ବେଙ୍ଗାଲୁରୁ,୨୬।୪ : କର୍ନାଟକରେ ବିଧାନସଭା ନିର୍ବାଚନ ପାଖେଇ ଆସୁଥିବାରୁ ରାଜନେତାଙ୍କ ମଧ୍ୟରେ ଆରୋପ ପ୍ରତ୍ୟାରୋପ ତୀବ୍ର ହେବାରେ ଲାଗିଛି। ଏହିକ୍ରମରେ କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ତଥା ଭେଟେରାନ ଭାଜପା ନେତା ବିଏସ ୟେଦୁରପ୍ପା କଂଗ୍ରେସରେ ଯୋଗ ଦେଇଥିବା ପୂର୍ବତନ ମୁଖ୍ୟମନ୍ତ୍ରୀ ଜଗଦୀଶ ଶେଟ୍ଟାରଙ୍କୁ କଡ଼ା ସମାଲୋଚନା କରିଛନ୍ତି। ହୁବଲିରେ ଏକ ନିର୍ବାଚନୀ ବୈଠକକୁ ସମ୍ବୋଧିତ କରି ସେ କହିଛନ୍ତି ମୁଁ ନିଜ ରକ୍ତରେ ଲେଖି ଦେବି ଜଗଦୀଶ ଶେଟ୍ଟାର ଏଠାରୁ କେବେ ବି ଜିତିବେ ନାହିଁ।
ଶେଟ୍ଟାରଙ୍କୁ ଜଣେ ବିଧାୟକ, ମନ୍ତ୍ରୀ, ବିଧାନସଭା ବାଚସ୍ପତି, ବିଧାନସଭାରେ ବିରୋଧୀଦଳର ନେତା ତଥା ମୁଖ୍ୟମନ୍ତ୍ରୀ ଭାବରେ ଭାଜପା ପ୍ରାଧାନ୍ୟ ଦେଇଛି। କିନ୍ତୁ ସେ ଦଳ ପ୍ରତି ପ୍ରତାରଣା କରିଛନ୍ତି, ବିଶ୍ୱାସ ଭାଙ୍ଗିଛନ୍ତି ତେଣୁ ଶେଟ୍ଟାର କୌଣସି ମୂଲ୍ୟରେ ଜିତିବା ଉଚିତ ନୁହେଁ। ୟେଦୁରୁପ୍ପା କହିଛନ୍ତି, ସେ ନିଜେ ହୁବଲିରେ ଏକ ରାଲି ଏବଂ ରୋଡ ଶୋ କରିବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ହୁବଲିକୁ ପ୍ରଚାର ପାଇଁ ଆସିବେ। ଶେଟ୍ଟାରଙ୍କୁ ପରାସ୍ତ କରିବାକୁ ଦଳ ମିଳିତ ଭାବେ କାର୍ଯ୍ୟ କରିବ।
କର୍ନାଟକର ହୁବଲି ଧରୱାଡ କେନ୍ଦ୍ରୀୟ ବିଧାନସଭା ନିର୍ବାଚନମଣ୍ଡଳୀରୁ କଂଗ୍ରେସ ନେତା ଜଗଦୀଶ ଶେଟ୍ଟାର ପ୍ରତିଦ୍ୱନ୍ଦ୍ୱିତା କରୁଛନ୍ତି। ଏହି ନିର୍ବାଚନମଣ୍ଡଳୀରୁ ସେ ସପ୍ତମ ଥର ପାଇଁ ପ୍ରତିଦ୍ୱନ୍ଦ୍ୱିତା କରୁଛି। କଂଗ୍ରେସ ତାଙ୍କୁ ପ୍ରୋଜେକ୍ଟ କରି ରାଜ୍ୟର ଲିଙ୍ଗାୟତ ଭୋଟରଙ୍କୁ ହାତେଇବାର ଚେଷ୍ଟା କରୁଥିବାବେଳେ ଭାଜପା ନିଜ ଗଡ଼ରେ ଶେଟ୍ଟାରଙ୍କୁ ପରାସ୍ତ କରିବାକୁ ଯୋଜନା କରୁଛି।
