ମହାକାଳପଡ଼ା,୨୯୧(ପ୍ରତାପ ଚନ୍ଦ୍ର ସ୍ବାଇଁ): ଗହୀରମଥା ସାମୁଦ୍ରିକ ଅଭୟାରଣ୍ୟ ପ୍ରକୃତିର ଅନବଦ୍ୟ ସୃଷ୍ଟି ଓ ସାମୁଦ୍ରିକ ଜୀବଜନ୍ତୁମାନଙ୍କ ପାଇଁ ଭୃସ୍ବର୍ଗ। ବିସ୍ତୀର୍ଣ୍ଣ ଲୁଣା ହେନ୍ତାଳ ଜଙ୍ଗଲ, ଗଭୀର ସମୁଦ୍ରର ନୀଳ ଜଳ ରାଶି ପ୍ରକୃତି ପ୍ରେମୀଙ୍କୁ ଆକୃଷ୍ଟ କରିଥାଏ। ଗହୀରମଥାର ଜୈବ ବିବିଧତା ଓ ଆଦ୍ରଭୂମିକୁ ସୁଦୂର ପ୍ରଶାନ୍ତ ମହାସାଗରରୁ ସାମୁଦ୍ରିକ ଜୀବଜନ୍ତୁମାନଙ୍କୁ ଆକୃଷ୍ଟ କରିଥାଏ। ସେଥିପାଇଁ ଶୀତଋତୁ ଆରମ୍ଭ ହେବା ମାତ୍ରେ ଗହୀରମଥା ପ୍ରେମରେ ପଡ଼ିଯାଆନ୍ତି ଦେଶ ବିଦେଶର ସାମୁଦ୍ରିକ ବିରଳ ଜୀବଜନ୍ତୁ । ସେମାନଙ୍କ ମଧ୍ୟରେ ଅଲିଭ ରିଡ଼ଲେ କଇଁଛ, ହର୍ସସୁ କ୍ରାବ , ବିଭିନ୍ନ ପ୍ରଜାତିର ଡଲ୍ଫିନ , ସାର୍କ ଭଳି ବିରଳ ପ୍ରଜାତିର ମାଛ ଅନେକ ମାଇଲି ସାମୁଦ୍ରିକ ପଥ ଅତିକ୍ରମ କରି ଗହୀରମଥାକୁ ଚାଲି ଆସନ୍ତି ନିଜର ବଂଶ ବିସ୍ତାର ପାଇଁ। ଗହୀରମଥା ନୀଳ ଜଳରାଶିରେ ଚାଲେ ସେମାନଙ୍କ ମିଳନ ପ୍ରକ୍ରିୟା । ଦୀର୍ଘ ୩ ମାସ ସେମାନେ ଗହୀରମଥାରେ ରହିବା ପରେ ଡିମ୍ବ ଦେଇ ସେମାନେ ଶାବକ ଜନ୍ମ ଦେଇଥାନ୍ତି। କିନ୍ତୁ ମିଳନ ପୂର୍ବରୁ ସେମାନଙ୍କ ଚାଲି ଯାଉଛି ଜୀବନ। ଗହୀରମଥା ସାମୁଦ୍ରିକ ଅଭୟାରଣ୍ୟର ଗଳା ବାଟ ଦେଇ ବହୁ ସଂଖ୍ୟାରେ ଟ୍ରଲର, ବୋଟ୍ ବେଆଇନ ପ୍ରବେଶ କରିବା ଦ୍ୱାରା ଗାଞ୍ଜ ଜାଲରେ ପଡ଼ି ଏମାନଙ୍କର ଅକାଳରେ ଜୀବନ ଯାଉଛି। ଏହାକୁ ନେଇ ପରିବେଶବିତ୍ମାନଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଇଛି।
ସୂଚନା ଅନୁଯାୟୀ, ଏକ ସପ୍ତାହ ପୂର୍ବରୁ ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳର ମାଦଳି ମୁହାଁଣରେ ଏକ ବିରଳ ପ୍ରଜାତିର ବ୍ଲାକ୍ ଟିପ୍ ସାର୍କକୁ (୫କେଜି) ବେଆଇନ ଭାବେ ପ୍ରବେଶ କରିଥିବା ବୋଟ୍ରୁ ଜବତ କରିଛି ବନ ବିଭାଗର ସ୍ପେଶାଲ ପାଟ୍ରୋଲିଂ ଟିମ୍ ା ଗହୀରମଥା ସାମୁଦ୍ରିକ ଅଭୟାରଣ୍ୟକୁ ସୁରକ୍ଷା ଦେବା ପାଇଁ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ମାତ୍ର କେବଳ ବନ ବିଭାଗକୁ ଛାଡ଼ି ଦେଲେ ସାମୁଦ୍ରିକ ଥାନା, ତଟରକ୍ଷୀ ବାହିନୀର ସୁରକ୍ଷା କର୍ମଚାରୀଙ୍କ ଦେଖା ମିଳୁନି। ବିସ୍ତୀର୍ଣ୍ଣ ଅଞ୍ଚଳକୁ ପଇଁତରା ମାରିବା ବିନ ବିଭାଗ ଟିମ୍ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି । ଏ ନେଇ ପରିବେଶ ପ୍ରେମୀ ସମରେନ୍ଦ୍ର ମାହାଳି କୁହନ୍ତି, ବିରଳ ପ୍ରଜାତିର ସାର୍କର ମୁତ୍ୟୁ ଗହୀରମଥା ପାଇଁ ଶୁଭଙ୍କର ନୁହେଁ। ବିଦେଶାଗତ ସାମୁଦ୍ରିକ ଜୀବଜନ୍ତୁମାନଙ୍କ ଅନ୍ତୁଡ଼ିଶାଳ ଭାବେ ଗହୀରମଥା ପରିଚିତ। ପ୍ରତ୍ୟେକ ସାମୁଦ୍ରିକ ଜୀବଜନ୍ତୁମାନଙ୍କୁ ସୁରକ୍ଷା ଦେବା ଆମମାନଙ୍କ ଦାୟିତ୍ୱ । ଏ ସଂକ୍ରାନ୍ତରେ ଗହୀରମଥା ସାମୁଦ୍ରିକ ଅଭୟାରଣ୍ୟ ରେଞ୍ଜ ଅଧିକାରୀ ପ୍ରଦୋଷ କୁମାର ମହାରଣା କୁହନ୍ତି, ବୋଟ୍ରୁ ଜବତ ହୋଇଛି ବ୍ଲାକ୍ ଟିପ୍ ସାର୍କ। ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳକୁ ବିଭାଗ ପକ୍ଷରୁ ସ୍ବତନ୍ତ୍ର ପାଟ୍ରୋଲିଂ ଟିମ୍ ଦ୍ବାରା ସୁରକ୍ଷା ବ୍ୟବସ୍ଥା କଡାକଡି କରାଯାଉଛି।