ଆପଣ ନିଶ୍ଚିତ ଭାବରେ ଏହି କଥା ଶୁଣିଥିବେ ଯେ, ଜଣେ ମହିଳା ସବୁକିଛି ବାଣ୍ଟି ପାରିବେ କିନ୍ତୁ ପ୍ରେମ କିମ୍ବା ସ୍ବାମୀଙ୍କୁ କାହା ସହ ବାଣ୍ଟି ପାରିବେ ନାହିଁ। କିନ୍ତୁ ଜଣେ ମହିଳା ଏହି ଭାବନାକୁ ବଦଳାଇ ଦେଇଛନ୍ତି। ସେ ନିଜ ସ୍ବାମୀଙ୍କୁ ଦୁଇଜଣଙ୍କ ମଧ୍ୟରେ ବାଣ୍ଟି ଦେଇଛନ୍ତି। କଥାଟା ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ।
ଏହି ମହିଳା ଜଣକ ଯେତେବେଳେ ଛୋଟ ଥିଲେ ସେ ଭଉଣୀଙ୍କ ସହ ସବୁକିଛି ସମାନ ଭାବରେ ବାଣ୍ଟୁଥିଲେ। ଯେତେବେଳେ ସେ ବିବାହ କଲେ ଭଉଣୀମାନଙ୍କ ସହିତ ସ୍ବାମୀଙ୍କୁ ମଧ୍ୟ ବାଣ୍ଟି ଦେଲେ। କାରଣ ବଡ଼ ଭଉଣୀ ହିସାବରେ ସେ ଚାହୁଁଥିଲେ ମୋର ଯେଉଁଥିରେ ଅଧିକାର ଅଛି ମୋ’ ଭଉଣୀମାନଙ୍କର ମଧ୍ୟ ଅଛି। ଅର୍ଥାତ୍ ମହିଳା ଜଣକ ନିଜର ଦୁଇ ଭଉଣୀଙ୍କୁ ତାଙ୍କ ସ୍ବାମୀଙ୍କର ଆଉ ଦୁଇ ସ୍ତ୍ରୀ ଭାବରେ ରଖିବାର ସ୍ବୀକୃତି ଦେଇଛନ୍ତି। ଏମିତି କି ଏମାନଙ୍କ ମଧ୍ୟରେ କେବେ କଳି ଝଗଡ଼ା ଲାଗେ ନାହିଁ ବୋଲି ଏକ ସାକ୍ଷାତକାରରେ ମହିଳା ଜଣକ କହିଛନ୍ତି।
ଏପରି ଅଦ୍ଭୁତ ଘଟଣା ଦେଖିବାକୁ ମିଳିଛି ତାଞ୍ଜାନିଆରେ। ଏହି ମହିଳାଙ୍କ ନାମ ଖ୍ରୀଷ୍ଟିନା। ଆଶ୍ଚର୍ଯ୍ୟର କଥା ଖ୍ରୀଷ୍ଟିନା ତାଙ୍କ ପଦକ୍ଷେପ ପାଇଁ ଗର୍ବିତ। ସେ ଖୁସି ଯେ, ତାଙ୍କ ସ୍ବାମୀ ଦୁଇ ଭଉଣୀ ଏଲିନ ଏବଂ ତୁମାଙ୍କ ଯତ୍ନ ନିଅନ୍ତି। ତିନି ଭଉଣୀ ଗୋଟିଏ ଛାତତଳେ ଖୁସିରେ ରହୁଛନ୍ତି। କୌଣସି କଥାକୁ ନେଇ ବାଦ ବିବାଦ ନାହିଁ ବୋଲି ଖ୍ରୀଷ୍ଟିନା କୁହନ୍ତି। ତାଙ୍କ ସ୍ବାମୀଙ୍କ ନାମ ଓମ୍ବେନି। ୩ ଭଉଣୀଙ୍କର ମିଶି ୧୦ ସନ୍ତାନ ମଧ୍ୟ ଅଛନ୍ତି। ଓମ୍ବେନି ପିଲାମାନଙ୍କର ଦାୟିତ୍ୱ ବେଶ୍ ଭଲ ଭାବେ ତୁଲାଉଛନ୍ତି। ଅଭାବ ଅସୁବିଧାରେ ବଡ଼ ପରିବାର ଚଳାଇବାରେ କଷ୍ଟ ହେଉଥିଲେ ମଧ୍ୟ ସେସବୁକୁ କେହି ଖାତିର ନ କରି ନିଜ ନିଜ କାମ କରିଥାନ୍ତି।
ଖ୍ରୀଷ୍ଟିନା କୁହନ୍ତି, ଦିନେ ତାଙ୍କ ମନକୁ ଆସିଲା ଭଉଣୀମାନେ ବଡ଼ ହେଲେଣି ବିବାହ କରିବେ। କିନ୍ତୁ ଯଦି ମୋ’ ସ୍ବାମୀଙ୍କୁ ବିବାହ କରନ୍ତି ତେବେ ଆମେ ୩ ଭଉଣୀ ଖୁସିରେ ରହିବୁ। ଏଥିରେ ତାଙ୍କ ଭଉଣୀ ଦୁଇଜଣ ମଧ୍ୟ ଆପତ୍ତି ଉଠାଇ ନ ଥିଲେ। ସେମାନେ ଏହି ବିବାହରେ ରାଜି ହୋଇଯାଇଥିଲେ।
