ବୋଷ୍ଟନ, ୬ା୨ (ପି.ଟି.): ଭାରତୀୟ ହାଇ ଜମ୍ପର ତେଜସ୍ବିନୀ ଶଙ୍କର ଏଠାରେ ଚାଲିଥିବା ନ୍ୟୁ ବାଲାନ୍ସ ଇନ୍ଡୋର ଗ୍ରାଁ ପ୍ରିରେ ପ୍ରଥମ ସ୍ଥାନ ଅଧିକାର କରି ସ୍ବର୍ଣ୍ଣ ପଦକ ହାସଲ କରିଛନ୍ତି। ପ୍ରତିଯୋଗିତାରେ ତାଙ୍କୁ ପୂର୍ବତନ ବିଶ୍ୱ ଚାମ୍ପିୟନ ଓ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ବିଜେତା ବାହମାସର ଡୋନାଲ୍ଡ ଥୋମାସଙ୍କଠାରୁ କଡ଼ା ଚ୍ୟାଲେଞ୍ଜର ସମ୍ମୁଖୀନ ହେବାକୁ ପଡ଼ିଥିଲା। ଦିଲ୍ଲୀରେ ଜନ୍ମ ଗ୍ରହଣ କରିଥିବା ଏହି ୨୪ବର୍ଷୀୟ ଆଥଲେଟ୍ ୨.୨୬ ମିଟର ଜମ୍ପ କରି ୨୦୦୭ ବିଶ୍ୱ ଚାମ୍ପିୟନ ଓ ୨୦୧୦ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ବିଜେତା ୩୮ ବର୍ଷୀୟ ଥୋମାସ୍ଙ୍କୁ ପଛରେ ପକାଇ ଦେଇଥିଲେ। ବାହମାସ ଆଥଲେଟ୍ଙ୍କ ଶ୍ରେଷ୍ଠ ଜମ୍ପ ୨.୨୩ ମିଟର ରେକର୍ଡ କରାଯାଇଥିଲା। ସ୍ଥାନୀୟ ଦର୍ଶକଙ୍କଠାରୁ ଉତ୍ସାହ ପାଇ ୨୦୨୨ ବର୍ମିଂହାମ୍ ରାଜ୍ୟଗୋଷ୍ଠୀ କ୍ରୀଡ଼ା ବ୍ରୋଞ୍ଜ ବିଜେତା ତାଙ୍କର ପ୍ରଥମ ୪ ପ୍ରୟାସରେ ୨.୧୪, ୨.୧୯, ୨.୨୩ ଓ ୨.୨୬ କ୍ଲିୟର କରିଥିଲେ। କଲେଜ ପାଠ୍ୟକ୍ରମ ଶେଷ କରିବା ପରେ ଶଙ୍କରଙ୍କର ଏହା ଥିଲା ପ୍ରଥମ ପ୍ରତିଯୋଗିତା। ତାଙ୍କର ବ୍ୟକ୍ତିଗତ ଆଉଟଡୋର୍ ଜମ୍ପ ୨.୨୯ ମିଟର ରହିଛି, ଯାହାକି ଏକ ଜାତୀୟ ରେକର୍ଡ। ଏକ ଇନ୍ଡୋର ମିଟ୍ରେ ତାଙ୍କର ଶ୍ରେଷ୍ଠ ଜମ୍ପ୍ ୨.୨୮ ମିଟର ରହିଛି। ଉଭୟ ସଫଳତା ସେ ଲୁବକ୍ ଓ ଏମ୍ସରେ ହାସଲ କରିଥିଲେ। ୟୁଏସ୍ଏର ଡେରିଲ ସୁଲିଭାନ ତାଙ୍କ ସିଜନ ଶ୍ରେଷ୍ଠ ୨.୧୯ ମିଟର ଜମ୍ପ କରି ତୃତୀୟ ହୋଇଥିଲେ।
