ବାରିପଦା ଅଫିସ,୮।୧ ଶିମିଳିପାଳ ଅଭୟାରଣ୍ୟକୁ ବନାଗ୍ନିରୁ ମୁକ୍ତ କରିବା ନିମନ୍ତେ ସପ୍ତାହବ୍ୟାପୀ ଜନସଚେତନତା କାର୍ଯ୍ୟକ୍ରମ ଗୁରୁବାର ଉଦ୍ଘାଟିତ ହୋଇଯାଇଛି। ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟ ଜାତୀୟ ସେବା ଯୋଜନା ବ୍ୟୁରୋ ଓ ମୟୂରଭଞ୍ଜ ବନବିଭାଗର ମିଳିତ ସହଯୋଗରେ ସ୍ଥାନୀୟ ଛଉ ପଡ଼ିଆରେ ଏନେଇ ଉଦ୍ଘାଟନୀ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଜାତୀୟ ସେବା ଯୋଜନା କାର୍ଯ୍ୟକ୍ରମ ସଂଯୋଜକ ଡ. ଶୁଭେନ୍ଦୁ ଦାସଙ୍କ ପୌରହିତ୍ୟରେ ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଏମ୍.ଜଗଜୟାନନ୍ଦ, ଜିଲାପାଳ ବିନୀତ ଭରଦ୍ୱାଜ, ବିଶ୍ୱ ବିଦ୍ୟାଳୟର କୁଳପତି କିଶୋର କୁମାର ବସା, ଏସ୍ପି କେ.ଆର୍ ଦ୍ୟାନଦେଓ, ବାରିପଦା ଡିଏଫ୍ଓ ସନ୍ତୋଷ ଯୋଷୀ, ବ୍ୟାଘ୍ର ସଂରକ୍ଷଣ ପ୍ରକଳ୍ପ(ଦକ୍ଷିଣ)ର ଉପ ନିର୍ଦ୍ଦେଶକ ସାଇ କିରଣ ପ୍ରମୁଖ ସବୁଜ ପତାକା ଦେଖାଇ ସଚେତନତା ରାଲିକୁ ଉଦ୍ଘାଟନ କରିଥିଲେ। ବାରିପଦା, କରଞ୍ଜିଆ, ରାଇରଙ୍ଗପୁର ଓ ଉଦଳା ବନଖଣ୍ଡ ଅଧୀନରେ ଥିବା ୧୪ଟି କଲେଜର ସ୍ବେଚ୍ଛାସେବୀମାନେ ଏହି ରାଲି ମାଧ୍ୟମରେ ଶିମିଳିପାଳ ସଂଲଗ୍ନ ୧୧୦ଟି ଗଁା ଲୋକଙ୍କ ସହାୟତାରେ କିପରି ଜଙ୍ଗଲକୁ ନିଅଁା ଦାଉରୁ ରକ୍ଷା କରାଯିବା ନେଇ ସଚେତନତା ସୃଷ୍ଟି କରିବେ। ଶିମିଳିପାଳର ସୁରକ୍ଷା ସମସ୍ତଙ୍କର ଦାୟିତ୍ୱ ବୋଲି ଅତିଥିମାନେ ପ୍ରକାଶ କରିଥିଲେ।
ଅନ୍ୟମାନଙ୍କ ମଧ୍ୟରେ ବିଶ୍ୱ ବିଦ୍ୟାଳୟ ପିଜି କାଉନ୍ସିଲ ଅଧ୍ୟକ୍ଷ ପ୍ରଫେସର ଅନୀଲ ବିଶ୍ୱାଳ, ପ୍ରଫେସର ପ୍ରମୋଦ କୁମାର ଶତପଥୀ, ପ୍ରଫେସର ହୃଦାନନ୍ଦ ଥାଟୋଇ, ଆଦିତ୍ୟ ପଟ୍ଟନାୟକ, ଭାନୁମିତ୍ର ଆଚାର୍ଯ୍ୟ, ଅସୀମା ସାହୁ, ସନ୍ତୋଷ ମହାନ୍ତି, ବିଭିନ୍ନ କଲେଜର ଏନ୍ଏସ୍ଏସ୍ ଅଧିକାରୀ, ରେଞ୍ଜର ଓ ବନବିଭାଗ କର୍ମଚାରୀମାନେ ଉପସ୍ଥିତ ରହି ସ୍ବେଚ୍ଛାସେବୀଙ୍କୁ ଉତ୍ସାହିତ କରିଥିଲେ। ଏସିଏଫ୍ ରବି ନାରାୟଣ ମହାନ୍ତି କାର୍ଯ୍ୟକ୍ରମ ପରିଚାଳନା କରିଥିବା ବେଳେ ଏନ୍ଏସ୍ଏସ୍ ଜିଲା ସଂଯୋଜକ ଡ. ସ୍ମୃତି ରଞ୍ଜନ ଦାସ ଧନ୍ୟବାଦ ଅର୍ପଣ କରିଥିଲେ।
