ଓଭାଲ୍,୮।୯: ଇଂଲଣ୍ଡ ବିପକ୍ଷ ଓଭାଲ ଟେଷ୍ଟରେ ବିଜୟ ପରେ ଶାର୍ଦ୍ଦୁଳ ଠାକୁରଙ୍କ ନାମ ସବୁଆଡେ ଚର୍ଚ୍ଚା ହେଉଛି। ଓଭାଲ ଟେଷ୍ଟରେ ଟିମ ଇଣ୍ଡିଆର ଐତିହାସିକ ବିଜୟରେ ଶାର୍ଦ୍ଦୁଳ ଠାକୁର ପ୍ରମୁଖ ଭୂମିକା ଗ୍ରହଣ କରିଥିଲେ। ଏହି ମ୍ୟାଚରେ ଠାକୁର ଇଂଲଣ୍ଡ ଦଳକୁ ଉଭୟ ବ୍ୟାଟ ଏବଂ ବଲ୍ରେ ଚିତ୍ପଟାଙ୍ଗ କରିଥିଲେ। ସେ ପ୍ରଥମ ଇନିଂସରେ ମାତ୍ର ୩୬ ବଲରେ ୫୭ ରନ ସ୍କୋର କରିଥିଲେ, ସେଥିରେ ୩ ଟି ଛକା ଓ ୭ ଚୌକା ସାମିଲ ଥିଲା। ଠାକୁର ମାତ୍ର ୩୧ ବଲରେ ଅର୍ଦ୍ଧଶତକ ହାସଲ କରିଥିଲେ। ଏହା ପରେ ଠାକୁର ପ୍ରଥମ ଇନିଂସରେ ଅଲି ପୋପଙ୍କ ଗୁରୁତ୍ୱପୂର୍ଣ୍ଣ ଉଇକେଟ ନେଇଥିଲେ। ସେ ଦ୍ୱିତୀୟ ଇନିଂସରେ ମଧ୍ୟ ପୁଣି ଏକ ଗୁରୁତ୍ୱପୂର୍ଣ୍ଣ ଅର୍ଦ୍ଧଶତକ ଖେଳିଥିଲେ। ସେ ୭୨ ବଲରେ ୬୦ ରନ ସଂଗ୍ରହ କରିଥିଲେ ଏବଂ ପନ୍ତଙ୍କ ସହ ୧୦୦ ରନର ମ୍ୟାଚ ବିଜୟୀ ଭାଗିଦାରୀ ବାଣ୍ଟିଥିଲେ। ଏହା ପରେ ସେ ବୋଲିଂରେ ୮ ଓଭରରେ ୨୨ ରନ୍ ଦେଇ ୨ ଉଇକେଟ ନେଇଥିଲେ। ଏହାପୂର୍ବରୁ ଅଷ୍ଟ୍ରେଲିଆରେ ସିରିଜ ସମୟରେ ତାଙ୍କର ଚମତ୍କାର ପ୍ରଦର୍ଶନ ପରେ ସେ ଚର୍ଚ୍ଚାକୁ ଆସିଥିଲେ। ଏବେ ଇଂଲଣ୍ଡରେ ଓଭାଲ ଟେଷ୍ଟରେ ବିଜୟ ପରେ ଶାର୍ଦ୍ଦୁଳ ଠାକୁରଙ୍କ ଏକ ପୁରୁଣା ସାକ୍ଷାତକାର ଭିଡିଓ ଭାଇରାଲ ହେବାରେ ଲାଗିଛି। ଭିଡିଓରେ ସେ ମହେନ୍ଦ୍ର ସିଂ ଧୋନୀଙ୍କୁ ପ୍ରଶଂସା କରୁଛନ୍ତି।
ବ୍ରିସବେନର ଗାବାରେ ଟିମ ଇଣ୍ଡିଆର ବିଜୟର ଅନ୍ୟତମ ହିରୋ ଶାର୍ଦ୍ଦୁଳ ଠାକୁର ପ୍ରକାଶ କରିଛନ୍ତି ଯେ, ସେ ଟେଷ୍ଟ ଦଳରୁ ବାଦ୍ ବାଦ୍ ପଡିଥିବାବେଳେ ମହେନ୍ଦ୍ର ସିଂ ଧୋନୀ ତାଙ୍କୁ ବହୁତ୍ ସାହାଯ୍ୟ କରିଥିଲେ। ବ୍ରିସବେନ ଶାର୍ଦ୍ଦୁଳ ଦୁଇଟି ଇନିଂସରେ ୭ଟି ଉଇକେଟ ନେଇଥିଲେ। ଏହା ସହିତ ସେ ପ୍ରଥମ ଇନିଂସରେ ୬୭ ରନର ଏକ ଭଲ ଇନିଂସ ଖେଳିଥିଲେ। ସେ କହିଥିଲେ, ପ୍ରାୟତଃ ମୁଁ ତାଙ୍କୁ (ଧୋନୀ) ପଚାରିଛି ଯେ, ସେ କିପରି ଚାପର ମୁକାବିଲା କରିନ୍ତି। ସେ ଜଣେ ଖେଳାଳି, ଅଧିନାୟକ, ହାରିଥିବା ଦଳର ସଦସ୍ୟ ଭାବରେ ଅନେକ ଥର ଏହାର ମୁକାବିଲା କରିଛନ୍ତି। ଏଥିସହ ସେ ବିଜେତା ଭାବେ ଭଲ ପାଇବା ପାଇଛନ୍ତି। ତାଙ୍କର ସମସ୍ତ ପ୍ରକାରର ଅଭିଜ୍ଞତା ଅଛି। ପୂର୍ବତନ ଅଧିନାୟକ ଏମଏସ ଧୋନିଙ୍କୁ ପ୍ରଶଂସା କରି ଶାର୍ଦ୍ଦୁଳ କହିଥିଲେ ଯେ, ଧୋନୀ ହିଁ ତାଙ୍କ ଜୀବନ ବଦଳାଇ ଦେଇଛନ୍ତି। ସୂଚନାଯୋଗ୍ୟ, ଶାର୍ଦ୍ଦୁଳ ୨୦୧୮ରୁ ଚେନ୍ନାଇ ସୁପର କିଙ୍ଗ୍ସ ପାଇଁ ଖେଳୁଛନ୍ତି।