ନୂଆଦିଲ୍ଲୀ,୧୪।୫(ପି.ଟି.): ଭାରତୀୟ ମହିଳା ବ୍ୟାଟିଂ ସେନ୍ସେସନ ଶେଫାଳୀ ବର୍ମା ଓମ୍ୟାନ ବିଗ୍ବାସ ଲିଗ୍ (ଡବ୍ଲ୍ୟୁବିବିଏଲ୍)ରେ ପଦାର୍ପଣ କରିବେ। ଦୁଇଥର ଚାମ୍ପିୟନ ହେବାର ଗୌରବ ଅର୍ଜନ କରିଥିବା ସିଡ୍ନୀ ସିକ୍ସର ତରଫରୁ ସେ ଚଳିତବର୍ଷ ଶେଷ ଆଡକୁ ଏହି ହାଇପ୍ରୋଫାଇଲ ଲିଗ୍ରେ ପ୍ରଥମଥର ପାଇଁ ଖେଳିବେ। ସେହିପରି ମହିଳା ସ୍ପିନର ରାଧା ଯାଦବ ସିଡ୍ନୀ ତରଫରୁ ଏହି ଲିଗ୍ରେ ପଦାର୍ପଣ କରିବେ।
୧୭ ବର୍ଷୀୟା ଶେଫାଳୀଙ୍କ ସହ ସିଡ୍ନୀର ଚୁକ୍ତି ହୋଇସାରିଛି। ଡବ୍ଲ୍ୟୁବିବିଏଲ୍ର କାର୍ଯ୍ୟସୂଚୀ ପ୍ରକାଶିତ ହେଲେ ଏ ନେଇ ଘୋଷଣା କରାଯିବ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତରଫରୁ କୁହାଯାଇଛି। ରାଧା ମଧ୍ୟ ସିଡ୍ନୀ ସିକ୍ସର ସହ ଆଲୋଚନା ଜାରି ରଖିଛନ୍ତି। ଶେଫାଳୀ ଏବେ ନାବାଳିକା ଥିବାରୁ ତାଙ୍କ ପିତା ଏକ ଅନୁମତି ପତ୍ରରେ ସ୍ବାକ୍ଷର କରିବାର ଆବଶ୍ୟକତା ରହିଛି। ପୂର୍ବରୁ ଭାରତୀୟ ମହିଳା ଟି୨୦ ଅଧିନାୟିକା ହରମନପ୍ରୀତ କୌର (ସିଡ୍ନୀ ଥଣ୍ଡର), ଓପନର ସ୍ମୃତି ମାନ୍ଧନା (ବ୍ରିସ୍ବେନ ହିଟ୍) ଓ ଅଲରାଉଣ୍ଡର ବେଦା କ୍ରିଷ୍ଣମୂର୍ତ୍ତୀ (ହୋବାର୍ଟ ହରିକେନ୍ସ) ଡବ୍ଲ୍ୟୁବିବିଏଲ୍ରେ ଅଂଶଗ୍ରହଣ କରିସାରିଛନ୍ତି।
ବିଶ୍ୱର ୧ ନମ୍ବର ଟି୨୦ ବ୍ୟାଟର ଶେଫାଳୀ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ଦ୍ୱାରା ଆୟୋଜିତ ‘ଦି ହଣ୍ଡ୍ରେଡ୍’ ତଥା ୧୦୦ ବଲ ଘରୋଇ ଟୁର୍ନାମେଣ୍ଟରେ ବର୍ମିଂହାମ ଫୋନିକ୍ସ ତରଫରୁ ଖେଳିବାର ସମ୍ଭାବନା ରହିଛି। ତେବେ କୋଭିଡ୍-୧୯ ମହାମାରୀ କାରଣରୁ ଏହି ଟୁର୍ନାମେଣ୍ଟ ସ୍ଥଗିତ ରହିଥିଲା। ଏହା ବର୍ତ୍ତମାନ ଜୁଲାଇ ୨୧ରୁ ଆରମ୍ଭ ହେବ। ‘ଦି ହଣ୍ଡ୍ରେଡ୍’ ଶେଫାଳୀଙ୍କ କ୍ୟାରିୟରର ପ୍ରଥମ ବିଦେଶୀ ଟୁର୍ନାମେଣ୍ଟ ସାବ୍ୟସ୍ତ ହେବ। ଶେଫାଳୀ ଜଣେ ବିସ୍ଫୋରକ ବ୍ୟାଟ୍ସଓମ୍ୟାନ ଭାବେ ବେଶ୍ ଜଣାଶୁଣା। ୨୨ଟି ଅନ୍ତର୍ଜାତୀୟ ମ୍ୟାଚ୍ ଖେଳି ସେ ୧୪୮. ୩୧ ଷ୍ଟ୍ରାଇକ୍ ରେଟ୍ରେ ୬୧୭ ରନ ସଂଗ୍ରହ କରିଛନ୍ତି।