ ବକ୍ସିଂ ଡେ ଟେଷ୍ଟରେ ଧଜ୍ଜିଆ ଉଡାଇଦେବ ବୋଲି ସେ କହିଛନ୍ତି। ଅପରପକ୍ଷେ ପୂର୍ବ ଓପନର୍ ଗୌତମ ଗମ୍ଭୀର ଆଡିଲେଡ୍ ପୂର୍ବ ଦୁଇ ମ୍ୟାଚ୍ରେ ଦବ୍ଦବା ଥିବା କଥା ଭାରତୀୟ ଟିମ୍ ନଭୁଲୁ ବୋଲି କହିଛନ୍ତି।
ଓ୍ବାର୍ନ ‘ଫକ୍ସ କ୍ରିକେଟ୍’କୁ କହିଛନ୍ତି, ମୋତେ ଲାଗୁଛି ଅଷ୍ଟ୍ରେଲିଆ ଟିମ୍ ତାଙ୍କର ଅବସ୍ଥା ଖରାପ କରିଦେବ। ଭାରତ ପାଖରେ କେ.ଏଲ୍ଙ୍କ ଭଳି ଭଲ ଖେଳାଳି ଅଛନ୍ତି। ଶୁଭମନ ଗିଲ, ଅଜିଙ୍କ୍ୟ ରାହାଣେ,ଚେତେଶ୍ୱର ପୂଜାରା ମଧ୍ୟ ରହିବେ। ସେମାନେ କ’ଣ କରିପାରିବେ ତାହା ଜଣା। ମେଲବର୍ନ ପିଚ୍ ଶାମିଙ୍କ ପାଇଁ ଭଲ ଥିଲା। ହେଲେ ସେ ଖେଳିପାରିବେ ନାହିଁ। ଏଣୁ ଭାରତୀୟ ବ୍ୟାଟ୍ସମ୍ୟାନ୍ଙ୍କୁ ଦୋଷ ନ ଦେଇ ଅଷ୍ଟ୍ରେଲିଆ ବୋଲରଙ୍କ ପ୍ରଶଂସା କରାଯିବା ଉଚିତ। ସେମାନେ ବେଶ୍ ଭଲ ପ୍ରଦର୍ଶନ କରିଛନ୍ତି। ୪ ବୋଲର ଭଲ ବୋଲିଂ କରିଛନ୍ତି। କମିନ୍ସ, ହେଜଲଉଡ୍, ଷ୍ଟାର୍କ ଏବଂ ଲିୟୋନ ଭଲ ପ୍ରଦର୍ଶନ ଜାରି ରଖିଛନ୍ତି। ଯଦି ସେମାନେ ଏହିଭଳି ପାଞ୍ଚ ବର୍ଷ ଖେଳନ୍ତତି ତେବେ ଏହା ଅଷ୍ଟ୍ରେଲିଆ ପାଇଁ ସର୍ବଶ୍ରେଷ୍ଠ ବୋଲିଂ ଆକ୍ରମଣ ହେବ ବୋଲି ସେ କହିଛନ୍ତି।
