ନୂଆଦିଲ୍ଳୀ, ୧ା୧୨ (ପି.ଟି.) ଟେବଲ ଟେନିସ କିମ୍ବଦନ୍ତୀ ଅଚନ୍ତା ଶରଥ କମଲଙ୍କୁ ମେଜର ଧ୍ୟାନଚାନ୍ଦ ଖେଳରତ୍ନ ପୁରସ୍କାର ପ୍ରଦାନ କରାଯାଇଛି। ବୁଧବାର ରାଷ୍ଟ୍ରପତି ଭବନରେ ଆୟୋଜିତ ଏକ ଭବ୍ୟ ସମାରୋହରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଶରଥଙ୍କୁ ସମ୍ମାନିତ କରିଛନ୍ତି। ଏକମାତ୍ର ଖେଳାଳି ଭାବରେ ଶରଥ ଖେଳରତ୍ନ ପୁରସ୍କାର ହାସଲ କରିଥିବା ବେଳେ ୨୫ ଜଣ କ୍ରୀଡାବିତ୍ଙ୍କୁ ଅର୍ଜୁନ ପୁରସ୍କାରରେ ସମ୍ମାନିତ କରାଯାଇଥିଲା। ମହିଳା ହକି ଦଳର ଖେଳାଳି ତଥା ଏକମାତ୍ର ଓଡ଼ିଆ ଭାବରେ ଦୀପ୍ଗ୍ରେସ ଏକ୍କା ଅର୍ଜୁନ ପୁରସ୍କାର ତାଲିକାରେ ରହିଛନ୍ତି। ଭାରତୀୟ ମହିଳା ହକି ଦଳ ସହିତ ଏଫ୍ଆଇଏଚ୍ ଓମେନ୍ସ ନେସନ୍ସ କପ୍ ଖେଳିବା ପାଇଁ ସ୍ପେନ୍ର ଭାଲେନ୍ସିଆରେ ଥିବାରୁ ଦୀପ୍ଗ୍ରେସ ପୁରସ୍କାର ଗ୍ରହଣ କରିପାରି ନ ଥିଲେ। ]
ସଟଲର ଲକ୍ଷ୍ୟ ସେନ୍, ଏଚ୍. ଏସ୍. ପ୍ରଣୟ, ମହିଳା ବକ୍ସର ନିଖତ ଜରିନ୍ ଓ ଟ୍ରିପଲ ଜମ୍ପର ଏଲଧୋଶ ପଲ ପ୍ରମୁଖଙ୍କୁ ଅର୍ଜୁନ ପୁରସ୍କାର ପ୍ରଦାନ କରାଯାଇଥିଲା। ପୁରସ୍କାର ବିଜେତାଙ୍କୁ ୧୫ ଲକ୍ଷ ଟଙ୍କାର ଚେକ୍, ଏକ ତାମ୍ର ମୂର୍ତ୍ତି ଓ ମାନପତ୍ର ପ୍ରଦାନ କରିଥିଲେ ରାଷ୍ଟ୍ରପତି। ଭାରତୀୟ କ୍ରୀଡାରେ ଅନବଦ୍ୟ ଅବଦାନ ରଖିଥିବା କ୍ରୀଡାବିତ୍ମାନଙ୍କୁ ଏହି ଉତ୍ସବରେ ସମ୍ମାନିତ କରାଯାଇଥିଲା। ପ୍ରତିବର୍ଷ ଅଗଷ୍ଟ ୨୯ ତାରିଖରେ ମେଜର ଧ୍ୟାନଚାନ୍ଦଙ୍କ ଜନ୍ମଦିବସରେ ଏହି ପୁରସ୍କାର ପ୍ରଦାନ କରାଯାଇଥାଏ, ମାତ୍ର ବିଗତ ଦୁଇ ବର୍ଷ ହେବ ଭିନ୍ନ ତାରିଖରେ ଏହି ପୁରସ୍କାର ପ୍ରଦାନ କରାଯାଉଛି। ଦରବାର ହଲ୍ରେ ଆୟୋଜିତ ଏହି କାର୍ଯ୍ୟକ୍ରମରେ ୪୦ ବର୍ଷୀୟ ଟେବଲ ଟେନିସ ଷ୍ଟାର ଶରଥ ମୁଖ୍ୟ ଆକର୍ଷଣ ରହିଥିଲେ।
