ଚମ୍ପୁଆ, ୧।୫ (ଡି.ଏନ.ଏ.)-ଘର ଭାଙ୍ଗି ଯାଇଥିବାରୁ ଯେକୌଣସି ମୁହୂର୍ତ୍ତରେ ଜୀବନ ପ୍ରତି ବିପଦ ଆଶଙ୍କା ରହିଛି। ଅର୍ଥ ଅଭାବ ଯୋଗୁ ଘରେ ଖଣ୍ଡେ କରିବା ତାଙ୍କ ପକ୍ଷେ କଷ୍ଟକର। ବହୁ କଷ୍ଟରେ ପିଲାଙ୍କ ପାଇଁ ଖାଦ୍ୟ ଯୋଗାଡ଼ କରିପାରୁଛନ୍ତି। ଏପରି ସ୍ଥିତିରେ ନିଜେ ଘରଟିଏ ତିଆରି କରିବା ସ୍ବପ୍ନ। ଏଣୁ ଦିନରେ ଏହି ଭଙ୍ଗା ଘରେ କାରବାର କରୁଥିଲେ ହେଁ ଘର ଭାଙ୍ଗି ପଡ଼ିଯିବା ଭୟରେ ଦୁଇପୁଅଙ୍କ ସହ ପର ଘରେ ରାତିରେ ମୁଣ୍ଡ ଗୁଞ୍ଜୁଥିବା କୋହଭରା କଣ୍ଠରେ କହିଥିଲେ ଅସହାୟ ମଞ୍ଜୁ ପୂର୍ତ୍ତି।
କେନ୍ଦୁଝର ଜିଲା ଚମ୍ପୁଆ ଏନ୍ଏସିର ୧୩ ନଂ ୱାର୍ଡ ରାମଲା ଗ୍ରାମରେ ବସବାସ କରୁଛନ୍ତି ମଞ୍ଜୁ। ସ୍ବାମୀ ଦୁର୍ଗାଚରଣ ପାରାଲିସିସ୍ରେ ଆକ୍ରାନ୍ତ ହୋଇ ୩ ବର୍ଷ ତଳେ ଆରପାରିକୁ ଚାଲିଗଲେ। ମଞ୍ଜୁ ଦୁଇପୁଅ ନରେନ୍ଦ୍ର (୭) ଏବଂ ମଣ୍ଟୁ (୪)ଙ୍କ ସହ ଏଠାରେ ରହୁଛନ୍ତି। ଦୁଇଛୁଆଙ୍କୁ ମଣିଷ କରିବାର ସ୍ବପ୍ନ ନେଇ ଦିନମଜୁରିଆ ଭାବେ କାମ କରୁଛନ୍ତି। ଏଥିରୁ ମିଳୁଥିବା ଟଙ୍କାରେ ପିଲାଙ୍କୁ ଦାନା ଯୋଗାଇ ପାରୁଛନ୍ତି। ଘରଟିକୁ ଛାଡ଼ି ଦେଲେ ଅନ୍ୟ କିଛି ସମ୍ବଳ ନାହିଁ। ହେଲେ ଗରିବ ଶ୍ରେଣୀର ଏହି ପରିବାର ଉପରେ ବୋଝ ଉପରେ ନଳିତା ବିଡ଼ା ଭଳି ବର୍ଷକ ତଳେ ପ୍ରବଳ ବର୍ଷାରେ ମାଟିଘର ଖଣ୍ଡିକ ଦବି ଯାଇଥିବା ବେଳେ କାନ୍ଥ ଫାଟି ଅଁା କରିଛି। ବାଉଁଶ ଠେସା ଦେଇ ଘରକୁ ରଖାଯାଇଥିଲେ ମଧ୍ୟ କେତେବେଳେ ବି ପଡ଼ିଯିବାର ଆଶଙ୍କା ରହିଛି। ଫଳରେ ଦିନରେ ଭଙ୍ଗାଘରେ ଚଳି ଯାଉଥିବା ବେଳେ ରାତି ହେଲେ ମୁଣ୍ଡ ଗୁଞ୍ଜିବା ଚିନ୍ତା ଘାରୁଛି। କାନ୍ଥ ପଡ଼ିଯିବା ଭୟରେ ଗଁାର ପରିଚିତଙ୍କ ଘରେ ରାତି କାଟୁଥିବା ମଞ୍ଜୁ କହିଛନ୍ତି। ଆଜି ପର୍ଯ୍ୟନ୍ତ ବିଧବା ଭତ୍ତା ବା ସମାଜ ମଙ୍ଗଳ ସହାୟତା ପାଇବାରୁ ସେ ବଞ୍ଚିତ ବୋଲି କହନ୍ତି। ତାଙ୍କୁ ପ୍ରଶାସନ ପକ୍ଷରୁ ଆବାସ ଯୋଜନାରେ ଘର ମିଳିଲେ ସେ ଦୁଇଛୁଆଙ୍କ ସହ ସୁବିଧାରେ ରହିପାରନ୍ତେ ବୋଲି ଆଶାବ୍ୟକ୍ତ କରିଛନ୍ତି। ଏ ସମ୍ପର୍କରେ ଏନ୍ଏସି ନିର୍ବାହୀ ଅଧିକାରୀ ଗୌରହରି ମହାନ୍ତଙ୍କୁ ପଚାରିବାରୁ ତୁରନ୍ତ ଭତ୍ତା ପ୍ରଦାନ ପାଇଁ କର୍ମଚାରୀଙ୍କୁ ମଞ୍ଜୁଙ୍କ ଘରକୁ ପଠାଇବା ସହ ଉପରିସ୍ଥ ଅଧିକାରୀଙ୍କ ସହିତ ଆଲୋଚନା କରି ଆବାସ ଯୋଗାଇ ଦିଆଯିବ ବୋଲି କହିଛନ୍ତି।
