ନୂଆଦିଲ୍ଲୀ: ଗୁରୁବାର ସ୍ପାଇସ୍ ଜେଟ କମ୍ପାନୀର ଶେୟାର କାରବାର ୧୪% ବଢ଼ିଥିବା ନଜରକୁ ଆସିଛି। ଆମେରିକାର ଫେଡେରାଲ ଆଭିଏଶନ ଆଡମିନିଷ୍ଟ୍ରେଶନ(ଏଫ୍ଏଏ) ବୋଇଂ ୭୩୭ ମାକ୍ସ ବିମାନର କମର୍ସିଆଲ ସେବାକୁ ଅନୁମତି ଦେବା ପରେ ଏହି ସ୍ପାଇସ୍ ଜେଟ୍ ବିମାନ କମ୍ପାନୀର ଶେୟାର କାରବାର ବେଶ୍ ଉନ୍ନତ ହୋଇଛି। ଏଭଳି ନିଷ୍ପତ୍ତି ଦ୍ୱାରା କମ୍ପାନୀର ବୋଇଂ ୭୩୭ ବିମାନଗୁଡିକ ଭାରତୀୟ ଆକାଶରେ ପୁଣି ଥରେ ଉଡ଼ିପାରିବ। ଗୁରୁବାର ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ)ରେ ସ୍ପାଇସ ଜେଟ ଶେୟାର କାରବାର ୧୩.୬୩% ବଢି ୭୫.୪ ଟଙ୍କାରେ ପହଞ୍ଚିଥିଲା। ସେହିଭଳି ନିଫ୍ଟିରେ ଏହା ୧୩.୯୬% ବଢି ୭୫.୫ ଟଙ୍କା ସ୍ତର ଛୁଇଁଥିଲା। ସୂଚନାଯୋଗ୍ୟ, ବିମାନଯାତ୍ରୀଙ୍କ ନିରାପତ୍ତା ଦୃଷ୍ଟିକୋଣରୁ ଏହି ବିମାନଗୁଡିକର ଉଡାଣ ଉପରେ କଟକଣା ଲଗାଯାଇଥିଲା। ଭାରତରେ ସ୍ପାଇସ୍ ଜେଟ୍ ଏବଂ ଜେଟ୍ ଏୟାରଓ୍ବେଜ ଏହି ବିମାନଗୁଡିକ ପରିଚାଳନା କରାଉଥିଲା। ସ୍ପାଇସ୍ ଜେଟ୍ ନିକଟରେ ବୋଇଂ ୭୩୭ର ୧୩ଟି ବିମାନ ରହିଛି।
