ବାରଙ୍ଗ,୨୬।୬(ଡି.ଏନ୍.ଏ.): ପ୍ରେମ ପାଇଁ ନିଜ ମଥାର ସିନ୍ଦୂର ପୋଛିଲା ସ୍ତ୍ରୀ। ଭୁଲିଗଲା ସାତଜନ୍ମର ସମ୍ପର୍କକୁ। ପ୍ରେମିକ ସହ ମିଶି ଅଗ୍ନିକୁ ସାକ୍ଷୀ ରଖି ବିବାହ କରିଥିବା ସ୍ବାମୀକୁ ହତ୍ୟା କଲା। ବାରଙ୍ଗ ଥାନା ଅନ୍ତର୍ଗତ ନେତଲଗଁା ନିକଟ କାଜୁ ଜଙ୍ଗଲରୁ ବୁଧବାର ଗୋପାଳ ନାୟକଙ୍କ ମୃତଦେହ ମିଳିବା ଘଟଣାର ପର୍ଦ୍ଦାଫାଶ କରି ଏହି ସୂଚନା ଦେଇଛି କମିଶନରେଟ ପୋଲିସ। ଏହି ଘଟଣାର ମୁଖ୍ୟ ଅଭିଯୁକ୍ତ ତଥା ଗୋପାଳଙ୍କ ସ୍ତ୍ରୀ ଝୁମୁରୀ ନାୟକ ଓ ତାଙ୍କ ପ୍ରେମିକ ପୁରୀ ଜିଲା କାକଟପୁର ଥାନା ଅଞ୍ଚଳର ଜଗନ୍ନାଥ ଜେନାଙ୍କୁ ପୋଲିସ ଶନିବାର ଗିରଫ କରିଛି। ଏଥିସହ ଉଭୟଙ୍କୁ ବାରଙ୍ଗ ଥାନା ପୋଲିସ ଘଟଣାସ୍ଥଳକୁ ନେଇଥିଲା। ସେଠାରେ ଗୋପାଳଙ୍କୁ କିଭଳି ହତ୍ୟା କରିଥିଲେ ତାହାର ଡେମୋ ସେମାନେ ଦେଖାଇଥିଲେ।
ଅତିରିକ୍ତ ଡିସିପି ପ୍ରମୋଦ ରଥ ଘଟଣା ସମ୍ପର୍କରେ ଖବରଦାତା ସମ୍ମିଳନୀ ଜରିଆରେ ଦେଇଥିବା ସୂଚନା ଅନୁଯାୟୀ, ବାରଙ୍ଗ ଗୋଡ଼ିସାହି ଫାଣ୍ଡି ଅଧୀନ ଓମ୍ଫେଡ୍ ପଛପଟ କାଜୁ ଜଙ୍ଗଲରୁ ବୁଧବାର ଏକ ମୃତଦେହ ଉଦ୍ଧାର କରିଥିଲା ପୋଲିସ। ମୃତଦେହଟି ବାଙ୍କୀ ଗୟଳବାଙ୍କ ଗ୍ରାମରେ ଘରଜ୍ୱାଇଁ ଭାବେ ରହୁଥିବା ଜଟଣୀ ନୂଆଗଁାର ଗୋପାଳ ନାୟକଙ୍କ ବୋଲି ଜଣାପଡ଼ିଥିଲା। ମୃତଦେହ ନିକଟରେ ମହିଳାଙ୍କ ଗୋଟିଏ ଚପଲ ଓ ଏକ ରକ୍ତଛିଟା ଲାଗିଥିବା ପଥର ମିଳିଥିଲା। ତେବେ ଗୋପାଳଙ୍କ ଭାଇ ଗୋବିନ୍ଦ ଗତ ୨୧ ତାରିଖରେ ଭାଇ ନିଖୋଜ ଥିବା ନେଇ ଫାଣ୍ଡିରେ ଅଭିଯୋଗ କରିଥିଲେ। ହେଲେ ମୃତଦେହ ମିଳିବା ପରେ ଗୋପାଳଙ୍କୁ ତାଙ୍କ ସ୍ତ୍ରୀ ଝୁମୁରୀ ହତ୍ୟା କରିଥିବା ପୁନର୍ବାର ଅଭିଯୋଗ କରିବା ପରେ ବାରଙ୍ଗ ପୋଲିସ ଏକ ହତ୍ୟା