ଭୁବନେଶ୍ୱର,୩୧।୧୦(ସତ୍ୟଜିତ୍ ରାଉତ):୨ ହଜାର ଟଙ୍କିଆ ନୋଟ୍କୁ ପ୍ରତ୍ୟାହାର କରିବା ପାଇଁ ମେ’୧୯ରେ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ନିଷ୍ପତ୍ତି ନେଇଥିଲା। ଏହି ବଡ଼ ନୋଟ୍କୁ ମେ’୨୩ରୁ ସେପ୍ଟେମ୍ବର ୩୦ ମଧ୍ୟରେ ବ୍ୟାଙ୍କରେ ଦେଇ ଅନ୍ୟ ନୋଟ୍ଗୁଡ଼ିକୁ ନିଆଯାଇପାରିବ ବୋଲି କୁହାଯାଇଥିଲା। ପରବର୍ତ୍ତୀ ସମୟରେ ଏହି ସମୟସୀମା ଅକ୍ଟୋବର ୭ ପର୍ଯ୍ୟନ୍ତ ବଢ଼ାଯାଇଥିଲା। ଅକ୍ଟୋବର ୮ରୁ ଲୋକମାନେ କେବଳ ଆର୍ବିଆଇର ୧୯ଟି ଆଞ୍ଚଳିକ କାର୍ଯ୍ୟାଳୟରେ ହିଁ ଏହି ନୋଟ୍କୁ ବଦଳାଇପାରିବାର ଗାଇଡ୍ଲାଇନ୍ ରହିଛି। ଜଣେ ବ୍ୟକ୍ତି ୧୦ ଖଣ୍ଡ ନୋଟ୍ ଅର୍ଥାତ୍ ୨୦ ହଜାର ଟଙ୍କା ବଦଳାଇପାରିବେ। ତେବେ ୫ ମାସ ପରେ ଲୋକଙ୍କ ପାଖରେ ବିପୁଳ ୨ହଜାରିଆ ନୋଟ୍ ଗଚ୍ଛିତ ରହିଥିବାରୁ ଏବେ ଭୁବନେଶ୍ୱରସ୍ଥିତ ଆର୍ବିଆଇର ଆଞ୍ଚଳିକ କାର୍ଯ୍ୟାଳୟରେ ପ୍ରବଳ ଭିଡ଼ ହେଉଛି। ଗତ ଦୁଇ ସପ୍ତାହରୁ ଅଧିକ ହେବ ଲମ୍ବା ଧାଡ଼ି ଲାଗୁଥିବା ଦେଖିବାକୁ ମିଳୁଛି। ଏଥିପାଇଁ ଆର୍ବିଆଇ ଅଧିକାରୀମାନେ ଚିନ୍ତାରେ ପଡ଼ିଥିବାବେଳେ ଏହାକୁ ନେଇ ମଧ୍ୟ ନାନା ଚର୍ଚ୍ଚା ଆରମ୍ଭ ହୋଇଛି। ଉକ୍ତ ଟଙ୍କାଗୁଡିକୁ ବେଆଇନ ଭାବେ ଗଚ୍ଛିତ ରଖିଥିବା ଶିଳ୍ପପତି, ରାଜନେତା, ବିଲ୍ଡର ଓ ଅପରାଧୀମାନେ ବଦଳାଇବାକୁ ସାଧାରଣ ଲୋକଙ୍କୁ ଲଗାଉଥିବା କୁହାଯାଉଛି। ଏଥିରେ ଏକାଧିକ ର଼୍ୟାକେଟ ଲାଗିଥିବା ମଧ୍ୟ ସନ୍ଦେହ କରାଯାଉଛି। ଏଥିପାଇଁ ଗାଁରୁ ରାଜଧାନୀକୁ ଲୋକଙ୍କୁ ଗାଡିରେ ବୁହାଯାଉଛି। ଏପରିକି ଭୁବନେଶ୍ୱରର ବସ୍ତି ଲୋକଙ୍କୁ ମଧ୍ୟ ଏଥିରେ ନିୟୋଜିତ କରାଯାଉଥିବା ସୂଚନା ମିଳିଛି। ତେବେ ପଚରାଉଚରାବେଳେ ବହୁ ଲୋକ ମୁହଁ ଖୋଲୁ ନ ଥିବାରୁ ଓ ଗଣମାଧ୍ୟମକୁ ଦେଖିଲେ ଆକ୍ରମଣାତ୍ମକ ହେଉଥିବାରୁ ଏଭଳି ସନ୍ଦେହ ଅଧିକ ଦୃଢ଼ୀଭୂତ ହୋଇଛି।
