ବାରିପଦା ଅଫିସ,୨୭ା୧୨:ମୟୂରଭଞ୍ଜ ଜିଲା ଶିମିଳିପାଳ ଅଭୟାରଣ୍ୟ ବ୍ୟାଘ୍ର ସଂରକ୍ଷଣ ପ୍ରକଳ୍ପରେ ଦନ୍ତା ଶିକାର ଓ ମହାବଳ ବାଘ ଚମଡ଼ା ବିକ୍ରି ଘଟଣାର ଉଚ୍ଚସ୍ତରୀୟ ତଦନ୍ତ ଜାରି ରହିଛି। ଭୁବନେଶ୍ୱରସ୍ଥିତ ପ୍ରମୁଖ ମୁଖ୍ୟ ବନ୍ୟପ୍ରାଣୀ ସଂରକ୍ଷକ(ପିସିସିଏଫ୍) ଏସ୍.କେ. ପୋପଲି ସୋମବାର ଶିମିଳିପାଳକୁ ଆସି ଉଭୟ ଘଟଣାର ତଦନ୍ତ ଜାରି ରଖିଛନ୍ତି। ୩ ଦିନ ପୂର୍ବେ ମୁଖ୍ୟ ବନ୍ୟପ୍ରାଣୀ ସଂରକ୍ଷକ (ସିସିଏଫ୍) ମନୋଜ ଭି. ନାୟାର ତଦନ୍ତ କରି ଫେରିବା ପରେ ପୁନଶ୍ଚ ପିସିସିଏଫ୍ଙ୍କ ଗସ୍ତକୁ ନେଇ ଚର୍ଚ୍ଚା ଜୋର ଧରିଛି।
ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଜେନାବିଲ ରେଞ୍ଜ ଅଞ୍ଚଳରେ ଏକ ଦନ୍ତା ଶିକାର କରି ଦାନ୍ତ କାଟିବା ପରେ ପ୍ରମାଣ ନଷ୍ଟ ଅଭିଯୋଗରେ ୩ ବନକର୍ମଚାରୀଙ୍କୁ କାର୍ଯ୍ୟରୁ ନିଲମ୍ବିତ କରାଯାଇଛି। ସେମାନଙ୍କ ବିରୋଧରେ ମାମଲା ରୁଜୁ ପରେ କୋର୍ଟ ଚାଲାଣ
ମଧ୍ୟ କରାଯାଇଛି। ସେହିଭଳି ମହାବଳ ବାଘ ଚମଡ଼ା ବିକ୍ରିକୁ ନେଇ ସ୍ବତନ୍ତ୍ର ଟାସ୍କ ଫୋର୍ସ ୨ ଅଭିଯୁକ୍ତଙ୍କୁ ଗିରଫ କରିଛି। ହାତୀ ଶିକାର ଘଟଣାରେ ଜଡିତ ଥିବା ଅଧିକାରୀଙ୍କଠାରୁ ଅଦ୍ୟାବଧି ଦାନ୍ତ ଦୁଇଟି ଜବତ କରାଯାଇ ନ ଥିବା ବେଳେ ଶିକାରରେ ଅନ୍ୟ କେଉଁମାନେ ଜଡିତ ଅଛନ୍ତି ତାହାକୁ ନେଇ ବିଭାଗୀୟ ତଦନ୍ତ ଜାରି ରହିଛି। ଶିକାରରେ ଜଡିତ ଥିବା ଅଧିକାରୀଙ୍କ ଆୟ ବହିର୍ଭୂତ ସମ୍ପତ୍ତି ଠୁଳ ସମ୍ପର୍କରେ ଭିଜିଲାନ୍ସ ବିଭାଗ ତଦନ୍ତ କଲେ ଅନେକ ରହସ୍ୟ ଉନ୍ମୋଚନ ହୋଇପାରନ୍ତା ବୋଲି ଜଣେ ଅବସରପ୍ରାପ୍ତ ବନକର୍ମଚାରୀ ପ୍ରକାଶ କରିଛନ୍ତି। ସେହିପରି ହାତୀ ପୋଡ଼ି ଘଟଣାରେ ଅନ୍ୟ କର୍ମଚାରୀମାନେ ଜଡିତ ରହିଥିବା ନେଇ ସୂଚନା ମିଳୁଥିବା ବେଳେ ବନବିଭାଗ ଅଦ୍ୟାବଧି ଘଟଣାର ପର୍ଦ୍ଦାଫାଶ କରିବାରେ ବିଳମ୍ବ କରୁଛି ବୋଲି ପ୍ରାକ୍ତନ ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଭାନୁମିତ୍ର ଆଚାର୍ଯ୍ୟ କହିିଛନ୍ତି। ସେହିପରି ମହାବଳ ବାଘ ଚମଡ଼ା ଜବତ ଘଟଣାରେ ବାରମ୍ବାର ତଦନ୍ତ କରାଯାଉଥିଲେ ମଧ୍ୟ ଫେରାର ଥିବା ଅନ୍ୟ ଅଭିଯୁକ୍ତଙ୍କୁ ଗିରଫ କରିବାରେ ଉଭୟ ବନବିଭାଗ ଓ କ୍ରାଇମବ୍ରାଞ୍ଚ ଟିମ୍ ବିଫଳ ହୋଇଛି। ବିଚାର ବିଭାଗୀୟ ତଦନ୍ତ କରାଯାଇ ଅଭିଯୁକ୍ତମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଜିଲାବାସୀ ଦାବି କରିଛନ୍ତି।