ମାମଲା ରୁଜୁକରି ବ୍ୟବଚ୍ଛେଦ ରିପୋର୍ଟ ଅନୁଯାୟୀ ତଦନ୍ତ ଚଳାଇଥିଲା। ଅନ୍ୟପଟେ ସ୍ତ୍ରୀ ଝୁମୁରୀ ଗତ ୨୩ ତାରିଖରେ ସ୍ବାମୀ ମୃତ ଖବର ପାଇ ଫାଣ୍ଡିରେ ପହଞ୍ଚତ୍ଥିଲେ। ଏହାପରେ ପୋଲିସ ଝୁମୁରୀଙ୍କୁ ପଚରାଉଚରା କରିବା ପରେ ସେ ଦୋଷ ମାନିଥିଲେ। ପ୍ରେମ ପାଇଁ ପ୍ରେମିକ ସହ ମିଶି ସ୍ବାମୀଙ୍କ ଜୀବନ ନେଇଥିବା କଥା ପୋଲିସ ଆଗରେ ବଖାଣିଥିଲେ ା
ସୂଚନାଥାଉ କି, ପୂର୍ବରୁ ପାରିବାରିକ କଳହକୁ ନେଇ ଗୋପାଳ ଗାଳିଗୁଲଜ, ମାର୍ପିଟ କରୁଥିବାରୁ ଝୁମୁରୀ ନିକଟସ୍ଥ ତାଙ୍କ ସାଙ୍ଗ ଘରେ ଆଶ୍ରୟ ନେଉଥିଲେ। ସେ ପାଖରେ ରହୁଥିବା ଜଗନ୍ନାଥ ସହ ଦେଖାହୋଇ ପ୍ରେମସମ୍ପର୍କ ବଢ଼ିଥିଲା। ଏପରି କି ଗତ ୨୧ ତାରିଖରେ ଝୁମୁରୀ ଓ ଜଗନ୍ନାଥ ବିବାହ କରିବାକୁ ନିଷ୍ପତ୍ତି ନେଇଥିଲେ। ଉଭୟେ ତ୍ରିଶୂଳିଆ ଛକରେ ଥିବା ଜାଣି ଗୋପାଳ ଏକ ସ୍କୁଟି ଧରି ସେଠାରେ ପହଞ୍ଚତ୍ଥିଲେ। ସେଠାରେ ୩ ଜଣଙ୍କ ମଧ୍ୟରେ ପାଟିତୁଣ୍ଡ ହେବାରୁ ସ୍ଥାନୀୟ ଲୋକମାନେ ହସ୍ତକ୍ଷେପ କରି ଗଁାକୁ ଯାଇ ଭଦ୍ରଲୋକଙ୍କ ଉପସ୍ଥିତିରେ ଘଟଣା ସମାଧାନ କରିଥିଲେ। ଏହାପରେ ୩ ଜଣ ଯାକ ସେହି ସ୍କୁଟିରେ ସେଠାରୁ ଆସିଥିଲେ। ହେଲେ ବାଟରେ ଗୋପାଳଙ୍କୁ ମାରିବା ପାଇଁ ଉଭୟେ ଯୋଜନା କରିଥିଲେ। ଶ୍ରୀ ଶ୍ରୀ ୟୁନିଭର୍ସିଟି ପାଖ ଓମ୍ଫେଡ୍ ନିକଟରେ ପହଞ୍ଚତ୍ବାବେଳେ ଝୁମୁରୀ ସ୍କୁଟି ରୋକିବାକୁ ସ୍ବାମୀଙ୍କୁ କହିବା ସହ ଏକ ଜରୁରୀ କଥା ଅଛି କହି କାଜୁ ଜଙ୍ଗଲକୁ ନେଇଥିଲେ। ସେଠାରେ ପୁଣି ପାଟିତୁଣ୍ଡ ହେବାରୁ ପ୍ରେମିକ ଜଗନ୍ନାଥ ସହ ମିଶି ଝୁମୁରୀ ଏକ ପଥରରେ ଗୋପାଳଙ୍କ ଶରୀରକୁ ଛେଚି ହତ୍ୟା କରିଥିଲେ। ହତ୍ୟା କରିବା ପରେ ଭୟରେ ସେହି ସ୍ଥାନରୁ ଉଭୟ ଫେରାର ହୋଇଯାଇଥିଲେ।