ନୂଆଦିଲ୍ଲୀ,୩୦ ।୮: କଂଗ୍ରେସ ଅଧ୍ୟକ୍ଷ ପଦ ପାଇଁ ନିର୍ବାଚନ ତାରିଖ ଘୋଷଣା ହେବା ପରେ ଏବେ ସମସ୍ତଙ୍କ ନଜର ଜି-୨୩ ନେତାଙ୍କ ଉପରେ । ସମସ୍ତଙ୍କ ମନରେ ପ୍ରଶ୍ନ କ’ଣ ପୁଣିଥରେ ବା ତୃତୀୟ ଥର କଂଗ୍ରେସ ଅଧ୍ୟକ୍ଷ ପଦ ପାଇଁ ମୁକାବିଲା ହେବ । ସୂଚନାଯୋଗ୍ୟ, ଗତ ୩ ଦଶକ ମଧ୍ୟରେ ୨ଥର କଂଗ୍ରେସ ଅଧ୍ୟକ୍ଷ ପଦ ପାଇଁ ନିର୍ବାଚନ ହୋଇଥିଲା । କୁହାଯାଉଛି କି ଯଦି ରାହୁଲ ଗାନ୍ଧୀ କଂଗ୍ରେସ ଅଧ୍ୟକ୍ଷ ହେବାକୁ ଅମଙ୍ଗ ହୁଅନ୍ତି ତେବେ ଜି-୨୩ର କେହି ନେତା ଏହି ପଦ ପାଇଁ ନିର୍ବାଚନ ଲଢି ପାରନ୍ତି । ତେବେ ଏହି ରେସରେ ଶଶି ଥରୁର, ମନିଷ ତିୱାରୀ ଅବା ପୃଥ୍ୱିବରାଜ ଚୌହାନ ମଇଦାନକୁ ଆସିପାରନ୍ତି ।
ଏହାରି ଭିତରେ ମିଳିଥିବା ସୂଚନା ଅନୁଯାୟୀ, କଂଗ୍ରେସର ବରିଷ୍ଠ ନେତା ଶଶି ଥରୁର କଂଗ୍ରେସ ଅଧ୍ୟକ୍ଷ ପଦ ପାଇଁ ନିର୍ବାଚନ ଲଢିବାକୁ ସମ୍ଭାବନା ଖୋଜୁଛନ୍ତି । ହେଲେ ଏ ନେଇ ଅନ୍ତିମ ନିଷ୍ପତ୍ତି ନେଇ ନାହାନ୍ତି । ମଳିଥିବା ବିଶେଷ ସୂତ୍ରର ସୂଚନା ଅନୁଯାୟୀ, ଥରୁର ଏବେ ଏଥିପାଇଁ ମନ ବଳାଇ ନାହାନ୍ତି, ହେଲେ ଏ ସମ୍ପର୍କରେ ଖୁବଶୀଘ୍ର ନିଷ୍ପତ୍ତି ନେଇ ପାରନ୍ତି ।
ଏ ସମ୍ପର୍କରେ କିଛି ଟିପ୍ପଣି ଦେବାକୁ ମନା କରି ଦେଇଛନ୍ତି ଥରୁର । ସେ ମଲାୟାଲମର ଦୈନିକ ଖବରକାଗଜ ମାତୃଭୂମୀରେ ଏକ ଲେଖା ଲେଖିଛନ୍ତି, ଯେଉଁଥିରେ ସେ ସ୍ୱତନ୍ତ୍ର ଓ ନିରପେକ୍ଷ ନିର୍ବାଚନ ପାଇଁ ଆହ୍ୱାନ କରିଛନ୍ତି । ଏହାସହ ଏହି ଲେଖାରେ ସେ କଂଗ୍ରେସ କାର୍ଯ୍ୟ ସମିତି(ସିଡବ୍ଲୁସି)ର ଡଜନ ଆସନ ପାଇଁ ଦଳ ନିର୍ବାଚନ ଘୋଷଣା କରିବା ଦରକାର ବୋଲି କହିଛନ୍ତି ।
