ଇସଲାମାବାଦ,୨୭।୧୨ : ପାକିସ୍ତାନ ଖାଇବର ପାସ୍ତୁନଖ୍ବା ଏବଂ ବାଲୁଚିସ୍ତାନ ପ୍ରଦେଶରେ ଆତଙ୍କବାଦ ବୃଦ୍ଧି ନେଇ ପ୍ରଧାନମନ୍ତ୍ରୀ ଶେହବାଜ ଶରିଫ ଏକ ବଡ଼ ମନ୍ତବ୍ୟ ଦେଇଛନ୍ତି। ଖାଇବର ଡେରା ଇସମାଇଲ ଖାନ ଜିଲାରେ ଏକ ସମାବେଶକୁ ସମ୍ବୋଧିତ କରି ସେ ଆତଙ୍କବାଦକୁ ଶେଷ କରିବେ ବୋଲି ଦୋହରାଇଛନ୍ତି।
ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ଗତ ଆଠ ମାସ ମଧ୍ୟରେ ଆତଙ୍କବାଦକୁ ରୋକିବାରେ ନୂଆ ସରକାର ବିଫଳ ହୋଇଥିବା ଅଭିଯୋଗ କରିଥିଲେ। ଏପ୍ରିଲରେ ନୂଆ ସରକାର ଗଠନ ହେବା ପରଠାରୁ ଆତଙ୍କବାଦୀ ଘଟଣାରେ ୫୨ ପ୍ରତିଶତ ବୃଦ୍ଧି ଘଟି ୨୭୦ଜଣଙ୍କ ଜୀବନ ଯାଇଥିବାବେଳେ ୫୫୦ରୁ ଅଧିକ ଆହତ ହୋଇଥିବା ଇମ୍ରାନ କହିଥିଲେ। ତେବେ ଶେହବାଜ ଇମ୍ରାନଙ୍କୁ ଏହାର ଜବାବ ଦେଇଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ ଦେଶର ସୁରକ୍ଷା ପରିସ୍ଥିତିକୁ ଅନୁଧ୍ୟାନ କରିବା ପାଇଁ କିଛି ଦିନ ମଧ୍ୟରେ ଜାତୀୟ ସୁରକ୍ଷା କମିଟି (ଏନଏସସି)ର ଏକ ବୈଠକ ଡକାଯିବ। ଗତ ସପ୍ତାହରେ ପାକିସ୍ତାନୀ ତାଲିବାନ (ଟିଟିପି) ଆତଙ୍କବାଦୀଙ୍କ ଦ୍ୱାରା ଖାଇବରର ବନ୍ନୁ ଜିଲାର ଏକ ସୁରକ୍ଷା କମ୍ପାଉଣ୍ଡରେ ହୋଇଥିବା ଆକ୍ରମଣରେ ପ୍ରଧାନମନ୍ତ୍ରୀ କହିଛନ୍ତି ଯେ ଏହା ହୃଦୟ ବିଦାରକ, କିନ୍ତୁ ସୁରକ୍ଷା ଏଜେନ୍ସି ଏକ ସଫଳ ଅପରେଶନ କରି ସମସ୍ତ ଆତଙ୍କବାଦୀଙ୍କୁ ହତ୍ୟା କରିଛନ୍ତି।