ବରଗଡ଼,୧୩।୮(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ୨୦୨୪-୨୫ ଖରିଫ ଧାନ ସଂଗ୍ରହ ପାଇଁ ଚାଷୀ ପଞ୍ଜୀକରଣ ପ୍ରକ୍ରିୟା ଚାଲିଛି। ହେଲେ ଜିଲାର ମହିଳା ସ୍ବୟଂ ସହାୟିକା ଗୋଷ୍ଠୀ (ଏସ୍ଏଚ୍ଜି) ଗୁଡ଼ିକୁ ଏଥିରୁ ବାଦ୍ ଦିଆଯାଇଛି। ଏହାକୁ ନେଇ ଏସ୍ଏଚ୍ଜି ସଭ୍ୟାଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏହି କ୍ରମରେ ସୋମବାର ବିଭିନ୍ନ ଏସ୍ଏଚ୍ଜିର ଶତାଧିକ ମହିଳା ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ। ସେଠାରେ ଚାଷୀ ପଞ୍ଜୀକରଣ ପ୍ରକ୍ରିୟାରୁ ବାଦ୍ ଦେବା ପ୍ରତିବାଦରେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ଏହାସହିତ ଜିଲାପାଳ ଆଦିତ୍ୟ ଗୋୟଲଙ୍କୁ ଏକ ସ୍ମାରକପତ୍ର ପ୍ରଦାନ କରିଥିଲେ।
ପ୍ରକାଶ ଯେ, ଜିଲାର ୫୪ ଏସ୍ଏଚ୍ଜି ଧାନ ସଂଗ୍ରହ ପ୍ରକ୍ରିୟାରେ ସାମିଲ ହୋଇଆସୁଥିଲେ। ଚାଷୀ ପଞ୍ଜୀକରଣଠାରୁ ଆରମ୍ଭ କରି ଚାଷୀଙ୍କଠାରୁ ଧାନ କିଣାବିକା ମଧ୍ୟ କରୁଥିଲେ। ଏହାଦ୍ୱାରା ଚାଷୀ ଉପକୃତ ହେଉଥିଲେ। ଧାନ ସଂଗ୍ରହ କାର୍ଯ୍ୟ ବାବଦକୁ ନିର୍ଦ୍ଧାରିତ ଟଙ୍କା ପାଇଁ ଏସ୍ଏଚ୍ଜି ଗୁଡ଼ିକ ସେଥିରୁ ବାଦ୍ ଦିଆଯାଇଛି। ତେବେ ଏସ୍ଏଚ୍ଜିଗୁଡ଼ିକୁ ଚାଷୀ ପଞ୍ଜୀକରଣ କାର୍ଯ୍ୟ ପାଇଁ ପ୍ରଥମେ ଚିଠି କରାଯାଇ ପ୍ରଶିକ୍ଷଣ ଦିଆଯିବା ଏବଂ ପରବର୍ତ୍ତୀ ସମୟରେ ସେମାନଙ୍କୁ ସେଥିରୁ ସମ୍ପୂର୍ଣ୍ଣ ବାଦ୍ ଦେବାକୁ ନେଇ ଅସନ୍ତୋଷ ବଢିଛି। ସୂଚନା ଅନୁଯାୟୀ, ଜିଲା ପ୍ରଶାସନର ଚିଠିସଂଖ୍ୟା-୯୪୯୯ ତା-୧୦।୭।