ନୂଆଦିଲ୍ଲୀ,୧୧।୫ : ଆସନ୍ତା ଜୁଲାଇରେ ଶ୍ରୀଲଙ୍କାରେ ହେବାକୁ ଥିବା ୩ ମ୍ୟାଚ୍ ବିଶିଷ୍ଟ ଦିନିକିଆ ଓ ଟି୨୦ ସିରିଜ୍ରେ ବରିଷ୍ଠ ଓପନର ଶିଖର ଧାଓ୍ବନଙ୍କୁ ମିଳିପାରେ ଭାରତୀୟ ଦଳର ନେତୃତ୍ୱ ଦାୟିତ୍ୱ। ଟିମ୍ ଇଣ୍ଡିଆର ମୁଖ୍ୟ ଖେଳାଳିମାନେ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ରେ ବ୍ୟସ୍ତ ଥିବେ। ଏଣୁ ଭୁବନେଶ୍ୱର କୁମାର, ପୃଥ୍ବୀ ଶ’, ହାର୍ଦ୍ଦିକ ପାଣ୍ଡ୍ୟା ଓ ଇଶାନ କିଷନଙ୍କୁ ଧଳା ବଲ ସିରିଜ୍ରେ ମିଳିପାରେ ସୁଯୋଗ।
ଟିମ୍ ଇଣ୍ଡିଆର ଏହି ଗସ୍ତ ଲାଗି କୌଣସି ଘୋଷଣା ହୋଇ ନାହିଁ। କିନ୍ତୁ ଟିମ୍ ଇଣ୍ଡିଆ ପାଇଁ ପୂର୍ବରୁ ଖେଳିସାରିଥିବା ସଦସ୍ୟ ଓ ଆଇପିଏଲ ଖେଳାଳିଙ୍କୁ ବଛାଯିବ। ଇଶାନ ଓ ସୂର୍ଯ୍ୟକୁମାର ଯାଦବ ଇଂଲଣ୍ଡ ବିପକ୍ଷ ସିରିଜ୍ରେ ଅନ୍ତର୍ଜାତୀୟ ପଦାର୍ପଣ କରି ସଭିଙ୍କୁ ଆକୃଷ୍ଟ କରିଥିଲେ। ଅନ୍ୟ ଯୁବ ଖେଳାଳିଙ୍କ ମଧ୍ୟରେ ସ୍ପିନର ରାହୁଲ ଚହର ଓ ତାଙ୍କ ଭାଇ ଦୀପକ ଚହରଙ୍କୁ ମଧ୍ୟ ସୁଯୋଗ ମିଳିବାର ବିଶେଷ ସମ୍ଭାବନା ରହିଛି। ଚଳିତ ବର୍ଷ ଆଇପିଏଲରେ ଭଲ ପ୍ରଦର୍ଶନ କରିଥିବା ଚେତନ ସାକାରିୟା, ଅଭେଶ ଖାନ, ଦେବଦତ୍ତ ପାଡିକଲଙ୍କ ଭଳି ଖେଳାଳିଙ୍କୁ ମଧ୍ୟ ଚୟନ କର୍ତ୍ତାରେ ସୁଯୋଗ ଦେଇପାରନ୍ତି।
ତେବେ ଧାଓ୍ବନଙ୍କ ନିକଟରେ ନେତୃତ୍ୱ ନେବାର ଅଭିଜ୍ଞତା ରହିଛି। ସେ ଘରୋଇ କ୍ରିକେଟରେ ଦିଲ୍ଲୀର ନେତୃତ୍ୱ ନେଇସାରିଛନ୍ତି। ୨୦୧୮ରେ ଭାରତ ଜିତିଥିବା ନିଦାହାସ ଟ୍ରଫି ତ୍ରିରାଷ୍ଟ୍ରୀୟ ଟୁର୍ନାମେଣ୍ଟରେ କାମଚଳା ଅଧିନାୟକ ରୋହିତ ଶର୍ମାଙ୍କ ଡେପୁଟି ଥିଲେ ଧାଓ୍ବନ। ଏହି ୩୫ ବର୍ଷୀୟ ବାମହାତୀ ଓପନର ୩୪ ଟେଷ୍ଟ, ୧୪୨ ଦିନିକିଆ ଓ ୬୫ ଟି୨୦ ଖେଳିଛନ୍ତି।