ମୁମ୍ବାଇ,୯।୧୨-ବଲିଉଡର ଭେଟରାନ ଅଭିନେତା ଶତ୍ରୁଘ୍ନ ସିହ୍ନା ବୁଧବାର ୭୫ ବର୍ଷରେ ପାଦ ଥାପିଛନ୍ତି। ଏହି ଅବସରରେ ପ୍ରଶଂସକଙ୍କଠାରୁ ଆରମ୍ଭ କରି ରାଜନେତାଙ୍କ ସମେତ ବହୁ ବଲିଉଡ କଳାକାର ତାଙ୍କୁ ଜନ୍ମଦିନର ଶୁଭେଚ୍ଛା ଜଣାଇଛନ୍ତି। ତେବେ ଶତ୍ରୁଘ୍ନଙ୍କ ଝିଅ ତଥା ଅଭିନେତ୍ରୀ ସୋନାକ୍ଷୀ ସିହ୍ନା ପିତାଙ୍କୁ ଭିନ୍ନ ଢଙ୍ଗରେ ଅଭିନନ୍ଦନ ଜଣାଇଛନ୍ତି। ସୋନାକ୍ଷୀ ନିଜ ଅଫିସିଆଲ ଇନ୍ଷ୍ଟାଗ୍ରାମ ଆକାଉଣ୍ଟରେ ନିଜର ଏକ ପାରିବାରିକ ଫଟୋ ଶେୟାର କରିଛନ୍ତି। ଏହି ଫଟୋରେ ସୋନାକ୍ଷୀ, ଶତ୍ରୁଘ୍ନଙ୍କ ପତ୍ନୀ ପୁଣମ ସିହ୍ନା ଏବଂ ତାଙ୍କ ୨ ପୁଅ ମଧ୍ୟ ନଜର ଆସିଛନ୍ତି। ସୋନାକ୍ଷୀ ତାଙ୍କ ପିତାଙ୍କୁ ଜନ୍ମଦିନରେ ଅଭିନନ୍ଦନ ଜଣାଇ କ୍ୟାପସନରେ ଲେଖିଛନ୍ତି, ’ଜନ୍ମଦିନର ଶୁଭେଚ୍ଛା ପାପା!’ସୋସିଆଲ ମିଡିଆରେ ଏହି ଫଟୋ ବେଶ ଭାଇରାଲ ହେବାରେ ଲାଗିଛି।
ସୂଚନାଯୋଗ୍ୟ, ଉଚ୍ଚ ସ୍ବର ଏବଂ ବଲିଉଡ ଚଳଚ୍ଚିତ୍ରରେ ନକାରାତ୍ମକ ଭୂମିକା ପାଇଁ ଶତ୍ରୁଘ୍ନ ବେଶ ପ୍ରଶଂସା ଲାଭ କରିଛନ୍ତି। ଶଟଗନ ଫିଲ୍ମ ’ପ୍ରେମ ପୂଜାରୀ’ ଜରିଆରେ ଶତ୍ରୁଘ୍ନ ବଲିଉଡରେ ଡେବ୍ୟୁ କରିଥିଲେ। ଏହାବ୍ୟତୀତ କାଳିଚରଣ, ବିଶ୍ୱନାଥ, ଦୋସ୍ତାନା ଏବଂ କ୍ରାନ୍ତି ଭଳି ଆଦି ଚଳଚ୍ଚିତ୍ରରେ ଚମତ୍କାର ଅଭିନୟ କରି ସେ ପ୍ରଶଂସକଙ୍କ ନିକଟତର ହୋଇଥିଲେ।
