ବମ୍ବେ: ସ୍ବାମୀ ରାଜ କୁନ୍ଦ୍ରା ଅଶ୍ଳିଳ ଭିଡିଓ ନିର୍ମାଣ ମାମଲାରେ ଛନ୍ଦି ହେବା ପରେ ବଲିଉଡ୍ ଅଭିନେତ୍ରୀ ଶିଳ୍ପା ସେଟ୍ଟୀଙ୍କ ସମ୍ପୃକ୍ତି ଏବେ ସନ୍ଦେହ ଘେରରେ। ଜୁଲାଇ ୧୯ରେ ରାଜ୍ଙ୍କୁ ପୋଲିସ ଗିରଫ କରି ଘଟଣାର ତଦନ୍ତ କରୁଛି। ବର୍ତ୍ତମାନ ତାଙ୍କ ପୋଲିସ ହେପାଜତ ଅବଧିକୁ ଜୁଲାଇ ୨୭ ପର୍ଯ୍ୟନ୍ତ ବୃଦ୍ଧି କରାଯାଇଛି। ଅପରପକ୍ଷେ ଶିଳ୍ପା ସ୍ବାମୀଙ୍କ ସପକ୍ଷରେ ଏବେ ମୁହଁ ଖୋଲିଛନ୍ତି।
ନିଜ ବୟାନରେ ଶିଳ୍ପା ସ୍ବାମୀ ହଟ୍ଶଟ୍ସ ଆପ୍ରେ ଉପଲବ୍ଧ ବିଷୟବସ୍ତୁ ବିଷୟରେ ଅବଗତ ନ ଥିବା କହିଛନ୍ତି। ସେ ନିର୍ଦ୍ଦୋଷ। ଏହାଛଡ଼ା ଏରୋଟିକ୍, ପର୍ନ(ଅଶ୍ଳିଳତା)ଠାରୁ ଭିନ୍ନ ଅଟେ। ରାଜ୍ ଏଭଳି କରିବାରେ ଜଡ଼ିତ ନଥିବା ସେ ପୋଲିସ ନିକଟରେ କହିଛନ୍ତି।
ତେବେ ଶିଳ୍ପାଙ୍କ ବାସଭବନରେ ପୋଲିସ ଚଢ଼ାଉ କରି ଏକ ହାର୍ଡ ଡିସ୍କ ଓ କମ୍ପ୍ୟୁଟର ଜବତ କରିଛି। ଏହି ସମୟରେ ତାଙ୍କୁ କୁନ୍ଦ୍ରାଙ୍କ ମାଲିକାନାରେ ଥିବା ଭିଆନ୍ ଇଣ୍ଡଷ୍ଟ୍ରିଜ୍ରୁ ଇସ୍ତଫା କାହିଁକି ଦେଲେ ବୋଲି ପଚରାଯାଇଥିଲା। ହେଲେ ଏଯାବତ ଅଭିନେତ୍ରୀଙ୍କ ସମ୍ପୃକ୍ତି ନେଇ କୌଣସି ଠୋସ ପ୍ରମାଣ ମିଳିପାରିନାହିଁ।
