ନୂଆଦିଲ୍ଲୀ,୧୧।୬: ବିସିସିଆଇ ପକ୍ଷରୁ ଶ୍ରୀଲଙ୍କା ବିପକ୍ଷ ସୀମିତ ଓଭର କ୍ରିକେଟ ସିରିଜ ନେଇ ଗୁରୁବାର ୨୦ ଜଣିଆ ଭାରତୀୟ ଟିମ୍ର ଘୋଷଣା କରାଯାଇଥିଲା। ଅନେକ ଯୁବ କ୍ରିକେଟରଙ୍କୁ ଦଳରେ ସୁଯୋଗ ମିଳିଥିଲା। ହେଲେ ଏଥିରେ ଚୟନ ହୋଇ ନ ଥିବା ଯୋଗୁ ନିରାଶ ହୋଇଛନ୍ତି ଶେଲ୍ଡନ୍ ଜ୍ୟାକ୍ସନ।
ଭାରତୀୟ ଟିମ୍ ଶ୍ରୀଲଙ୍କାରେ ୩ ଦିନିକିଆ ଏବଂ ସମାନ ସଂଖ୍ୟକ ଟି-୨୦ ମ୍ୟାଚ୍ ଖେଳିବ। ସେଥିରୁ ଦିନିକିଆ ଲାଗି ଚୟନ ହେବା ଉଚିତ ଥିଲା ବୋଲି ଜ୍ୟାକ୍ସନ୍ କହିଛନ୍ତି। ହୃଦୟ ଭାଙ୍ଗିବାର ଇମୋଜି ସହ ନିଜର ଟୁଇଟରରେ ସେ ନିରାଶା ପ୍ରକଟ କରିଛନ୍ତି।
ଶ୍ରୀଲଙ୍କା ଗସ୍ତ ପାଇଁ ଭାରତୀୟ ଦଳରେ ଶିଖର ଧାଓ୍ବନ(ଅଧିନାୟକ), ଭୁବନେଶ୍ୱର କୁମାର(ଉପଅଧିନାୟକ), ପୃଥ୍ବୀ ଶ, ଦେବଦତ୍ତ ପଡ଼ିକାଲ, ଋତୁରାଜ ଗାଏକ୍ୱାଡ, ସୂର୍ଯ୍ୟକୁମାର ଯାଦବ, ମନୀଷ ପାଣ୍ଡେ, ହାର୍ଦ୍ଦିକ ପାଣ୍ଡ୍ୟା, ନୀତୀଶ ରାଣା, ଈଶାନ କିଶନ, ସଞ୍ଜୁ ସାମସନ, ୟୁଜବେନ୍ଦ୍ର ଚହଲ, ରାହୁଲ ଚହର, କ୍ରିଷ୍ଶାପ୍ପା ଗୋଥାମ, କୃନାଲ ପାଣ୍ଡ୍ୟା, କୁଲଦୀପ ଯାଦବ, ବରୁଣ ଚକ୍ରବର୍ତ୍ତୀ, ଦୀପକ ଚହର, ନବଦୀପ ସଇନୀ, ଚେତନ ସାକାରିଆଙ୍କୁ ସୁଯୋଗ ମିଳିଛି। ହେଲେ ୩୪ ବର୍ଷୀୟ ଜ୍ୟାକ୍ସନ ଆଶାବାଦୀ ଥିବା ସତ୍ତ୍ୱେ ତାଙ୍କର ଚୟନ ହୋଇନାହିଁ।
ପ୍ରକାଶ ଯେ, ରଣଜୀ ଟ୍ରଫିର ଗୋଟିଏ ସଂସ୍କରଣରେ ଚାରି ଥର ୭୫୦ରୁ ଅଧିକ ରନ୍ କରିଥିବା ଖେଳାଳିଙ୍କ ମଧ୍ୟରୁ ଜ୍ୟାକ୍ସନ ଜଣେ। ହେଲେ ତାଙ୍କୁ ଲଗାତାର ଭାବେ ଅଣଦେଖା କରାଯାଇ ଭାରତ ଏ ଟିମ୍ରେ ଚୟନ ହୋଇ ନ ଥିଲା। ଏହାକୁ ନେଇ ସେ ନିକଟରେ ବିସିସିଆଇର ଚୟନକର୍ତ୍ତାଙ୍କ ଉପରେ ବିଭିନ୍ନ ଦୋଷ ଲଦିଥିଲେ। ୩୪ ବର୍ଷର ହୋଇ ମଧ୍ୟ ୨୨-୨୩ ବର୍ଷର ଖେଳାଳିଙ୍କଠାରୁ ଭଲ ପ୍ରଦର୍ଶନ କରୁଛି। ହେଲେ ରାଷ୍ଟ୍ରୀୟ ଟିମ୍ ପାଇଁ ଚୟନ ହେବା ଲାଗି ଯୋଗ୍ୟ କ’ଣ ପାଇଁ ନୁହେଁ? କେଉଁମାନେ ଏହା ଚୟନ କରନ୍ତି? କେଉଁ ପଦ୍ଧତିରେ ଚୟନ କରାଯାଉଛି? ରଣଜୀ ସ୍କୋର ଦ୍ୱାରା ନା ଫିଟ୍ନେସ? ଦୁଇରୁ ତିନି ସିଜନ ଧରି ୮୦୦ରୁ ଅଧିକ ରନ୍ ସ୍କୋର କରିବା ଅର୍ଥ ଫିଟ୍ ଥିବା। ନଚେତ ପଡ଼ିଆରେ ଏତେ ସମୟ ଧରି ରହିବା ମୁସ୍କିଲ। ଅନେକ ଥର ୩୦ ବର୍ଷ ହୋଇଥିବା ଶୁଣିବାକୁ ମିଳୁଛି। ହେଲେ କ’ଣ ଏଭଳି ଅଛି ଯେଉଁଥିରେ ଆପଣଙ୍କ ଚୟନ ହୋଇପାରିବ ନାହିଁ ବୋଲି ସେ କହିଥିଲେ।