ନୂଆଦିଲ୍ଲୀ,୯।୯: ଇଣ୍ଡିଆନ ରେଲଓ୍ବେ କ୍ୟାଟେରିଂ ଆଣ୍ଡ ଟୁରିଜିମ କର୍ପୋରେଶନ(ଆଇଆର୍ସିଟିସି)ରୁ ସରକାର ପ୍ରାୟ ୧୫ରୁ ୨୦% ଅଂଶଧନ କ୍ରୟ କରିବା ଲାଗି ଯୋଜନା ରଖିଛନ୍ତି। ଅଫର ଅଫ୍ ସେଲ୍ (ଓଏଫ୍ଏସ୍) ଦ୍ୱାରା ଏହି ପ୍ରକ୍ରିୟା ସମ୍ପାଦିତ କରିବା ନେଇ ଯୋଜନା ରଖାଯାଇଛି। ଏହାକୁ ସମ୍ପାଦନ କରିବା ଲାଗି ନିବେଶ ଏବଂ ରାଷ୍ଟ୍ରାୟତ୍ତ ସମ୍ପତ୍ତି ପରିଚାଳନା ବିଭାଗ(ଦୀପମ) ଗତ ମାସରେ ମର୍ଚ୍ଚାଣ୍ଟ ବ୍ୟାଙ୍କର ନିଯୁକ୍ତି ଲାଗି ବିଡ୍ ଆହ୍ବାନ କରିଥିଲା। ପ୍ରକୃତ ପକ୍ଷେ କେତେ ପରିମାଣର ଅଂଶଧନ ବିକ୍ରି ହେବ ସେ ନେଇ ସ୍ପଷ୍ଟ ହୋଇପାରିନାହିଁ। ସେପ୍ଟେମ୍ବର ୪ରେ ଏଥିଲାଗି ଏକ ପ୍ରିବିଡ୍ ବୈଠକ ଡକାଯାଇଥିଲା। ଏଥିରେ ସମ୍ଭାବ୍ୟ ବିଡର ଭାଗ ନେଇଥିବା ଜଣାପଡିଛି। ବିଡରଙ୍କର ବିଭିନ୍ନ ପ୍ରଶ୍ନର ଉତ୍ତର ଦୀପମ ବର୍ତ୍ତମାନ ପ୍ରଦାନ କରୁଥିବା ସୂଚନା ମିଳିଛି।
୧୫ରୁ ୨୦% ଅଂଶଧନ ସରକାର ବିକ୍ରି କରିପାରନ୍ତି ବୋଲି ପ୍ରାରମ୍ଭିକ ସୂଚନା ମିଳିଛି। ଏ ନେଇ ସ୍ପଷ୍ଟ ସୂଚନା ମର୍ଚ୍ଚାଣ୍ଟ ବ୍ୟାଙ୍କରଙ୍କୁ ପ୍ରଦାନ କରାଯିବ ବୋଲି ଜଣାପଡିଛି। ଆଇଆର୍ସିଟିସିରେ ବର୍ତ୍ତମାନ ସରକାରଙ୍କ ୮୭.୪୦% ଅଂଶଧନ ରହିଛି। ସେବିର ପବ୍ଲିକ ହୋଲ୍ଡିଂ ନିୟମ ଅନୁସାରେ ଏହାକୁ ୭୫%କୁ ଖସାଇବାର ନିୟମ ରହିଛି। ଭାରତୀୟ ରେଲଓ୍ବେର ଏକ ଅଂଶବିଶେଷ ଭାବେ ଆଇଆର୍ସିଟିସି କାର୍ଯ୍ୟ କରୁଛି। ସରକାର ଚଳିତ ଆର୍ଥତ୍କ ବର୍ଷରେ ରାଷ୍ଟ୍ରାୟତ୍ତ ଉଦ୍ୟୋଗଗୁଡିକରୁ ଅଂଶଧନ ବିକ୍ରି ଦ୍ୱାରା ପ୍ରାୟ ୨.୧୦ ଲକ୍ଷ କୋଟି ଟଙ୍କା ସଂଗ୍ରହ ଲକ୍ଷ୍ୟ ରଖିଛନ୍ତି। ଏହା ଅନ୍ତର୍ଗତ ଉକ୍ତ ଯୋଜନାକୁ କାର୍ଯ୍ୟକାରୀ କରାଯାଉଛି। କରୋନା ଯୋଗୁ ବଜାରର ସ୍ଥିତି ଭଲ ନ ଥିବାରୁ ଏହା ସରକାରଙ୍କ ଅଂଶଧନ ବିକ୍ରି କ୍ଷେତ୍ରରେ ବାଧା ଉପୁଜାଉଛି। ଏପ୍ରିଲ ୨୦୧୭ରେ କେନ୍ଦ୍ର କ୍ୟାବିନେଟ ରେଲଓ୍ବେର ୫ କମ୍ପାନୀଙ୍କୁ ସୂଚୀଭୁକ୍ତ କରାଇବା ଲାଗି ମଞ୍ଜୁରୀ ପ୍ରଦାନ କରିଥିଲେ।