ଜମ୍ମୁ: ଗତ ଶୁକ୍ରବାରଠାରୁ ବଲିଉଡ୍ ଅଭିନେତ୍ରୀ ଶିଳ୍ପା ଶେଟ୍ଟି ପରିବାର ସହ ଏକ ଧାର୍ମିକ ଯାତ୍ରା ଆରମ୍ଭ କରିଛନ୍ତି। ସେ ତାଙ୍କ ମା’ ସୁନନ୍ଦା ଶେଟ୍ଟି, ଭଉଣୀ ଶମିତା ଶେଟ୍ଟୀ ଏବଂ ଝିଅ ସମିଶାଙ୍କ ସହ ଏହି ଯାତ୍ରା କରୁଛନ୍ତି। ଶୁକ୍ରବାର ଆସାମର ଗୁଆହାଟୀସ୍ଥିତ କାମାକ୍ଷୀ ଦେବୀ ମନ୍ଦିରରେ ଶିଳ୍ପା ସପରିବାର ପହଞ୍ଚି ଏକ ବିଶେଷ ପୂଜାର ଆୟୋଜନ କରିଥିଲେ। ଏହାପରେ ସେ ଶନିବାର ଉତ୍ତରାଖଣ୍ଡର ପ୍ରସିଦ୍ଧ କେଦାରନାଥ ମନ୍ଦିର ପରିଦର୍ଶନ କରିବାକୁ ଯାଇଥିଲେ। ସେଠାରେ ସେ ବାବା ଭୋଲେନାଥଙ୍କୁ ଦର୍ଶନ କରି ଆଶୀର୍ବାଦ ଲୋଡ଼ିଥିଲେ। ତେବେ ଶିଳ୍ପା ରବିବାର ଜମ୍ମୁ-କଶ୍ମୀର କଟରାସ୍ଥିତ ମାତା ବୈଷ୍ଣୋଦେବୀଙ୍କ ମନ୍ଦିରରେ ଦର୍ଶନ କରିଛନ୍ତି। ମନ୍ଦିରରେ ଶିଳ୍ପାଙ୍କୁ ଦେଖି ତାଙ୍କର ଅନେକ ପ୍ରଶଂସକଙ୍କର ଗହଳି ଲାଗିଥିଲା। ଏହି ଅବସରରେ ଶିଳ୍ପା ନିଜର କିଛି ପ୍ରଶଂସକଙ୍କ ସହ ଫଟୋ ଉଠାଇ ସୋସିଆଲ ମିଡିଆରେ ପୋଷ୍ଟ କରିଛନ୍ତି। ସେହିପରି ବୈଷ୍ଣୋଦେବୀ ମନ୍ଦିରରେ ଶିଳ୍ପା ତାଙ୍କ ମା’ ଓ ଭଉଣୀଙ୍କ ସହ ଫଟୋ ଉଠାଇ ସୋସିଆଲ ମିଡିଆରେ ପୋଷ୍ଟ କରିଥିଲେ। ଫଟୋର କ୍ୟାପଶନରେ ଶିଳ୍ପା ଲେଖିଥିଲେ, ମାତୃ ଦିବସ ଅବସରରେ ମାତା ବୈଷ୍ଣୋଦେବୀଙ୍କ ଦର୍ଶନ କରିବାର ସୌଭାଗ୍ୟ ପାଇ ମୁଁ ଧନ୍ୟ ମନେକରୁଛି।
ଗତ ସପ୍ତାହରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଏକ ଅର୍ଥ ହେରଫେର ମାମଲାର ଯାଞ୍ଚ କରି ଉଭୟ ଶିଳ୍ପା ଓ ତାଙ୍କ ସ୍ବାମୀ ରାଜ କୁନ୍ଦ୍ରାଙ୍କର ମୁମ୍ବାଇର ଜୁହୁ ସ୍ଥିତ ଫ୍ଲାଟ ଓ ପୁନେସ୍ଥିତ ବଙ୍ଗଳା ସହ ସମୁଦାୟ ୯୭.୭୭ କୋଟିର ସମ୍ପତ୍ତି ଜବତ ହୋଇଥିଲା। ଇଡିର ଏହି କାର୍ଯ୍ୟାନୁଷ୍ଠାନ ପରେ ସ୍ବାମୀ ରାଜ କୁନ୍ଦ୍ରାଙ୍କ ସୁରକ୍ଷା ପାଇଁ ଶିଳ୍ପା ଏହି ଧାର୍ମିକ ଯାତ୍ରା କରୁଥିବା ବିଭିନ୍ନ ମିଡିଆ ରିପୋର୍ଟ ପ୍ରକାଶ ପାଇଛି।