ସୋମବାର ମଧ୍ୟ ଆର୍ବିଆଇ ସାମ୍ନାରେ ଲୋକଙ୍କ ଲମ୍ବା ଧାଡ଼ି ଦେଖିବାକୁ ମିଳିଥିଲା। ହେଲେ ଦିନ ପ୍ରାୟ ୨ଟାରେ ଆର୍ବିଆଇ ମଧ୍ୟକୁ ଏହି ନୋଟ ବଦଳାଇବାକୁ ଲୋକଙ୍କୁ ପ୍ରବେଶ କରାଯାଇ ନ ଥିଲା। ଫଳରେ ସେଠାରେ ଉତ୍ତେଜନା ପ୍ରକାଶ ପାଇଥିଲା। ଏମାନଙ୍କ ମଧ୍ୟରୁ ଅଧିକାଂଶ ଗଞ୍ଜାମ ଜିଲାର ଥିଲେ। ଅନ୍ୟପକ୍ଷରେ ଆର୍ବିଆଇ ସାମ୍ନା ରାସ୍ତାର ପାର୍ଶ୍ୱରେ ଜଣେ ଲୋକ ୫ଶହ ଟଙ୍କିଆ ନୋଟ ଦେଇ କିଛି ଲୋକଙ୍କଠାରୁ ୨ ହଜାରିଆ ନୋଟ ନେଉଥିବା ଦେଖିବାକୁ ମିଳିଥିଲା। ହେଲେ ଏହା ଉପରେ ପୋଲିସ, ପ୍ରଶାସନ ଅବା କୌଣସି ତଦନ୍ତକାରୀ ସଂସ୍ଥାର କାହାର ନଜର ନାହିଁ। ଆର୍ବିଆଇରେ କାର୍ଯ୍ୟରତ ଜଣେ କର୍ମଚାରୀ କହିଛନ୍ତି, ମେ ୨୩ରୁ ଏହି ନୋଟ ବଦଳାଇବାକୁ ଆର୍ବିଆଇରେ ଭିଡ଼ ହେଉ ନ ଥିଲା। ଗତ ୧୫ଦିନ ହେଲା ଏହିଭଳି ଭିଡ଼ ଦେଖିବାକୁ ମିଳୁଛି। ଏସବୁ ଲୋକଙ୍କୁ ନେତା, ମନ୍ତ୍ରୀ ଓ ବ୍ୟବସାୟୀମାନେ ବ୍ୟବହାର କରୁଛନ୍ତି। ବଡ଼ବଡ଼ିଆଙ୍କ ପାଖରେ ପର୍ଯ୍ୟାପ୍ତ ପରିମାଣରେ ୨ ହଜାରିଆ ନୋଟଥିବାବେଳେ ସେମାନେ ଏସବୁ ନୋଟ୍କୁ ବଦଳାଇ ପାରୁନାହାନ୍ତି। ତେଣୁ ସାଧାରଣ ଲୋକଙ୍କୁ କିଛି ଟଙ୍କାର ଲୋଭ ଦେଖାଇ ୨ ହଜାରିଆ ନୋଟ ବଦଳାଇବାକୁ ବାଧ୍ୟ କରାଯାଉଥାଇପାରେ ବୋଲି ଅଧିକାରୀ ଜଣକ କହିଛନ୍ତି। ଗଞ୍ଜାମ ଖଲ୍ଲିକୋଟରୁ ଆସିଥିବା ରବୀନ୍ଦ୍ର କୁମାର ସ୍ବାଇଁ କହିଛନ୍ତି, କିଛି ୨ ହଜାରିଆ ନୋଟ ବଦଳାଇବାକୁ ଆସି ଫେରିବାକୁ ପଡ଼ୁଛି। ଏହି ଭିଡ଼ ହେଉଥିବାରୁ ଆର୍ବିଆଇ କିଛି ସ୍ବତନ୍ତ୍ର ବ୍ୟବସ୍ଥା କରିବା ଆବଶ୍ୟକ ବୋଲି କହିଛନ୍ତି। ଆଉ କେତେଜଣ ନୋଟ୍ ବଦଳାଇବାକୁ ଭୁବନେଶ୍ୱରରେ କିଛିଦିନ ହେବ ରହିଥିବା କହିଛନ୍ତି।