୨୦୨୪ରିଖ ଅନୁସାରେ ଏସ୍ଏଚ୍ଜିର ସଭାପତି, ସମ୍ପାଦିକା, ଡିଇଓ (ଡାଟା ଏଣ୍ଟ୍ରି ଅପରେଟର)ଙ୍କୁ ପ୍ରଶିକ୍ଷଣ ପାଇଁ ବ୍ଲକ କାର୍ଯ୍ୟାଳୟକୁ ଡକାଯାଇଥିଲା। ସେମାନେ ସେଠାକୁ ଯାଇ ପ୍ରଶିକ୍ଷଣ ମଧ୍ୟ ନେଇଥିଲେ। ଏପରିକି ଚାଷୀ ପଞ୍ଜୀକରଣ ପାଇଁ ଉର୍ଦ୍ଦିଷ୍ଟ ଫର୍ମ ମଧ୍ୟ ବଣ୍ଟନ କରିଥିଲେ। ସେହିପରି ପ୍ରଶାସନର ଅନ୍ୟ ଏକ ଚିଠି ନଂ. ୧୦୦୪୭, ତା-୧୨।୭।୨୦୨୪ରେ ଜିଲାର ୫୪ ଏସ୍ଏଚ୍ଜିକୁ ଧାନ ସଂଗ୍ରହ ପ୍ରକ୍ରିୟାରେ ସାମିଲ କରିବାକୁ ଚିଠି ହୋଇ ସବ୍ଡିଭିଜନାଲ ଲେଭଲ୍ ସିଲେକ୍ସନ କମିଟିକୁ ଗତ ମାସ ୨୫ ତାରିଖ ସୁଦ୍ଧା ରିପୋର୍ଟ ଦେବାକୁ ନିର୍ଦ୍ଦେଶ ଦିଆଯାଇଇଥିଲା। କିନ୍ତୁ ଗତମାସ ୧୬ତାରିଖରେ ଆଉ ଏକ ପତ୍ର ସଂଖ୍ୟା-୨୩୭୯ରେ ଜିଲାର ୫୮ ପ୍ରାଥମିକ କୃଷି ସମବାୟ ସମିତି (ପ୍ୟାକ୍ସ)କୁ ଚାଷୀ ପଞ୍ଜୀକରଣ କରିବା ପାଇଁ ଚିଠି କରାଯାଇଥିଲା।
ତେବେ ସେଥିରୁ ବାଦ୍ ପଡିଥିବା ଜାଣିବା ପରେ ଏସ୍ଏଚ୍ଜିର କର୍ମକର୍ତ୍ତା ଗତ ମାସ ୧୮ତାରିଖରେ ଜିଲାପାଳଙ୍କୁ ଭେଟିଥିଲେ। ସେତେବେଳେ ଜିଲାପାଳ ଯୋଗ୍ୟ ଏସ୍ଏଚ୍ଜିଗୁଡ଼ିକୁ ଧାନ ସଂଗ୍ରହ ପ୍ରକ୍ରିୟାରେ ସାମିଲ କରାଯିବ। କେବଳ ବରଗଡ଼ ନୁହେଁ, ସାରା ରାଜ୍ୟରେ ସେଭଳି ନିଷ୍ପତ୍ତି ନିଆଯାଇଥିବା ଜିଲାପାଳ କହିଥିବା ଏସ୍ଏଚ୍ଜି ମହିଳାମାନେ ପ୍ରକାଶ କରିଛନ୍ତି। କିନ୍ତୁ ବରଗଡ଼ ସମେତ ଅଳ୍ପ କେତୋଟି ଜିଲାକୁ ଛାଡ଼ିଦେଲେ ଅଧିକାଂଶ ଜିଲାରେ ମହିଳା ଏସ୍ଏଚ୍ଜି ଚାଷୀ ପଞ୍ଜୀକରଣ କାର୍ଯ୍ୟ କରୁଥିବା ସେମାନେ କହିଛନ୍ତି। ବରଗଡ଼ ଜିଲାର ଏସ୍ଏଚ୍ଜିକୁ କାହିଁକି ଏହି କ୍ଷେତ୍ରରେ ଉପେକ୍ଷା କରାଯାଇଛି ବୋଲି ସେମାନେ ଅଭିଯୋଗ କରିଛନ୍ତି। ସେମାନଙ୍କୁ ଧାନ ସଂଗ୍ରହ ପ୍ରକ୍ରିୟାରେ ସାମିଲ କରାଯାଉ, ନଚେତ୍ ସେମାନେ ହାଇକୋର୍ଟର ଦ୍ୱାରସ୍ଥ ହେବେ ବୋଲି ସ୍ମାରକପତ୍ରରେ ଉଲ୍ଲେଖ କରିଛନ୍ତି। ଏଥିରେ ଜିଲାର ପ୍ରତ୍ୟେକ ବ୍ଲକର ଏସ୍ଏଚ୍ଜି ମହିଳାମାନେ ସାମିଲ ହୋଇଥିଲେ।