ବେଜିଂ,୧୧।୪: ଚାଇନା ବର୍ତ୍ତମାନ ଜିରୋ କୋଭିଡ ପଲିସି ଅନୁସରଣ କରୁଛି। ଚାଇନାର ସବୁଠୁ ବଡ଼ ସହର ସଂଘାଇରେ କୋଭିଡ ସଂକ୍ରମଣ ମାମଲାକୁ ଦୃଷ୍ଟିରେ ରଖି ଚାଇନାର କମ୍ୟୁନିଷ୍ଟ ପାର୍ଟି ସରକାର ସମଗ୍ର ସହରରେ କଡ଼ା ଲକ୍ଡାଉନ ଲାଗୁ କରିଛନ୍ତି। ଇତିମଧ୍ୟରେ କଡ଼ା ଲକ୍ଡାଉନ ଯୋଗୁ ଲୋକମାନେ କ୍ରୋଧିତ ହୋଇ ନିଜ ଆପାର୍ଟମେଣ୍ଟରେ ଚିତ୍କାର କରୁଥିବାର ଶୁଣିବାକୁ ମିଳିଛି। ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଯେଉଁଥିରେ ଲୋକମାନେ ସ୍ଥାନୀୟ ଅଧିକାରୀଙ୍କ ସହ ଝଗଡ଼ା କରୁଥିବାର ଉକ୍ତ ଭିଡ଼ିଓରେ ଦେଖିବାକୁ ମିଳିଛି। ସୂଚନାଯୋଗ୍ୟ, କରୋନା ସଂକ୍ରମଣକୁ ରୋକିବା ପାଇଁ ଏପ୍ରିଲ ୫ରୁ ସଂଘାଇରେ ଚାଇନା ସରକାର ସମ୍ପୂର୍ଣ୍ଣ ଲକ୍ଡାଉନ କରିଛନ୍ତି। ଏହାଦ୍ୱାରା ସହରର ପ୍ରାୟ ୨୬କୋଟି ଲୋକ ନିଜ ଘରେ ବନ୍ଦ ହୋଇ ରହିଛନ୍ତି। ସଂଘାଇରେ କଡ଼ା ଲକ୍ଡାଉନ ଯୋଗୁ ଘରେ ବନ୍ଦୀ ଥିବା ଲୋକମାନେ ନିଜ ଆପାର୍ଟମେଣ୍ଟରେ ଚିତ୍କାର କରୁଥିବାର ଏକ ଭିଡିଓ ଭାଇରାଲ ହୋଇଛି। ଆମେରିକାର ଜଣାଶୁଣା ସ୍ବାସ୍ଥ୍ୟ ବୈଜ୍ଞାନିକ ଡକ୍ଟର ଏରିକ ଫିଗଲ-ଡିଙ୍ଗ ସାଂଘାଇର ଏହି ଭିଡିଓକୁ ଟୁଇଟ କରି ଶେୟାର କରିଛନ୍ତି। ସେ କହିଛନ୍ତି, ଘରେ ବନ୍ଦୀ ଥିବା ଲୋକମାନଙ୍କ ନିକଟରେ ଖାଦ୍ୟ ସାମଗ୍ରୀର ଅଭାବ ଦେଖାଦେଇଛି। ଲୋକମାନେ କମ୍ ଖର୍ଚ୍ଚ କରି ଅଧିକ ଦିନ ପର୍ଯ୍ୟନ୍ତ ପନିପରିବା ସାଇତି ରଖିବାକୁ ଚେଷ୍ଟା କରୁଛନ୍ତି। ହେଲେ ସେସବୁ କେତେଦିନ ଯାଏ ସାଇତି ରଖିପାରିବେ। ଗୋଟିଏ ଦିନ ଆସିବ ସେସବୁ ଶେଷ ହୋଇଯିବ। ତେବେ ଏଭଳି କଡ଼ା ଲକ୍ଡାଉନର ପରିଣାମ ଅତି ଭୟଙ୍କର ହୋଇପାରେ ବୋଲି ଲୋକମାନେ ଚେତାବନୀ ଦେଇଛନ୍ତି। ସେମାନେ କହିଛନ୍ତି, ବେଶୀଦିନ ଯାଏ ଲୋକଙ୍କୁ ସରକାର ଘରେ ବାନ୍ଧି ରଖିପାରିବେ ନାହିଁ।
