ଜୋହାନ୍ସବର୍ଗ, ୧୬।୭- ଏକ କ୍ରିକେଟ୍ ପରିବାରରେ ଜନ୍ମଗ୍ରହଣ କରିଥିବା ଦକ୍ଷିଣ ଆଫ୍ରିକାର ମହାନ ଅଲ୍ରାଉଣ୍ଡର ସନ୍ ପୋଲକ ଗୁରୁବାର ୪୭ ବର୍ଷରେ ପଦାର୍ପଣ କରିଛନ୍ତି। ପୋଲକଙ୍କୁ ବିଶ୍ୱର ଅନ୍ୟତମ ଶ୍ରେଷ୍ଠ ଅଲ୍ରାଉଣ୍ଡର ଭାବେ ବିବେଚନା କରାଯାଏ। ନିଜର ଲାଇନ୍ ଓ ଲେନ୍ଥ ଲାଗି ସେ ଦକ୍ଷିଣ ଆଫ୍ରିକା କ୍ରିକେଟ୍ ଦଳର ଜଣେ ପ୍ରମୁଖ ବୋଲର ଭାବେ ନିଜକୁ ପ୍ରତିଷ୍ଠିିତ କରିପାରିଥିଲେ। ୨୦୦୩ ମସିହାରେ ଓ୍ବିଜଡେନ ପକ୍ଷରୁ ସେ ବର୍ଷର ଶ୍ରେଷ୍ଠ କ୍ରିକେଟର୍ ପୁରସ୍କାର ହାସଲ କରିଥିଲେ। ଜଣେ ବୋଲିଂ ଅଲ୍ରାଉଣ୍ଡର ଭାବେ ପୋଲକ ୧୯୯୫ରୁ ୨୦୦୮ ପର୍ଯ୍ୟନ୍ତ ଜାତୀୟ ଦଳ ପାଇଁ ୧୦୮ ଟେଷ୍ଟ ଓ ୩୦୩ ଏକଦିବସୀୟ ମ୍ୟାଚ୍ ଖେଳି ଯଥାକ୍ରମେ ୪୨୧ ଓ ୩୯୩ ଉଇକେଟ୍ ଅକ୍ତିଆର କରିଥିଲେ। ସେହିଭଳି ୧୨ ଟି୨୦ ମ୍ୟାଚ୍ରୁ ୧୫ ଉଇକେଟ୍ ନେଇଥିଲେ। ବ୍ୟାଟିଂରେ ମଧ୍ୟ ସେ ଉଲ୍ଳେଖନୀୟ ପ୍ରଦର୍ଶନ କରିଥିଲେ। ଟେଷ୍ଟରେ ୩,୭୮୧ ଓ ଏକଦିବସୀୟ ମ୍ୟାଚ୍ରେ ୩,୫୧୯ ରନ ତାଙ୍କ ନାମରେ ରହିଛି। ୨୦୦୦ ମସିହାରେ ଜାତୀୟ ଦଳର ନେତୃତ୍ୱ ନେଇଥିବା ପୋଲକ୍ କିନ୍ତୁ ୨୦୦୩ ବିଶ୍ୱକପ୍ରେ ଖରାପ ପ୍ରଦର୍ଶନ ଲାଗି ଅଧିନାୟକ ପଦ ହରାଇଥିଲେ। ଅବସର ପରେ ସେ ବିଶେଷଜ୍ଞ ଭାବେ ବିଭିନ୍ନ ମ୍ୟାଚ୍ର ବିଶ୍ଲେଷଣ କରୁଛନ୍ତି। ପୋଲକଙ୍କ ସମ୍ପର୍କରେ କିଛି ରୋଚକ କଥା ହେଉଛି ସେ ଗୋଟିଏ କ୍ରିକେଟ୍ ପରିବାରେ ଜନ୍ମଗ୍ରହଣ କରିଥିଲେ। ୧୯୬୦ ଦଶକରେ ତାଙ୍କ ବାପା ପିଟର୍ ମଧ୍ୟ ଦକ୍ଷିଣ ଆଫ୍ରିକା ଦଳ ପକ୍ଷରୁ ବୋଲର ଭାବେ ପ୍ରତିନିଧିତ୍ୱ କରିଥିଲେ। ସେହଭଳି ତାଙ୍କ ମାମୁଁ ଗ୍ରାଏମ୍ ମଧ୍ୟ ଜାତୀୟ ଦଳ ପକ୍ଷରୁ ଖେଳିଛନ୍ତି। ୨୦୦୭ ଆଫ୍ରୋ ଏସିଆ କପ୍ରେ ପୋଲକ୍ ୭ ନମ୍ବର ସ୍ଥାନରେ ବ୍ୟାଟିଂ କରିବାକୁ ଆସି ୧୩୦ ରନର ଏକ ପ୍ରଶଂସନୀୟ ଇନିଂସ ଖେଳିଥିଲେ। ଏହିକ୍ରମରେ ସେ ୭ ନମ୍ବର ସ୍ଥାନରେ ସର୍ବାଧିକ ବ୍ୟକ୍ତିଗତ ସ୍କୋର କରିବାରେ ମହମ୍ମଦ କୈଫଙ୍କ ରେକର୍ଡ ଭାଙ୍ଗିଥିଲେ। କିନ୍ତୁ ପୋଲକଙ୍କ ଏହି ରେକର୍ଡ ମାତ୍ର ୪ ଦିନ ତିଷ୍ଠି ରହିଥିଲା। ଭାରତର ମହେନ୍ଦ୍ର ସିଂ ଧୋନୀ ଏହି ରେକର୍ଡଙ୍କୁ ନିଜ ନାମରେ କରିଥିଲେ।
