ଦୁବାଇ, ୮।୭(ପି.ଟି.)- ଭାରତର ଟିନ୍ ବ୍ୟାଟିଂ ସେନ୍ସେଶନ ଶେଫାଳି ବର୍ମା ଏବଂ ଅଲ୍ରାଉଣ୍ଡର ସ୍ନେହ ରାଣାଙ୍କ ନାମ ଆଇସିସି ମହିଳା ପ୍ଲେୟର ଅଫ୍ ଦି ମନ୍ଥ (ଜୁନ୍ ମାସ) ପାଇଁ ସୁପାରିସ ହୋଇଛି। ଚଳିତ ଇଂଲଣ୍ଡ ବିପକ୍ଷ ସିରିଜରେ ଏ ଦୁହେଁ ପ୍ରଭାବୀ ପ୍ରଦର୍ଶନ କରିଥିଲେ। ଭାରତର ଏହି ଦୁଇ ଖେଳାଳିଙ୍କ ବ୍ୟତୀତ ଇଂଲଣ୍ଡର ବାମହାତୀ ସ୍ପିନର ସୋଫି ଏକଲେଷ୍ଟୋନଙ୍କ ନାମ ମଧ୍ୟ ତାଲିକାରେ ରହିଛି। ପୁରୁଷ ଖେଳାଳିଙ୍କ ମଧ୍ୟରେ ନ୍ୟୁଜିଲାଣ୍ଡର ଡେଭନ କନ୍ଓ୍ବେ ଏବଂ ପେସ୍ ବୋଲର କାଏଲ ଜେମିସନ ଏବଂ ଦକ୍ଷିଣ ଆଫ୍ରିକା ଉଇକେଟ କିପର କ୍ୱିଣ୍ଟନ ଡି’କକ୍ ଏହି ଦୌଡ଼ରେ ସାମିଲ ହୋଇଛନ୍ତି। ସୀମିତ ଓଭର କ୍ରିକେଟରେ ସମସ୍ତଙ୍କ ପ୍ରଭାବିତ କରିଥିବା ୧୭ ବର୍ଷୀୟା ସେଫାଳି ବ୍ରିଷ୍ଟଲରେ ଅନୁଷ୍ଠିତ ଇଂଲଣ୍ଡ ବିପକ୍ଷ ଟେଷ୍ଟ ପଦାର୍ପଣରେ ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଥିଲେ। ଏହି ଟିନ୍ଏଜ୍ ସେନ୍ସେଶନ ଭାରତର ପ୍ରଥମ ଏବଂ ବିଶ୍ୱର ୪ର୍ଥ ଖେଳାଳିଭାବେ ଟେଷ୍ଟ ପଦାର୍ପଣର ଉଭୟ ଇନିଂସରେ ଅର୍ଦ୍ଧଶତକ ହାସଲ କରିଥିଲେ। ସେ ଯଥାକ୍ରମେ ୯୬ ଓ ୬୩ ରନ ସ୍କୋର କରିଥିଲେ। ଅଲରାଉଣ୍ଡର ରାଣା ମଧ୍ୟ ଟେଷ୍ଟ ପଦାର୍ପଣରେ ଧୈର୍ଯ୍ୟପୂର୍ଣ୍ଣ ବ୍ୟାଟିଂ କରି ଭାରତକୁ ପରାଜୟରୁ ରକ୍ଷା କରିଥିଲେ। ଭାରତ ଫଲୋଅନ ଡାକରା ପାଇ ଦ୍ୱିତୀୟ ଇନିଂସ ଖେଳିଥିବାବେଳେ ସ୍ନେହ ୧୫୪ଟି ବଲ୍ର ସମ୍ମୁଖୀନ ହୋଇ ୮୦ ରନରେ ଅପରାଜିତ ରହି ଇଂଲଣ୍ଡ ବୋଲରଙ୍କୁ ନିରାଶ କରିଥିଲେ। ବୋଲିଂରେ ସେ ୧୩୧ ରନ ବିନିମୟରେ ୪ ଉଇକେଟ ସଫଳତା ପାଇଥିଲେ।