ଚେନ୍ନାଇ ସୁପର୍ କିଙ୍ଗସ ଷ୍ଟାର୍ ଅଲରାଉଣ୍ଡର ଶେନ ୱାଟସନ ସମସ୍ତ ପ୍ରକାରର କ୍ରିକେଟରୁ ଅବସର ଘୋଷଣା କରିଛନ୍ତି। କିଙ୍ଗସ ଇଲେଭେନ ପଞ୍ଜାବ ବିପକ୍ଷ ମ୍ୟାଚ ପରେ ୩୯ ବର୍ଷୀୟ ୱାଟସନ ସିଏସକେର ସାଥି ଖେଳାଳିଙ୍କୁ ଭାବବିହ୍ବଳ ହୋଇ ନିଜ ଅବସର ନେଇ ସୂଚନା ଦେଇଥିଲେ। ଫ୍ରାଞ୍ଚାଇଜି ପକ୍ଷରୁ ଖେଳିବା ତାଙ୍କ ପାଇଁ ବଡ ସମ୍ମାନର କଥା ଥିଲା। ତେବେ ଅବସର ନେଇଥିଲେ ହେଁ ୱାଟସନ ସିଏସକେର ସପୋର୍ଟ ଷ୍ଟାଫ ଭାବେ କାମ କରିପାରନ୍ତି। ୨୦୧୮ରେ ଚେନ୍ନାଇ ସୁପର୍ କିଙ୍ଗ୍ସ ପାଇଁ ଖେଳିବାକୁ ଚୁକ୍ତିବଦ୍ଧ ହେବା ମାତ୍ରେ ସେ ଅନ୍ତର୍ଜାତୀୟ କ୍ରିକେଟ୍ରୁ ଅବସର ନେଇଥିଲେ। ଅନ୍ତର୍ଜାତୀୟ କ୍ରିକେଟରୁ ସନ୍ନ୍ୟାସ ନେଇ ସାରିଥିବା ଅଷ୍ଟ୍ରେଲିଆର ଏହି ଓପନିଂ ବ୍ୟାଟ୍ସମ୍ୟାନଙ୍କୁ ସିଏସକେ ୨୦୧୮ରେ କିଣିଥିଲା। ୨୦୧୮ ଆଇପିଏଲ ସଂସ୍କରଣର ଫାଇନାଲରେ ୱାଟସନଙ୍କ ଆକର୍ଷଣୀୟ ଶତକ ବଳରେ ଚେନ୍ନାଇ ତୃତୀୟଥର ଲାଗି ଚାମ୍ପିୟନ ହୋଇଥିଲା। ୱାଟସନ ଆଇପିଏଲ୍ରେ ମୋଟ ୧୪୫ ମ୍ୟାଚ ଖେଳିଥିଲେ ମଧ୍ୟ ସିଏସ୍କେ ପାଇଁ ୪୩ ମ୍ୟାଚ୍ରେ ପ୍ରତିନିଧିତ୍ୱ କରିଥିଲେ। ପୂର୍ବରୁ ରାଜସ୍ଥାନ ରୟାଲ୍ସ ଏବଂ ରୟାଲ ଚାଲେଞ୍ଜର୍ସ ବେଙ୍ଗାଲୁରୁ ପାଇଁ ଅବଶିଷ୍ଟ ମ୍ୟାଚ ଖେଳିଥିଲେ। ଅଷ୍ଟ୍ରେଲିଆ ପାଇଁ ସେ ୫୯ ଟେଷ୍ଟ, ୧୯୦ ଦିନିକିଆ ଓ ୫୮ ଟି-୨୦ ମ୍ୟାଚ୍ ଖେଳିଥିଲେ।