ପାତ୍ରପୁର,୨୫ା୫(ଡି.ଏନ.ଏ.): ଗଞ୍ଜାମ ଜିଲା ଜରଡ଼ା ଥାନା ସାମନ୍ତରାପୁର ଗ୍ରାମରେ ମଙ୍ଗଳବାର ଏକ ଅଭାବନୀୟ ଘଟଣା ଘଟିଛି। ପ୍ରେମକୁ ଦୁଇ ପରିବାରର ଅନୁମତି ନ ମିଳିବାରୁ ପ୍ରଥମେ ପ୍ରେମିକଙ୍କ ପରେ ପ୍ରେମିକା ଆତ୍ମହତ୍ୟା କରିଛନ୍ତି। ସାମନ୍ତରାପୁର ଗ୍ରାମର ଯୁବତୀ ଓ ଯୁବକ ପରସ୍ପରକୁ ଦୀର୍ଘ ଦିନ ଧରି ଭଲ ପାଉଥିଲେ। ସାରା ଜୀବନ ଏକାଠି ବିତାଇବେ ବୋଲି ଉଭୟ ବିବାହ କରିବାକୁ ନିଷ୍ପତ୍ତି ନେଇଥିଲେ। ଏଥିପାଇଁ ସେମାନେ ପରିବାର ଲୋକଙ୍କୁ ଅନୁମତି ମାଗିଥିଲେ। ହେଲେ ସେମାନଙ୍କ ପ୍ରେମକୁ କେହି ବୁଝି ନ ପାରି ସମ୍ପର୍କରେ ପୂର୍ଣ୍ଣଚ୍ଛେଦ ପକାଇଦେଇଥିଲେ। ପରିବାର ଲୋକଙ୍କଠାରୁ ବିବାହ ପାଇଁ ଅନୁମତି ନ ମଳିବାରୁ ପ୍ରେମୀଯୁଗଳ ସବୁବେଳେ ମାନସିକ ଚିନ୍ତାରେ ରହୁଥିଲେ। ସୋମବାର ରାତିରେ ପୁଣି ସେମାନେ ନିଜ ନିଜ ପରିବାରରେ ବିବାହ କରିବାକୁ ନିବେଦନ କରିଥିଲେ ମଧ୍ୟ ଘର ଲୋକେ ମନା କରିଦେଇଥିଲେ। ଫଳରେ ମଙ୍ଗଳବାର ଭୋର୍ରେ ଯୁବକ ଜଣକ ଗ୍ରାମର ଏକ ଆମ୍ବ ଗଛରେ ଦଉଡ଼ି ଲଗାଇ ଆତ୍ମହତ୍ୟା କରିଥିଲେ। ଖବର ପାଇ ଯୁବତୀ ଜଣକ ସେଠାରେ ପହଞ୍ଚତ୍ ଯୁବକଙ୍କ ଗୋଡ଼କୁ ଧରି କାନ୍ଦିଥିଲେ। ହେଲେ ମୃତ ଯୁବକଙ୍କ ପରିବାର ଲୋକ ଆସି ମୋ ପୁଅ ତୋ ପାଇଁ ଆତ୍ମହତ୍ୟା କରିଛି ବୋଲି ଯୁବତୀଙ୍କୁ ଗାଳି କରିଥିଲେ। ଏହା ଶୁଣି ଯୁବକଙ୍କ ମୃତ୍ୟୁର ଘଣ୍ଟାଏ ପରେ ଯୁବତୀ ମଧ୍ୟ ଅନ୍ୟ ଏକ ଗଛରେ ଚୁନି ବାନ୍ଧି ଆତ୍ମହତ୍ୟା କରିଥିଲେ। ଜରଡ଼ା ଥାନା ପୋଲିସ ପହଞ୍ଚତ୍ ଉଭୟଙ୍କ ଝୁଲନ୍ତା ମୃତଦେହ ଜବତ କରି ନଂ.୯,୧୦/୨୨ରେ ଏକ ଅପମୃତ୍ୟୁ ମାମଲା ରୁଜୁ କରିଛି। ମୃତଦେହ ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ଼ ମେଡିକାଲ ପଠାଯାଇଛି। ପ୍ରେମୀଯୁଗଳଙ୍କ ମୃତ୍ୟୁ ନେଇ ଜରଡ଼ା ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି।
