ଓ୍ବାଶିଂଟନ,୪ା୧୨: ବିଜ୍ଞାନ ଯେ, ଅଗ୍ରଗତି କରିଛି ତାହା ଅସ୍ବୀକାର କରାଯାଇପାରେନା। କାରଣ ଆମେରିକାରେ ଏମିତି ଶିଶୁ ଜନ୍ମ ନେଇଛି ଯାହାର ବୟସ ୨୭ ବର୍ଷ। ଏପରିକି ସେ ତାଙ୍କ ମା’ଠାରୁ ମାତ୍ର ଦେଢ଼ ବର୍ଷ ସାନ। ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ।
ବାସ୍ତବ କଥା ହେଲା ଅକ୍ଟୋବର ୧୯୯୨ରେ ଭ୍ରୁଣ ରଖାଯାଇଥିଲା ଏବଂ ଫେବୃୟାରୀ ୨୦୨୦ରେ ଗିବସନ ପରିବାରର ଟିନା ଗିବସନ ନାମକ ଜଣେ ମହିଳାଙ୍କଠାରେ ଏହି ଭ୍ରୁଣକୁ ଟ୍ରାନ୍ସପ୍ଲାଣ୍ଟ କରାଯାଇଥିଲା। ଯାହା ପରେ ଚଳିତ ବର୍ଷ ଅକ୍ଟୋବରରେ ଜନ୍ମଲାଭ କରିଛି ଏକ କନ୍ୟା ସନ୍ତାନ।
୧୯୯୧ରେ ଆମେରିକାରେ ଜନ୍ମିତ ଟିନା ବେଞ୍ଜାମିନଙ୍କୁ ୧୦ ବର୍ଷ ତଳେ ବିବାହ କରିଥିଲେ। ଟିନାଙ୍କ ସ୍ବାମୀ ଜଣେ ସିଷ୍ଟିକ ଫାଇବ୍ରୋସିସ୍ ରୋଗୀ। ଏହି ରୋଗ ପିଲା ଜନ୍ମ ହେବାରେ ବାଧା ଦେଇଥାଏ। ୨୦୧୭ରେ ଟିନାଙ୍କ ମାତାପିତା ଏକ ଖବରକାଗଜରୁ ନ୍ୟାଶନାଲ ‘ଏମ୍ବ୍ରୋ ଡୋନେଶନ ସେଣ୍ଟର’ ନାମକ ଏକ ସଂସ୍ଥା ବିଷୟରେ ପଢ଼ିଥିଲେ। ଯାହା ମହିଳାମାନଙ୍କ ଭ୍ରୁଣ ଗ୍ରହଣ କରିବାରେ ସାହାଯ୍ୟ କରିଥାଏ। ପ୍ରଥମେ ଟିନା ଏହି କଥାକୁ ବିଶ୍ୱାସ କରି ନ ଥିଲେ। କିନ୍ତୁ ପରେ ସେ ସ୍ବାମୀଙ୍କ ସହ ଏହି ଅନୁଷ୍ଠାନକୁ ଯିବା ପାଇଁ ସ୍ଥିର କରିଥିଲେ।
ପେସାରେ ଟିନା ଜଣେ ଶିକ୍ଷକ। ପ୍ରଥମ ଝିଅର ଗର୍ଭକୁ ୨୦୧୭ ମସିହାରେ ସେ ଗ୍ରହଣ କରି ନଭେମ୍ବରରେ ଏମ୍ମାଙ୍କୁ ଜନ୍ମ ଦେଇଥିଲେ। ଗତ ୨୪ ବର୍ଷ ଧରି ଏମାନଙ୍କ ଆଉ ଏକ ଗର୍ଭସ୍ଥ ଶିଶୁକୁ ଫ୍ରିଜ୍ରେ ରଖାଯାଇଥିଲା। ଚଳିତବର୍ଷ ଅକ୍ଟୋବରରେ ଟିନାଙ୍କ ଆଉ ଏକ ଝିଅ ଜନ୍ମ ହୋଇଛି। ଯିଏ କି ବଡ଼ ଝିଅ ଏମ୍ମାଙ୍କ ରେକର୍ଡ ଭାଙ୍ଗିଛି। କାରଣ ଗତ ୨୭ ବର୍ଷ ଧରି ତାଙ୍କ ଭ୍ରୁଣ ଫ୍ରିଜ୍ରେ ରଖାଯାଇଥିଲା। ପ୍ରେଷ୍ଟନ ମେଡିକାଲ ଲାଇବ୍ରେରୀ ବିଶ୍ୱବିଦ୍ୟାଳୟର ଅନୁସନ୍ଧାନକାରୀଙ୍କ ଅନୁଯାୟୀ ଏହା ନିଜର ଏକ ରେକର୍ଡ। ଟିନାଙ୍କ ଦୁଇ ଝିଅ ଏହି ପ୍ରକ୍ରିୟାରେ ଜନ୍ମ ନେଇଛନ୍ତି।
ନ୍ୟାଶନାଲ ଭ୍ରୁଣଦାନ କେନ୍ଦ୍ରର ଲ୍ୟାବ୍ ନିର୍ଦ୍ଦେଶକ କାରୋଲ ସୋମର୍ଫେଲ୍ଡ ନ୍ୟୁୟର୍କ ପୋଷ୍ଟ ସହିତ ଭ୍ରୁଣ ତରଳାଇବାର ସମ୍ବେଦନଶୀଳ ପ୍ରକ୍ରିୟା ବିଷୟରେ କହିଥିଲେ। ଯେପର୍ଯ୍ୟନ୍ତ ଭ୍ରୁଣଗୁଡ଼ିକ ଏକ ତରଳ ନାଇଟ୍ରୋଜେନ୍ ଷ୍ଟୋରେଜ ଟ୍ୟାଙ୍କରେ ୩୯୬ ଡିଗ୍ରୀ ପର୍ଯ୍ୟନ୍ତ ସଠିକ୍ ଭାବରେ ରକ୍ଷଣାବେକ୍ଷଣ କରାଯାଏ। ଯେକୌଣସି ସମୟ ପାଇଁ ସେମାନେ ନିରାପଦରେ ରୁହନ୍ତି। ସେ ଆହୁରି ମଧ୍ୟ କହିଛନ୍ତି, ଏହା ଦେଖିବା ଆଶ୍ଚର୍ଯ୍ୟଜନକ ଯେ, ଅନେକ ବର୍ଷ ପୂର୍ବେ ଫ୍ରିଜ୍ ହୋଇଥିବା ଏହି ଗର୍ଭ ଏକ ଅତି ସ୍ନେହୀ ଶିଶୁ ଭାବରେ ଗ୍ରହଣ କରାଯାଇଛି।