ଚଳିତ ବର୍ମିଂହାମ ରାଜ୍ୟଗୋଷ୍ଠୀ କ୍ରୀଡାରେ ସେ ୪ଟି ପଦକ ହାସଲ କରିଥିଲେ। ମନିକା ବାତ୍ରାଙ୍କ ପରେ ଦ୍ୱିତୀୟ ଖେଳାଳି ଭାବେ ସେ ଖେଳରତ୍ନ ପୁରସ୍କାର ହାସଲ କରିଛନ୍ତି। ଶରଥଙ୍କୁ ୨୫ ଲକ୍ଷ ଟଙ୍କା, ଏକ ପଦକ ଓ ମାନପତ୍ର ପ୍ରଦାନ କରାଯାଇଥିଲା। ଶରଥ ବର୍ମିଂହାମରେ ମିକ୍ସଡ ଡବଲ୍ସ ଓ ସିଙ୍ଗଲ୍ସ ବର୍ଗରେ ସ୍ବର୍ଣ୍ଣ ପଦକ ହାସଲ କରିଥିଲେ। ଏହା ସହିତ ରାଜ୍ୟଗୋଷ୍ଠୀ କ୍ରୀଡାରେ ସେ ନିଜର ତ୍ରୟୋଦଶ ପଦକ ହାସଲ କରିଥିଲେ। ଏହା ବ୍ୟତୀତ ୨୦୧୮ ଏସିଆନ୍ ଗେମ୍ସରେ ଦୁଇଟି ବ୍ରୋଞ୍ଜ ପଦକ ମଧ୍ୟ ହାସଲ କରିଥିଲେ। ଖେଳରତ୍ନ ପୁରସ୍କାର ପରେ ରାଷ୍ଟ୍ରପତି ଜୀବନବ୍ୟାପୀ ସାଧନା ପାଇଁ ଦ୍ରୋଣାଚାର୍ଯ୍ୟ ପୁରସ୍କାର ପ୍ରଦାନ କରିଥିଲେ। ରୋହିତ ଶର୍ମାଙ୍କ କୋଚ୍ ଦୀନେଶ ଜଓ୍ବାହାର ଲାଡ, ଫୁଟବଲ କୋଚ୍ ବିମଲ ପ୍ରଫୁଲ୍ଲ ଘୋଷ ଓ କୁସ୍ତିରେ ମେଣ୍ଟର ରାଜ ସିଂଙ୍କୁ ଏହି ପୁରସ୍କାର ପ୍ରଦାନ କରାଯାଇଥିଲା।
ସେହିପରି ସାଧାରଣ ବର୍ଗରେ ଜିଓ୍ବନଜୋତ ସିଂ ତେଜା(ତୀରନ୍ଦାଜୀ), ମହମ୍ମଦ ଅଲୀ କମର(ବକ୍ସିଂ), ସୁମା ସିଦ୍ଧାର୍ଥ ଶିରୁର(ପାରା ଶୁଟିଂ) ଓ ସୁଜିତ ମାନ(କୁସ୍ତି)ଙ୍କୁ ଦ୍ରୋଣାଚାର୍ଯ୍ୟ ପୁରସ୍କାର ପ୍ରଦାନ କରାଯାଇଥିଲା। ଜୀବନବ୍ୟାପୀ ସାଧନା ପାଇଁ ଅଶ୍ୱିନୀ ଆକୁଞ୍ଜି ସି(ଆଥଲେଟିକ୍ସ), ଧରମବୀର ସିଂ( ହକି), ବି ସି ସୁରେଶ(କବାଡି) ଓ ନିର ବାହଦୁର ଗୁରୁଙ୍ଗ(ପାରା ଆଥଲେଟିକ୍ସ)ଙ୍କୁ ଧ୍ୟାନଚାନ୍ଦ ପୁରସ୍କାର ପ୍ରଦାନ କରାଯାଇଥିଲା। କେନ୍ଦ୍ର କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ଅନୁରାଗ ଠାକୁର ଓ କ୍ରୀଡା ରାଷ୍ଟ୍ରମନ୍ତ୍ରୀ ନିଶିଥ୍ ପରମାଣିକ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ।