ଭୁବନେଶ୍ୱର, ୨୩।୪(ବ୍ୟୁରୋ): ଲକ୍ଷ୍ମୀସାଗର ଥାନା ହଳଦିପଡ଼ିଆ ବସ୍ତିରୁ ମୋଷ୍ଟ ଓ୍ବାଣ୍ଟେଡ ବ୍ରାଉନ୍ସୁଗାର ବେପାରୀ ସେକ୍ ଜାମ୍ସେଦ୍ଙ୍କୁ କ୍ରାଇମ୍ବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ଗିରଫ କରିଛି। ଜାମସେଦ୍ ହେଉଛନ୍ତି ଜେଲରେ ଥିବା ନିଶା ବେପାରୀ ଶିବ ପ୍ରସାଦ ଦାସ ଓରଫ ଶିବୁଙ୍କ ଘନିଷ୍ଠ ସହଯୋଗୀ। ଜାମ୍ସେଦ୍ଙ୍କୁ ଶୁକ୍ରବାର ଏସ୍ଟିଏଫ୍ ଭୁବନେଶ୍ୱର ଏସ୍ଡିଜେଏମ୍ କୋର୍ଟକୁ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଅଭିଯୁକ୍ତ ଜାମ୍ସେଦ୍ ଦୁଇଟି ମାମଲାରେ ଏସ୍ଟିଏଫ୍ ପାଇଁ ୱାଣ୍ଟେଡ୍ ଥିଲେ। ତାଙ୍କ ନାମରେ ଏସ୍ଟିଏଫ୍ ବ୍ୟତୀତ ଲାଲବାଗ୍ ଓ ବାଲିଅନ୍ତା ଥାନାରେ ମଧ୍ୟ ଗୋଟିଏ ଲେଖାଏ ମାମଲା ରହିଛି।
ସୂଚନାନୁଯାୟୀ, ଶିବୁ ମାଛ ବ୍ୟବସାୟ ଆଳରେ ନୟାଗଡ଼ ଜିଲା ଉଦୟପଥ ଲେନ୍ରେ ଘରଭଡ଼ା ନେଇ ରହିବା ସହ ଜାମ୍ସେଦ୍ ଓ ଅନ୍ୟ ସହଯୋଗୀଙ୍କ ମାଧ୍ୟମରେ ବ୍ରାଉନ୍ସୁଗାର ହୋଲ୍ସେଲ୍ କରୁଥିଲେ। ଏସ୍ଟିଏଫ୍ ସୂଚନା ପାଇବା ପରେ ଜାନୁୟାରୀ ୨୫ ରାତିରେ ସେଠାରେ ଚଢ଼ାଉ କରିଥିଲା। ହେଲେ ଶିବୁ ଖସିଯାଇଥିଲେ ମଧ୍ୟ ସହଯୋଗୀ ଭିକି ରାଓଙ୍କୁ ଏସ୍ଟିଏଫ୍ ଗିରଫ କରିବା ସହ ଉକ୍ତ ଘରୁ ୩ କେଜି ୧୦୦ ଗ୍ରାମ୍ ବ୍ରାଉନ୍ସୁଗାର, ୬୫ଲକ୍ଷ ୩୨ ହଜାର ଟଙ୍କା, ୩ ପିସ୍ତଲ ଓ ଅନ୍ୟାନ୍ୟ ସାମଗ୍ରୀ ଜବତ କରିଥିଲା। ଫେବୃୟାରୀ ୨୦ ବିଳମ୍ବିତ ରାତିରେ ୧୬ ନଂ. ଜାତୀୟ ରାଜପଥର ପାହାଳ କ୍ରସିଂ ନିକଟରୁ ଶିବୁଙ୍କୁ ଗିରଫ କରାଯାଇଥିଲା। ତାଙ୍କଠାରୁ ଗୋଟିଏ ବାଇକ୍ ସହ ୧ କେଜି ୨୨୭ ଗ୍ରାମ୍ ବ୍ରାଉନ୍ସୁଗାର ଜବତ କରାଯାଇଥିଲା। ହେଲେ ସେଠାରୁ ସହଯୋଗୀ ସେକ୍ ଜାମ୍ସେଦ୍ ଖସି ପଳାଇଥିଲେ। ଏସ୍ଟିଏଫ୍ ମାମଲା(ନଂ.୫/୨୦୨୨) ରୁଜୁ କରି ଶିବୁଙ୍କୁ କୋର୍ଟଚାଲାଣ କରିବା ପରେ ଜାମ୍ସେଦ୍ଙ୍କୁ ଧରିବାକୁ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଥିଲା।